بۇگىن استانادا «اق جول» پارتياسىنىڭ سيەزى ءوتءتى...

پارتيا توراعاسى، ءماجىلىس دەپۋتاتى ازات پەرۋاشەۆ سيەز بارىسىندا پارتيا جەتەكشىلىگىنەن كەتەتىنىن مالىمدەدى.

وسىنىڭ الدىندا «امانات» پەن «ادىلەت» پارتيالارىنىڭ بىرىگۋىنە بايلانىستى باق وكىلدەرىنىڭ سۇراۋىنا جاۋاپ بەرگەن ازات پەرۋاشەۆ: «اق جولدىڭ» ءوز جولى، ءوز باعىتى، ءوز ۇستانىمى بار», - دەپ جاۋاپ بەرگەن ەدى.

ازات پەرۋاشەۆ كىم؟

ازات پەرۋاشەۆتىڭ ساياسي كارەراسى قالاي ءوربىدى دەسەڭىز: ەڭبەك جولىن 1991 جىلى سول كەزدەگى تالدىقورعان وبلىسىنىڭ پانفيلوۆ اۋدانىندا ينسترۋكتور بولىپ باستاعان. «اليۋميني قازاقستان» اق-دا ۆيتسە-پرەزيدەنت، «اتامەكەن» ۇكپ-دا توراعا بولعان.

2011 جىلى ساياساتكەر، قوعام قايراتكەرى ءاليحان بايمەنوۆتەن كەيىن «اق جول» تىزگىنىن ۇستاعان. ال 2012 جىلى «اق جولدىڭ» فراكتسياسىن باستاپ، ماجىلىسكە ءوتتى. راس، «اق جول» توراعاسى ازات پەرۋاشەۆ الەۋمەتتىك جەلىدە ءھام قازاق قوعامىندا كوپ تالقىلاناتىن دەپۋتاتتاردىڭ ءبىرى. ول – ەلدىڭ ساياسي بولاشاعى تۋرالى قوعامدا قىزۋ ءسوزتالاس ءجۇرىپ جاتقان ساتتەردە «اق جول» توراعاسى پىكىر ءبىلدىرىپ، سۇحبات بەرۋدەن قاشقان جوق.

«اق جولدىڭ» جولى...

پارتيا الاش يدەياسىن پارتيا باعدارلاماسىنا ەنگىزدى، وسى باعىتتا الاشقا، الاشورداعا، ۇلت زيالىلارىنىڭ ءھام قازاق تاريحشىلارىنىڭ زەرتتەۋ ەڭبەكتەرىن شىعارۋ بويىنشا بىرقاتار جۇمىستار اتقاردى. «اق جول» – قازاقستانداعى ءوزىن «سىندارلى وپپوزيتسيا»، بيزنەس پارتياسى جانە حح عاسىر باسىنداعى «الاش» قوزعالىسىنىڭ ءىزباسارى دەپ سيپاتتايدى.

«اق جول» دەموكراتيالىق پارتياسى رەسمي تىركەلگەن 2002 جىلى تەڭ توراعالار بولىپ بولات ءابىلوۆ، ءاليحان بايمەنوۆ، وراز جاندوسوۆ سايلانعان. 2003 جىلى تەڭ توراعالارىنىڭ سانى 5 ادامعا دەيىن ارتتى. بۇل قاتارعا ليۋدميلا جۋلانوۆا مەن التىنبەك سارسەنبايۇلى قوسىلدى. ال 2005 جىلى تەڭ توراعالار ينستيتۋتى تاراتىلىپ، پارتيانى ءاليحان بايمەنوۆ تىزگىندەدى. ونان سوڭ  2011 جىلعى قۇرىلتايدا «اق جول» توراعاسى بولىپ ءبىراۋىزدان ازات تۇرلىبەكۇلى پەرۋاشەۆ سايلاندى. «اق جول» 2012 جىلدان باستاپ پارلامەنتتىك پارتيا اتاندى. ماجىلىستە تۇراقتى دەپۋتاتتىق فراكتسياسى بار.

