مەملەكەت باسشىسى قاسىم-جومارت توقاەۆ اقمولا وبلىسىنىڭ ششۋچينسك قالاسىندا وتكەن «ايبىن» XII حالىقارالىق اسكەري-پاتريوتتىق جاستار جيىنىنا قاتىستى.

بيىلعى «ايبىن-2026» باعدارلاماسىنا اسكەري-سپورتتىق، ينتەللەكتۋالدىق، شىعارماشىلىق جانە اسكەري-قولدانبالى سپورت تۇرلەرى بويىنشا جارىستار ەنگىزىلدى. جيىنعا قازاقستاننىڭ بىرنەشە وڭىرىنەن، سونداي-اق ازەربايجان، قىرعىزستان، رەسەي جانە وزبەكستاننان كەلگەن 50-دەن استام كوماندا قاتىستى.

پرەزيدەنت بۇل وسكەلەڭ ۇرپاقتىڭ رۋحىن شىڭداپ، وتانسۇيگىشتىككە تاربيەلەيتىن ماڭىزدى الاڭ ەكەنىن اتاپ ءوتتى. ونىڭ ايتۋىنشا، بايراقتى باسەكەدە ەڭ مىقتى ءارى جىگەرلى جاس ساربازدار ءوز قابىلەتتەرىن كورسەتىپ، دوستاس مەملەكەتتەردىڭ جاستارى دا باق سىنادى.

مەملەكەت باسشىسى ءوز سوزىندە ەل دامۋىنىڭ جاڭا كەزەڭى باستالعانىنا توقتالىپ، كونستيتۋتسيانىڭ زاڭدى كۇشىنە ەنۋى قازاقستان ءۇشىن تاريحي ماڭىزى بار وقيعا ەكەنىن ايتتى. پرەزيدەنتتىڭ پىكىرىنشە، جاڭا كونستيتۋتسيا بارلىق مەملەكەتتىك جانە قوعامدىق ينستيتۋتتاردىڭ جاڭعىرۋىنا نەگىز بولىپ، ەلدىڭ عىلىم مەن تەحنولوگياعا نەگىزدەلگەن دامۋ جولىن ايقىندايدى. سونىمەن قاتار قاسىم-جومارت توقاەۆ قوعامداعى تۇراقتىلىق پەن رەفورمالاردىڭ تابىستى جۇزەگە اسۋى جاستاردىڭ بىلىمدىلىگىنە، ەڭبەكقورلىعىنا جانە وتانشىلدىعىنا تىكەلەي بايلانىستى ەكەنىن جەتكىزدى.

بۇدان بولەك، پرەزيدەنت ءپاتريوتيزمنىڭ مانىنە توقتالىپ، مەملەكەتتىڭ ساياساتى مەن ستراتەگياسىن قولداۋ، ەل يگىلىگى ءۇشىن ەڭبەك ەتۋ جانە تۋعان جەر تاعدىرىنا جاۋاپكەرشىلىكپەن قاراۋ ءار ازاماتتىڭ مىندەتى ەكەنىن ايتتى. ونىڭ سوزىنشە، وتان قورعاۋ – قاسيەتتى بورىش، ال اسكەري قىزمەت ازاماتتىقتىڭ بەلگىسى ءارى كونستيتۋتسيالىق مىندەت سانالادى.

سونداي-اق مەملەكەت باسشىسى ەلىمىزدە قارۋلى كۇشتەردى جاڭعىرتۋ جۇمىستارى جۇيەلى تۇردە جۇرگىزىلىپ جاتقانىن اتاپ ءوتتى. ارميا مەن اسكەري ءبىلىم بەرۋ جۇيەسىنە تسيفرلىق تەحنولوگيالار، جاساندى ينتەللەكت جانە زاماناۋي دايارلىق ستاندارتتارى ەنگىزىلۋدە. پرەزيدەنتتىڭ ايتۋىنشا، باستى مىندەتتەردىڭ ءبىرى – كاسىبي دەڭگەيى جوعارى اسكەري مامانداردى دايارلاۋدىڭ ءتيىمدى جۇيەسىن قالىپتاستىرۋ.

