بەكتەنوۆ: «سامۇرىق-قازىنا» بارلىق كۇش-جىگەرىن پرەزيدەنت تاپسىرماسىن جۇزەگە اسىرۋعا جۇمىلدىرۋى كەرەك
قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ «سامۇرىق-قازىنا» اق ديرەكتورلار كەڭەسىنىڭ وتىرىسىن وتكىزدى.
ولجاس بەكتەنوۆ پارلامەنت پالاتالارىنىڭ بىرلەسكەن وتىرىسىندا پرەزيدەنت قاسىم-جومارت توقاەۆ قويعان مىندەتتەردى جەدەل ورىنداۋدىڭ ماڭىزدىلىعىن اتاپ ءوتتى.
«مەملەكەت باسشىسى ەلدىڭ تۇراقتى دامۋىن قامتاماسىز ەتۋ بويىنشا كۇش-جىگەردى ارتتىرۋدى تاپسىردى. پرەزيدەنت ەكونوميكالىق ءوسۋ، كولىك-لوگيستيكالىق، ەنەرگەتيكالىق جانە تسيفرلىق ينفراقۇرىلىمدى دامىتۋ بويىنشا مىندەتتەر قويدى. ەلىمىزدىڭ ينفراقۇرىلىمدىق قاڭقاسىن نىعايتۋ جولىندا "سامۇرىق-قازىنا" قورى دا ماڭىزدى رولگە يە. بارلىق جاۋاپتى مەملەكەتتىك ورگاندار، ونىڭ ىشىندە قور باسشىلىعى مەن توپتىڭ كومپانيالارى وزدەرىنىڭ كۇش-جىگەرى مەن رەسۋرستارىن بارىنشا جۇمىلدىرىپ، اتالعان اۋقىمدى جۇمىسقا دەرەۋ كىرىسۋى قاجەت»، — دەپ اتاپ ءوتتى ولجاس بەكتەنوۆ.
ديرەكتورلار كەڭەسى وتىرىسىنىڭ كۇن تارتىبىندە قور قىزمەتىنىڭ نەگىزگى وندىرىستىك جانە قارجىلىق كورسەتكىشتەرى، نەگىزگى ينۆەستيتسيالىق جوبالاردى جۇزەگە اسىرۋ بارىسى قارالدى.
«سامۇرىق-قازىنا» اق باسقارما توراعاسى نۇرلان جاقىپوۆ مەملەكەت باسشىسىنىڭ ەكونوميكانى دامىتۋ جونىندەگى تاپسىرمالارىن جۇزەگە اسىرۋ اياسىندا قور سوڭعى ءۇش جىلدا جالپى قۇنى 3,3 ترلن تەڭگە بولاتىن 35-تەن استام ينۆەستيتسيالىق جوبانى اياقتاعانىن باياندادى. جاڭا ەنەرگەتيكالىق قۋاتتار مەن ەلەكتر جەلىسى ينفراقۇرىلىمىنىڭ نىساندارى پايدالانۋعا بەرىلدى، مۇناي-گاز سالاسىنىڭ نىساندارى جاڭعىرتىلدى، تەمىرجول جەلىلەرى مەن كونتەينەرلىك حابتاردى قوسا العاندا، كولىك ينفراقۇرىلىمى كەڭەيتىلدى. سونداي-اق حالىقتى اۋىز سۋمەن قامتاماسىز ەتۋ جانە وڭىرلەردى گازبەن قامتۋ جوبالارى جۇزەگە اسىرىلدى.
قوردىڭ مالىمەتى بويىنشا بيىل جالپى قۇنى 3,3 ترلن تەڭگە بولاتىن 16 ينۆەستيتسيالىق جوبانى اياقتاۋ جوسپارلانىپ وتىر. كولىك سالاسىندا «مويىنتى – قىزىلجار» جانە «داربازا – ماقتاارال» تەمىرجول جەلىلەرىنىڭ قۇرىلىسى، «التىنكول – جەتىگەن» جانە «بەينەۋ – ماڭعىستاۋ» ۋچاسكەلەرىن جاڭعىرتۋ، دوستىق – الاشانكوۋ ۋچاسكەسىندە ەكىنشى جولداردى سالۋ، سونداي-اق تەمىرجول ۋچاسكەلەرىندە اۆتوبۇعاتتاۋ جۇيەسىن ەنگىزۋ كوزدەلگەن. مۇناي-گاز جانە ەنەرگەتيكا سالالارىندا جىلىنا 1 ملرد تەكشە مەتر گاز وڭدەيتىن قاشاعان كەن ورنىندا گاز وڭدەۋ زاۋىتىن، Air Liquide Munay Tech Gases كومپانياسىمەن بىرلەسىپ جۇزەگە اسىرىلىپ جاتقان پاۆلودار مۇناي-حيميا زاۋىتىنداعى سۋتەگى ءوندىرۋ قوندىرعىسىنىڭ، الماتى جەو-2-ءنىڭ، تۇركىستان وبلىسىنداعى بۋ-گاز قوندىرعىسىنىڭ، سونداي-اق ENI كومپانياسىمەن بىرلەسىپ جۇزەگە اسىرىلىپ جاتقان گيبريدتى ەلەكتر ستانساسىنىڭ قۇرىلىسىن اياقتاۋ كوزدەلگەن. تسيفرلىق ترانسفورماتسيا سالاسىندا قور قوسشى قالاسىندا دەرەكتەردى وڭدەۋ ورتالىعىنىڭ قۇرىلىسىن جانە كاسپي تەڭىزىنىڭ تۇبىمەن تالشىقتى-وپتيكالىق بايلانىس جەلىسىن سالۋدى اياقتاۋدى جوسپارلاپ وتىر. قازان ايىندا قوسشىدا قوردىڭ ەسەپتەۋ قۋاتىن ءتورت ەسە ارتتىرۋعا مۇمكىندىك بەرەتىن جاڭا سۋپەركومپيۋتەرلىك كلاستەر ەنگىزىلەدى دەپ كۇتىلۋدە. سونىمەن قاتار قوردىڭ كومپانيالار توبىندا بيزنەس-پروتسەستەردى اۆتوماتتاندىرۋ جانە ەڭبەك ونىمدىلىگىن ارتتىرۋ ءۇشىن جي نەگىزىندە شەشىمدەر ەنگىزىلۋدە.
