لوندوندا ماڭىزدى گەوساياسي بەلەس ورنادى. ۇلىبريتانيا، گەرمانيا، فرانتسيا جانە ۋكراينا ليدەرلەرى (E3 + ۋكراينا فورماتىندا) رەسەيمەن سوعىستى توقتاتۋدىڭ «ءادىل ءارى باياندى» 5 نەگىزگى شارتىن جاريالادى.

بۇل جاي عانا كەلىسسوز ەمەس، بۇل — ەۋروپانىڭ بولاشاق قاۋىپسىزدىك ارحيتەكتۋراسىنىڭ جاڭا جوباسى. ەۋروپا بۇل جولى «ءبىزسىز ەشتەڭە شەشىلمەيدى» دەگەندى اشىق ءبىلدىردى.

بەيبىتشىلىكتىڭ 5 تالابى:

1. دەرەۋ وتتى توقتاتۋ: ۆلاديمير پۋتين اسكەري قيمىلداردى تولىقتاي توقتاتۋعا كەلىسۋى ءتيىس.
2. شەكارانى كۇشپەن وزگەرتۋگە جول جوق: قازىرگى مايدان شەبى — كەلىسسوزدەردىڭ باستاپقى نۇكتەسى عانا. ۋكراينانىڭ ەگەمەندىگى مەن ونىڭ كەز كەلگەن وداققا (سونىڭ ىشىندە ناتو-عا) قوسىلۋ قۇقىعى تولىق ساقتالۋى شارت.
3. حالىقارالىق اسكەر مەن كەپىلدىك: وتتى توقتاتۋ تۋرالى كەلىسىم كۇشىنە ەنگەن ساتتەن باستاپ ۋكرايناعا زاڭدى قاۋىپسىزدىك كەپىلدىكتەرى بەرىلىپ، ەل اۋماعىنا حالىقارالىق بىتىمگەرشىلىك كۇشتەرى ورنالاستىرىلۋى كەرەك.
4. رەسەيدىڭ بۇعاتتالعان اقشاسى: رەسەي كەلتىرىلگەن بارلىق شىعىندى تولىق وتەپ بەرمەيىنشە، باتىستاعى رەسەيلىك اكتيۆتەر بۇعاتتاۋدان بوساتىلمايدى.
5. ەۋروپالىق مۇددە: ەو مەن ناتو-عا قاتىستى كەز كەلگەن كەلىسسوز تەك وسى ۇيىمدارعا مۇشە مەملەكەتتەردىڭ ماقۇلداۋىمەن عىنا جۇرەدى. ەۋروپا ءوزىن ويىننان تىس قالدىرۋعا جول بەرمەيدى.

بۇل كەزدەسۋدەن نە ۇقتىق؟

• مايدان دالاسىنداعى جاڭا ترەندتەر: ليدەرلەر ۋكراينانىڭ درون تەحنولوگيالارىن ءساتتى قولدانىپ، اۋماقتاردى ازات ەتۋدەگى جەتىستىكتەرىن ەرەكشە اتاپ ءوتتى. ەندى ناتو ۋكراينانىڭ وسى سوعىس تاجىريبەسىن وزىنە ءسىڭىرىپ، ءوز قورعانىس ونەركاسىبىن كۇشەيتپەك.
• «ورەشنيككە» جاۋاپ: ماسكەۋدىڭ «ورەشنيك» زىمىراندارىمەن جاساعان شابۋىلدارى مەن رەسەي دروندارىنىڭ ناتو اۋە كەڭىستىگىن بۇزۋى باتىستى سەسكەندىرگەن جوق، كەرىسىنشە، ولاردى اناعۇرلىم تىعىز بىرىگۋگە ءماجبۇر ەتتى.
• ديپلوماتيالىق قادام: باتىس كوشباسشىلارى زەلەنسكيدىڭ 4 ماۋسىمدا پۋتينگە جازعان حاتىنداعى كەلىسسوزدەر ارقىلى سوعىستى توقتاتۋ شاقىرۋىن جوعارى باعالادى. كيەۆ ديپلوماتيالىق كوزىرلەردى ءوز قولىنا الىپ جاتىر.

ۆلاديمير زەلەنسكي: «باستىسى — ءبىزدىڭ سوعىستاعى قورعانىسىمىز، اۋە شابۋىلىنا قارسى قورعانىس (اشق) سالاسىنداعى ىنتىماقتاستىق جانە ورتاق ديپلوماتيالىق كوزقاراسىمىز: ەۋروپا كەلىسسوزدەرگە قاتىسۋى ءتيىس جانە ول مىقتى بولۋى كەرەك».

ايتپاقشى، زەلەنسكيدىڭ بۇل ساپارى تەك ساياسي فورماتپەن شەكتەلمەيدى — ەرتەڭ ونى ۇلىبريتانيا كورولى كارل III قابىلداماق. بۇل دا ۇلكەن سيمۆوليكالىق قولداۋدىڭ بەلگىسى.

ابىلسەرىك الياكبار

Abai.kz