الماتى اكىمى دارحان ساتىبالدى مەملەكەتتىك مەكتەپتەردىڭ باسشىلارىمەن كەڭەس وتكىزىپ، ورتا ءبىلىم بەرۋ جۇيەسىنىڭ قازىرگى جاي-كۇيى، ءبىلىم ساپاسىن ارتتىرۋ، بالالاردىڭ قاۋىپسىزدىگىن قامتاماسىز ەتۋ، قارجىلىق ءتارتىپتى ساقتاۋ جانە ءبىلىم بەرۋ ۇيىمدارىنىڭ جاڭا وقۋ جىلىنا دايىندىق ماسەلەسىن قارادى. ەرەكشە نازار مەملەكەت باسشىسى بەلگىلەگەن جاساندى ينتەللەكتىنى دامىتۋ جانە ونى ءبىلىم بەرۋ جۇيەسىنە ەنگىزۋ جونىندەگى مىندەتتەر اياسىندا وقۋ ۇدەرىسىنە زاماناۋي تسيفرلىق شەشىمدەردى ەنگىزۋگە اۋدارىلدى.

سۋرەت: الماتى قالاسى اكىمدىگىنەن الىندى.

«الماتى – ەلىمىزدىڭ عىلىم مەن ءبىلىم ورتالىعى. ءبىلىم بەرۋ جۇيەسىنىڭ الدىندا وقىتۋ ساپاسىن ارتتىرۋ، ءتارتىپتى نىعايتۋ، بالالاردىڭ قاۋىپسىزدىگىن قامتاماسىز ەتۋ جانە بيۋدجەت قاراجاتىن ءتيىمدى پايدالانۋ بويىنشا ماڭىزدى مىندەتتەر تۇر»، – دەدى دارحان ساتىبالدى.

سۋرەت: الماتى قالاسى اكىمدىگىنەن الىندى.

قالادا 360 ورتا ءبىلىم بەرۋ ۇيىمى جۇمىس ىستەيدى، وندا 357 مىڭنان استام وقۋشى ءبىلىم الادى. ءبىلىم بەرۋ ۇدەرىسىن شامامەن 30 مىڭ پەداگوگ قامتاماسىز ەتەدى. 2026 جىلى ءبىلىم سالاسىن دامىتۋعا 434 ملرد تەڭگە بولىنگەن، بۇل قالا بيۋدجەتىنىڭ 15,4%-ى.

كەڭەستە ءبىلىم ساپاسىن ارتتىرۋ نەگىزگى مىندەتتەردىڭ ءبىرى رەتىندە قارالدى. 2025-2026 وقۋ جىلىنىڭ ءتورتىنشى توقسانىنىڭ قورىتىندىسى بويىنشا الماتىداعى ءبىلىم ساپاسىنىڭ كورسەتكىشى 66% بولدى. سونىمەن قاتار قالا اكىمى ءىرى مەگاپوليستىڭ ءبىلىم بەرۋ جۇيەسى جوعارى تالاپتارعا ساي بولۋعا ءتيىس ەكەنىن اتاپ ءوتىپ، بۇل باعىتتاعى جۇمىستى كۇشەيتۋ قاجەتتىگىن ايتتى.

ءبىلىم ساپاسى تومەن مەكتەپتەرگە ەرەكشە نازار اۋدارىلدى. ءبىلىم باسقارماسىنا ارتتا قالۋ سەبەپتەرىنە كەشەندى تالداۋ جۇرگىزىپ، ناتيجەنى جاقسارتۋ بويىنشا جەكە جوسپار ازىرلەۋ جانە قابىلدانعان شارالاردىڭ تيىمدىلىگىنە تۇراقتى مونيتورينگ جۇرگىزۋ تاپسىرىلدى.

سۋرەت: الماتى قالاسى اكىمدىگىنەن الىندى.

