جاڭا اتاۋ بەرۋ تۋرالى ماسەلە قالالىق ءماسليحاتتىڭ وتىرىسىندا قارالدى.

وتىرىستا استاناداعى جەڭىل رەلستى كولىك جۇيەسىنىڭ (LRT) اتاۋىن وزگەرتۋ ۇسىنىلدى. بۇل تۋرالى استانا قالاسىنىڭ تىلدەردى دامىتۋ جانە مۇراعات ءىسى باسقارماسى باسشىسىنىڭ مىندەتىن اتقارۋشى دوسجان يسابەك ءمالىم ەتتى.

LRT-عا «تارلان استانا» اتاۋىن بەرۋ ۇسىنىلدى. 

ونىڭ ايتۋىنشا، جەڭىل رەلستى كولىك جۇيەسىنە اتاۋ بەرۋ جونىندە قالا تۇرعىندارىنان، قوعامدىق ۇيىمداردان جانە قازاقستان جازۋشىلار وداعىنان ءتۇرلى ۇسىنىستار تۇسكەن.

«قازىرگى تاڭدا LRT ەلوردانىڭ نەگىزگى قوعامدىق كولىك جۇيەلەرىنىڭ بىرىنە اينالىپ كەلەدى. سوندىقتان جوبا تەك ينجەنەرلىك نەمەسە تەحنيكالىق نىسان رەتىندە عانا ەمەس، تۇرعىندارعا جەڭىل ايتىلاتىن، ەستە ساقتالاتىن ءارى زاماناۋي برەند رەتىندە قاراستىرىلۋى قاجەت»، – دەدى ول.

ونىڭ سوزىنشە، حالىقارالىق تاجىريبەدە مۇنداي كولىك جۇيەلەرىنە قالا مادەنيەتى مەن ەرەكشەلىگىن ايقىندايتىن قىسقا ءارى بىرەگەي اتاۋلار بەرىلەدى. وسىعان بايلانىستى جاڭا اتاۋ ۇلتتىق بولمىسقا ساي، حالىقارالىق فورماتقا بەيىمدەلگەن جانە ناۆيگاتسيا جۇيەلەرىندە، ءموبيلدى قوسىمشالار مەن رەسمي اقپاراتتىق رەسۋرستاردا قولدانۋعا ىڭعايلى بولۋى كەرەك.

ماسەلە 2026 جىلعى 3 ماۋسىمدا وتكەن قالالىق ونوماستيكا كوميسسياسىنىڭ وتىرىسىندا قارالعان. كوميسسيا مۇشەلەرى بىرنەشە اتاۋ نۇسقاسىن تالقىلاعان. ولاردىڭ قاتارىندا «قىران»، «قۇلان»، «اسپان»، «تارلان» جانە باسقا دا اتاۋلار بولعان.

تالقىلاۋ قورىتىندىسى بويىنشا كوميسسيا مۇشەلەرى جەڭىل رەلستى كولىك جۇيەسىنە «تارلان استانا» اتاۋىن بەرۋ تۋرالى ۇسىنىستى ءبىراۋىزدان قولدادى.

دوسجان يسابەكتىڭ ايتۋىنشا، «تارلان» اتاۋى قازاقتىڭ تاريحي-مادەني مۇراسىمەن تىعىز بايلانىستى. ول قازاق دۇنيەتانىمىنداعى ەركىندىك، جىلدامدىق، كۇش-قۋات، تەكتىلىك جانە سەنىمدىلىك سەكىلدى قاسيەتتەردى بىلدىرەدى.

«تارلان استانا» اتاۋى ايتىلۋى جەڭىل، ەستە ساقتاۋعا وڭاي جانە زاماناۋي كولىك جۇيەسىنىڭ سەرپىندى سيپاتىن كورسەتەدى. سونىمەن قاتار حالىقارالىق فورماتقا بەيىمدەلگەندىكتەن، شەتەلدىك قوناقتار مەن تۋريستەر ءۇشىن دە قولايلى بولماق، – دەدى باسقارما وكىلى.

Abai.kz