سيەزدە نە تالقىلاندى؟

بۇل جولعى سيەزدە «پارتيانىڭ ۇستانىمدارىن جاڭا كونستيتۋتسياعا سايكەستەندىرۋ ءۇشىن» كەلىپ تۇسكەن ۇسىنىستار تالقىعا سالىندى. پارتيا جارعىسىنا وزگەرىستەر ەنگىزىلەتىنى ايتىلدى. باستى ماسەلەلەر: جاڭادان قابىلدانعان حالىقتىق كونستيتۋتسياعا سايكەس پارتيانىڭ جارعىسىنا وزگەرىستەر ەنگىزۋ. پارتيا باعدارلاماسىنىڭ جوباسىن وزەكتەندىرۋ بويىنشا وڭىرلەردەگى فيليالداردىڭ ۇسىنىستارىن تىڭداۋ.

سيەزگە تەڭ قۇقىلى پارتيانىڭ 170 دەلەگاتىنىڭ 165-ءى قاتىسقان. اتالعان سيەز بارىسىندا پارتيا توراعاسى ازات پەرۋاشەۆ ءوزىنىڭ پارتيا جەتەكشىلىگىنەن كەتەتىنىن جاريالاپ، توراعالىققا ءماجىلىس دەپۋتاتى دانيا ەسپاەۆانى ۇسىندى. ال پارتيانىڭ قاراعاندى وڭىرلىك فيليالى توراعالىققا ءوز كانديداتتارىن - ەرمەك ءابدىلديندى ۇسىنعان. توراعا سايلاۋ بويىنشا داۋىس بەرۋ اشىق ءارى دەموكراتيالىق تاسىلمەن جۇزەگە اسقان. وسىلاردىڭ ىشىندە 5-ەۋى قالىس قالىپ، 8-ءى ەرمەك ءابدىلديننىڭ كانديداتۋراسىن قولداعان. ال قالعاندارى دانيا ەسپاەۆانىڭ كانديداتۋراسىن قولداپ داۋىس بەرگەن.

ءسويتىپ، شيرەك عاسىرلىق تاريحى بار «اق جولدىڭ» سۋ جاڭا توراعاسى بولىپ العاش رەت ايەل ادام سايلاندى.

«اق جول» دەمپارتياسىنىڭ سۋ جاڭا توراعاسى - دانيا ماديقىزى ەسپاەۆا!

دانيا ەسپاەۆا – اقتوبەنىڭ تۋماسى. قازىرگى ءماجىلىستىڭ توراعا ورىنباسارى. 2016 جىلدان باستاپ ماجىلىستە دەپۋتات («اق جول» پارتياسىنان). ماماندىعى - ەكونوميست. ساياساتقا بانك سالاسىنان كەلگەن.

2019 جىلعى 24 ساۋىردە «اق جول» پارتياسىنىڭ XV كەزەكتەن تىس سيەزىندە دەلەگاتتار ءبىراۋىزدان قولداپ، سول جىلعى پرەزيدەنتتىك سايلاۋعا «اق جول» پارتياسىنان ۇمىتكەر بوپ قاتىسقان. دانيا ەسپاەۆا تاۋەلسىز قازاقستانداعى پرەزيدەنتتىك سايلاۋعا رەسمي تىركەلىپ، دوداعا تۇسكەن تۇڭعىش ايەل كانديدات. ول كەزدە ەسپاەۆا 5,05 پايىز داۋىس جيناپ، ءۇشىنشى ساتىعا جايعاسقان.

دانيا ماديقىزى الداعى قۇرىلتاي سايلاۋىندا دا ءوز پارتياسىن ساياسي دوداعا باستاپ كىرمەك. ەندەشە ىسكە ساتتىلىك تىلەيمىز. ال «اق جولدىڭ» بۇل دوداداعى مۇمكىندىكتەرى تۋرالى كەيىنىرەك، تالداۋ جاسايتىن بولامىز...

نۇرگەلدى ابدىعانيۇلى

Abai.kz