قاسىم-جومارت توقاەۆ جاستار تاربيەسىنە ەرەكشە نازار اۋدارىلىپ جاتقانىن ايتىپ، تاۋەلسىزدىك پەن ەگەمەندىك، اۋماقتىق تۇتاستىق، ازاماتتاردىڭ قۇقىقتارى مەن بوستاندىقتارى سەكىلدى قۇندىلىقتار جاس بۋىننىڭ دۇنيەتانىمىنىڭ نەگىزىنە اينالۋى ءتيىس ەكەنىن جەتكىزدى. وسى ورايدا ول اسكەري داستۇرلەردى «ادال ازامات – سارباز – وتان قورعاۋشى» قاعيداتىنا ساي جاڭعىرتۋ باستاماسىن قولدايتىنىن مالىمدەدى.

پرەزيدەنت قازىرگى حالىقارالىق جاعدايدىڭ كۇردەلەنە تۇسكەنىنە دە توقتالىپ، الەمدە اسكەري قاقتىعىستاردىڭ كوبەيىپ، گەوساياسي احۋالدىڭ قۇبىلمالى بولىپ وتىرعانىن ايتتى. مۇنداي جاعدايدا جاستاردىڭ ەل تاعدىرىنا بەيجاي قاراماۋى ەرەكشە ماڭىزدى ەكەنىنە نازار اۋداردى.

سونىمەن قاتار مەملەكەت باسشىسى «جاس سارباز» قوزعالىسىنىڭ ماڭىزىن اتاپ ءوتتى. بۇگىندە ۇيىم قاتارىندا 280 مىڭنان استام مەكتەپ وقۋشىسى مەن ستۋدەنت بار. پرەزيدەنت اسكەري-پاتريوتتىق بىرلەستىكتەردە تاربيەلەنگەن جاستاردىڭ كوپشىلىگى اسكەري قىزمەتتى، قۇقىق قورعاۋ ورگاندارىن جانە ۇلتتىق قاۋىپسىزدىك سالاسىن تاڭداۋعا ۇمتىلاتىنىن ايتىپ، مۇنداي باستامالاردى تولىق قولدايتىنىن جەتكىزدى.

قاسىم-جومارت توقاەۆ «ايبىن» جوباسى جىلدار بويى ناعىز پاتريوتيزم مەكتەبىنە اينالىپ، مىڭداعان جاستى ءبىر ماقساتقا جۇمىلدىرعانىن ايتتى. ونىڭ پىكىرىنشە، مۇنداي جارىستار جاستاردىڭ فيزيكالىق دايىندىعىن عانا ەمەس، اقىل-ويىن، تاپقىرلىعىن جانە شىعارماشىلىق قابىلەتىن دە دامىتادى. سونداي-اق حالىقارالىق ىنتىماقتاستىقتى نىعايتىپ، حالىقتار اراسىنداعى دوستىق پەن ءوزارا تۇسىنىستىكتى ارتتىرۋعا ىقپال ەتەدى.

ءىس-شارا سوڭىندا پرەزيدەنت قاتىسۋشىلاردى جيىننىڭ اياقتالۋىمەن قۇتتىقتاپ، جاستاردى بىلىمگە ۇمتىلۋعا، ەلگە ادال قىزمەت ەتۋگە جانە جاۋاپكەرشىلىكتى جوعارى قويۋعا شاقىردى. سونىمەن بىرگە جەڭىمپاز كوماندالاردى ماراپاتتاپ، بارلىق قاتىسۋشىلارعا تابىس تىلەپ، قازاقستاننىڭ بولاشاعى جارقىن بولسىن دەگەن تىلەگىن ءبىلدىردى.

Abai.kz