2026 جىلدىڭ باسىنان باستاپ ون ءىرى ينۆەستيتسيالىق جوبانىڭ قۇرىلىسى باستالدى. ولار:
اتىراۋ وبلىسىنداعى بۋتاديەن ءوندىرۋ زاۋىتى;
اتىراۋ وبلىسىنداعى «پوليەتيلەن» جانە «بۋتاديەن» جوبالارىنا ارنالعان ينفراقۇرىلىم نىساندارى;
ەكىباستۇز قالاسىنداعى دەرەكتەردى وڭدەۋ ورتالىقتارىنىڭ القابى ء(دوو);
جامبىل وبلىسىنداعى Masdar كومپانياسىنىڭ قۋاتى 1 گۆت بولاتىن جەل ەلەكتر ستانساسى (جەس);
پاۆلودار وبلىسىنداعى China Power International Holding كومپانياسىنىڭ قۋاتى 1 گۆت بولاتىن جەس;
قاراعاندى وبلىسىنداعى Energy China كومپانياسىنىڭ قۋاتى 500 مۆت بولاتىن جەس;
تەمىرجول ينفراقۇرىلىمى نىساندارىنداعى LTE-R ستاندارتتى سىمسىز بايلانىس جەلىلەرى;
سەمەي جانە وسكەمەن قالالارىنداعى جىلۋ ەلەكتر ورتالىقتارى (جەو);
قازاقستاننىڭ وڭتۇستىك وڭىرلەرىندەگى ەلەكتر ەنەرگياسىن ەسەپكە الۋ ءۇشىن SMART اسپاپتارىن پيلوتتىق جوبا رەتىندە ەنگىزۋ.
وتىرىستا قوردىڭ ۇزاقمەرزىمدى ينۆەستيتسيالىق باعدارلاماسىن ىسكە اسىرۋ جوسپارلارى دا قارالدى. 2027–2029 جىلدارى جالپى قۇنى 21 ترلن تەڭگە بولاتىن 36 ينۆەستيتسيالىق جوبانى جۇزەگە اسىرۋ كوزدەلگەن. ولار جاڭا ەنەرگەتيكالىق نىسانداردىڭ، ونىڭ ىشىندە جىلۋ ەلەكتر ورتالىقتارى مەن جاڭارتىلاتىن ەنەرگيا كوزدەرى سالاسىنداعى جوبالاردىڭ قۇرىلىسىن، ەلەكتر جەلىسى ينفراقۇرىلىمىن دامىتۋدى، مۇناي-گاز جانە مۇناي-گاز حيمياسى سالالارىنداعى ءىرى جوبالاردى جۇزەگە اسىرۋدى، سونداي-اق تەمىرجول ينفراقۇرىلىمىن سالۋدى قامتيدى. باسىمدىقتاردىڭ قاتارىندا 5G جەلىسىن، تسيفرلىق ينفراقۇرىلىمدى دامىتۋدى جانە دەرەكتەردى وڭدەۋ ورتالىقتارى القابىن قۇرۋ بار.
وتىرىس قورىتىندىسى بويىنشا پرەمەر-مينيستر «سامۇرىق-قازىنا» باسشىلىعىنا ينۆەستيتسيالىق جوبالاردىڭ ۋاقتىلى جۇزەگە اسىرىلۋىن قامتاماسىز ەتۋدى، ولاردىڭ مەرزىمدەرىنىڭ ساقتالۋىنا باقىلاۋدى كۇشەيتۋدى، سونداي-اق جوبالاردى جۇزەگە اسىرۋ كەزىندە تاۋارلارداعى، جۇمىستار مەن قىزمەتتەردەگى جەرگىلىكتى قامتۋ ۇلەسىن ۇلعايتۋ جونىندە شارالار قابىلداۋدى تاپسىردى.
Abai.kz
