ناتو-نىڭ باس حاتشىسى مارك ريۋتتە سارسەنبى كۇنى كيەۆتە رەسەي جاستارىنا ۇندەۋ جاساپ. ۋكرايناداعى سوعىس مايدانىنا كەلسە، ولىممەن بەتپە-بەت كەلۋى مۇمكىن ەكەنىن ەسكەرتتى.

ريۋتتە ءپۋتينىڭ ۋكرايناداعى سوعىستى «ارنايى اسكەري وپەراتسيا» دەپ سيپاتتاپ، جاڭادان اسكەرگە كەلگەندەرگە جوعارى جالاقى بەرۋگە ۋادە ەتكەنىن مەڭزەپ: «بىرەۋ سەندەرگە وتە ناشار كەلىسىم ۇسىنىپ وتىر»، - دەدى.

«سوعىسقا بارساڭدار – نە ءدۇرىستاپ دايىندىقتان وتپەيسىزدەر، نە بولماسا ساپاسىز قۇرال-جابدىقتارعا تاپ بولاسىڭدار. ءسويتىپ قازا تابۋلارىڭ نەمەسە جارالانۋلارىڭ ىقتيمال. الدا-جالدا جارالانساڭ، ساز بالشىققا تاستالىپ، ازاپتى ءولىمدى كۇتەسىڭدەر» دەپ ءسوزىن جالعادى.

ريۋتتە سونداي-اق ماسكەۋدىڭ ۋكراينادا «وتە ۇلكەن» شىعىندارعا ۇشىراپ جاتقانىن، اي سايىن 30 000-نان استام رەسەيلىك سارباز قازا تاباتىنىن مالىمدەدى.

«بۇل ءبىر ايدا قازا تاپقاندار سانى 1980 جىلدارداعى اۋعانستاندا ونجىلدا قۇربان بولعانداردىڭ جالپى سانىنان اسىپ تۇسەتىنىن كورسەتەدى» دەدى.

رەسەي بيلىگى ۇزاق ۋاقىت بويى ناتو-نىڭ قىرعي قاباق سوعىس اياقتالعاننان بەرى ۇزدىكسىز كەڭەيۋى جانە ۋكراينانىڭ وداققا قوسىلۋعا نيەتى رەسەيدىڭ ءومىر سۇرۋىنە قاۋىپ توندىرەدى دەپ مالىمدەپ كەلەدى.

مارك ريۋتتەنىڭ كيەۆكە ساپارى رەسەيدىڭ سوڭعى اپتالاردا ۋكرايناعا، اسىرەسە كيەۆ پەن ونىڭ اينالاسىنداعى ايماققا قارسى شابۋىلدارىن كۇشەيتكەن كەزگە تۋرا كەلدى.

ناتو باس حاتشىسى كيەۆتە ءتورت جىلدان استام ۋاقىتقا سوزىلعان سوعىستىڭ «باياۋلاۋ بەلگىلەرى جوق» ەكەنىن اتاپ ءوتتى. ول ۋكراينانىڭ ءوز پوزيتسياسىن ساقتاپ، يننوۆاتسيالار ەنگىزىپ، شايقاس الاڭىندا جەڭىستەرگە جەتكەن سايىن رەسەيدىڭ ءۇمىتى ءۇزىلىپ بارا جاتقانىن اتاپ ءوتتى.

ريۋتتە سانىمەن بىرگە «كيەۆتە ۋكراينانىڭ شايقاس الاڭىنداعى جاعدايدى قالاي وزگەرتە الاتىنىن تالقىلاعانىن» اشىق ايتتى. ول: «مەنىڭ ويىمشا، ۋكراينا مايدان شەبىندە دە، سوعىستى جالعاستىرۋعا قاجەتتى كەيبىر نەگىزگى مۇمكىندىكتەردى قامتاماسىز ەتۋدە دە كوبىرەك تابىستارعا جەتىپ كەلەدى»، - دەپ اتاپ ءوتتى.

ناتو اسكەري كوميتەتىنىڭ توراعاسى، يتالياندىق ادميرال دجۋزەپپە كاۆو دراگونە ناتو باس حاتشىسىنا سەرىك بولىپ كيەۆكە بىرگە كەلدى.

سارسەنبى كۇنى تاڭەرتەڭ، «ورىس داۆوس» ەكونوميكالىق فورۋمىنىڭ اشىلۋ كۇنى، ۋكراينالىق دروندار سانكت-پەتەربۋرگتەگى ەنەرگەتيكالىق جانە اسكەري نىساندارعا شابۋىل جاسادى.

ونىڭ الدىندا رەسەيلىك دروندار مەن زىمىراندار كيەۆكە جانە ۋكراينانىڭ شىعىس-ورتالىق بولىگىندەگى دنەپروپەتروۆ ونەركاسىپتىك قالاسىنا اۋقىمدى شابۋىل جاساپ، 23 ادامنىڭ ءومىرىن قيدى.

ۋكراينا پرەزيدەنتى زەلەنسكي ناتو-عا مۇشە ەلدەردەن اۋە قورعانىس جۇيەلەرىنە، اسىرەسە اقش-تىڭ Patriot زىمىران جۇيەسىنە كوبىرەك وق-ءدارى بەرۋدى سۇرادى — بۇل قارۋلاردى كيەۆ رەسەيدىڭ بالليستيكالىق زىمىران شابۋىلدارىنا قارسى تۇرۋدا ماڭىزدى دەپ سانايدى.

Abai.kz