سوڭعى ءۇش جىلدا قازاقستانداعى ءبىلىم بەرۋ ۇيىمدارىندا توپتىق ينفەكتسيالىق اۋرۋلار سانى ەكى ەسەگە وسكەن. بۇل تۋرالى ۇكىمەت وتىرىسىندا دەنساۋلىق ساقتاۋ ءمينيسترى اقمارال ءالنازاروۆا مالىمدەدى.

اقمارال ءالنازاروۆا دەنساۋلىق ساقتاۋ مينيسترلىگىنىڭ نەگىزگى مىندەتتەرىنىڭ ءبىرى — ءبىلىم بەرۋ جانە جازعى دەمالىس ۇيىمدارىندا سانيتاريالىق-ەپيدەميولوگيالىق باقىلاۋدى قامتاماسىز ەتۋ ەكەنىن العا تارتتى. بۇل شارالار بالالاردىڭ قاۋىپسىزدىگىن ساقتاۋعا جانە ينفەكتسيالىق اۋرۋلاردىڭ الدىن الۋدى كوزدەيدى.

ءمينيستردىڭ دەرەگىنشە، وقۋ جىلى باستالعالى بەرى مەكتەپتەردە 347 تەكسەرۋ جۇرگىزىلگەن (150 جوسپارلى، 197 جوسپاردان تىس), ونىڭ ىشىندە 49 اس بلوگى قامتىلعان. ناتيجەسىندە بىرقاتار جۇيەلى بۇزۋشىلىق انىقتالعان. اتاپ ايتقاندا، سانيتاريالىق-تەحنيكالىق جاعدايدىڭ تالاپقا ساي بولماۋى جانە سانيتاريالىق-ەپيدەميولوگيالىق قورىتىندىلاردىڭ جوقتىعى ءجيى كەزدەسەدى.

— سوڭعى ءۇش جىلدا ءبىلىم بەرۋ ۇيىمدارىندا توپتىق ينفەكتسيالىق اۋرۋلار سانى ەكى ەسەگە وسكەنى بايقالادى. 2023 جىلى — 4 جاعداي تىركەلسە، 2024 جىلى — 5, ال 2025 جىلى — 8 جاعداي انىقتالعان. وسىعان بايلانىستى مەملەكەت باسشىسى مەملەكەتتىك باقىلاۋدىڭ ەرەكشە ءتارتىبىن ەنگىزۋ تۋرالى زاڭعا قول قويعان. جاڭا تالاپتارعا سايكەس، 1 ماۋسىمنان باستاپ مونيتورينگ جۇرگىزىلىپ، 1 شىلدەدەن باستاپ جوسپارلى تەكسەرۋلەر باستالادى، — دەدى سپيكەر.

سونىمەن قاتار مينيستر ءوز سوزىندە 2025 جىلعى 1 قىركۇيەكتەن باستاپ مەكتەپ ءمازىرى جاڭارتىلىپ، جاڭا تاماقتانۋ ستاندارتى ەنگىزىلەتىنىن ايتتى. بۇل ستاندارت تاعام ساپاسىن جاقسارتۋعا جانە قاۋىپسىزدىگىن ارتتىرۋعا باعىتتالعان.

وقۋ-اعارتۋ مينيسترلىگىنىڭ دەرەگىنشە، بيىل 187 جازعى ساۋىقتىرۋ ۇيىمىن اشۋ جوسپارلانعان. قازىرگى ۋاقىتتا ولاردىڭ 53%-ى عانا ءوتىنىش بەرگەن، ال 33%-ى بالالاردى قابىلداۋعا دايىن. كەيبىر وڭىرلەردە دايىندىق دەڭگەيى تومەن.

Abai.kz