ينفراقۇرىلىمدى دامىتۋ ماسەلەسى دە تالقىلاندى. قازىرگى ۋاقىتتا قالادا شامامەن 30 مىڭ وقۋشى ورنى جەتىسپەيدى. قاجەتتىلىك كارتاسى اياسىندا 2030 جىلعا دەيىن جالپى سىيىمدىلىعى 105 مىڭنان استام ورىن بولاتىن 69 مەكتەپ سالۋ جوسپارلانعان. 2025 جىلى 40 مىڭ ورىندىق 37 ءبىلىم بەرۋ نىسانى پايدالانۋعا بەرىلدى، ونىڭ ىشىندە «كەلەشەك مەكتەپتەرى» ۇلتتىق جوباسى اياسىندا سالىنعان جاڭا مەكتەپتەر بار.

قالا اكىمى مەكتەپتەردىڭ سانيتارلىق جانە تەحنيكالىق جاعدايىنا باقىلاۋدى كۇشەيتىپ، انىقتالعان كەمشىلىكتەردى ۋاقىتىلى جويۋدى تاپسىردى.

كەڭەستە بالالاردىڭ قاۋىپسىزدىگى مەن قۇقىق بۇزۋشىلىقتاردىڭ الدىن الۋ ماسەلەسىنە ەرەكشە كوڭىل ءبولىندى. الماتىدا مەملەكەتتىك مەكتەپتەردە بەينەباقىلاۋ جۇيەسىن، دابىل باتىرماسىن، كىرۋدى باقىلاۋ جۇيەسىن جانە وزگە دە قاۋىپسىزدىك قۇرالدارىن قامتيتىن كەشەندى قاۋىپسىزدىك جۇيەسى ەنگىزىلگەن.

دارحان ساتىبالدى تاربيە جۇمىسىن كۇشەيتۋ، تاۋەكەل توبىنا جاتاتىن بالالاردى ەرتە انىقتاۋ جانە ءبىلىم بەرۋ ۇيىمدارى باسشىلارىنىڭ وقۋشىلاردىڭ قاۋىپسىزدىگى ءۇشىن جاۋاپكەرشىلىگىن ارتتىرۋ قاجەتتىگىن اتاپ ءوتتى.

سونىمەن قاتار قارجىلىق ءتارتىپ جايى دا قارالدى. شاھار باسشىسى مەكتەپ ديرەكتورلارى بيۋدجەت قاراجاتىنىڭ زاڭدى ءارى ءتيىمدى جۇمسالۋىنا دەربەس جاۋاپتى ەكەنىن ايتتى. تەكسەرۋ قورىتىندىسى بويىنشا ىشكى باقىلاۋدى كۇشەيتىپ، مەملەكەتتىك ساتىپ الۋ راسىمدەرىنىڭ اشىقتىعىن قامتاماسىز ەتۋ جانە قاراجاتتىڭ ءتيىمسىز جۇمسالۋىنا جول بەرمەۋ تاپسىرىلدى.

سۋرەت: الماتى قالاسى اكىمدىگىنەن الىندى.

جازعى كەزەڭ مەن جاڭا وقۋ جىلىنا دايىندىق ماسەلەسىنە دە باسا نازار اۋدارىلدى. بيىل 293 مىڭعا جۋىق وقۋشىنى جازعى دەمالىسپەن قامتۋ جوسپارلانىپ وتىر. سونىمەن قاتار 159 مەملەكەتتىك مەكتەپتە جالپى سوماسى 3,6 ملرد تەڭگەگە اعىمداعى جوندەۋ جۇمىستارى جۇرگىزىلۋدە.

كەڭەس قورىتىندىسى بويىنشا ءبىلىم باسقارماسىنا قويىلعان مىندەتتەردىڭ ورىندالۋىن قامتاماسىز ەتۋ، ءبىلىم ساپاسى، بالالاردىڭ قاۋىپسىزدىگى، مەكتەپتەردىڭ دايىندىعى جانە ءبىلىم بەرۋ سالاسىندا «زاڭ مەن ءتارتىپ» قاعيداتىن ساقتاۋ ماسەلەسىن تۇراقتى باقىلاۋدا ۇستاۋ تاپسىرىلدى.

Abai.kz