«ادىلەت» پارتياسى قازاقستاننىڭ تاۋ-كەن مەتاللۋرگيا كەشەنىن دامىتۋعا باعىتتالعان جاڭا باستامالار ازىرلەۋگە كىرىستى. پارتيانىڭ ىسكەرلىك كەڭەسى الاڭىندا وتكەن كەزدەسۋدە سالا كاسىپورىندارىنىڭ باسشىلارى، مەملەكەتتىك ورگاندار مەن سالالىق قاۋىمداستىقتاردىڭ وكىلدەرى ءوندىرىستى جاڭعىرتۋ، شيكىزاتتى تەرەڭ وڭدەۋ، ينۆەستيتسيا تارتۋ جانە ينجەنەرلىك كادرلاردى دايارلاۋ ماسەلەلەرىن تالقىلادى»،- دەپ حابارلادى باق.

بۇل تۋرالى «ادىلەت» پارتياسىنىڭ تورعاسى ايبەك دادەباي مىرزا: «بۇل تەك ەكونوميكالىق ماسەلە ەمەس، بۇل – ادىلدىك ماسەلەسى. جەر بايلىعى حالىقتىڭ ءال-اۋقاتىنا اينالۋعا ءتيىس. سوندىقتان ءبىز شيكىزاتتى تەرەڭ وڭدەۋدى دامىتۋعا جانە جاڭا وندىرىستەردى قولداۋعا باعىتتالعان باستامالاردى تولىق قولدايمىز»، – دەپتى.

ايبەك ارقابايۇلى وتە دۇرىس ايتادى!

ءيا، بۇل تەك ەكونوميكالىق ماسەلە ەمەس، بۇل ادىلدىك ماسەلەسى!

قۇدايعا تاۋبە، «ادىلەت» پارتياسى ادىلەتسىزدىكتىڭ ەڭ تالماۋ تۇسىنان ۇستادى!

ءبىر كەزدە، سوناۋ 1993 جىلى اتاقتى شەرحان مۇرتازانىڭ: «قازاننان قاقپاق كەتسە، يتتەن ۇيات كەتەدى»، دەيدى. ءبىزدىڭ جاس مەملەكەتىمىزدىڭ قاقپاعى اشىلعان كورىنەدى. سوندىقتان، ۇياتى كەتكەندەردىڭ تالان-تاراجىعا سالىپ جاتقانى اشىلىپ جاتىر. جاي-جالاڭ ءسوز ەمەس، ناقتى-ناقتى فاكتىلەرمەن ايتتى. ەستىگەن قۇلاققا، تۇسىنگەن ميعا ءبارى جەتىپ جاتىر. وسىنداي كۇدىك كوبىمىزدىڭ كوڭىلىمىزدە بۇرىننان جۇرگەن. «قايدا كەتىپ جاتىر، بۇل قازاقستاننىڭ بايلىعى؟!» دەگەن. ا، بىراق ناق باسىپ، تاپ باسىپ ەشقايسىمىز ايتا العان جوقپىز. قازىر سونىڭ ءبارى فاكتىلەرمەن اشىلدى. مىنا جەردە مىناۋ تابىس – كىرىس كوزى دەيتىندە ءبارى بار – سالىقتان تۇسەتىن كىرىس، انادان تۇسەتىن كىرىس، مىنادان تۇسەتىن كىرىس، ءيا، استىق ساتۋدان تۇسەتىن كىرىس. ا، بىراق مۇنايدان تۇسەتىن، كومىردەن تۇسەتىن، التىننان، كۇمىستەن تۇسەتىن، مىستان تۇسەتىن كىرىس دەگەن جوق مىنانىڭ ىشىندە...»، – دەگەن مىنا ءسوزى ەستەرىڭىزدە بولار!

ءدال وسى ماسەلەگە سول شەرحان مۇرتازادان كەيىن ات ءىزىن سالعان پەندە بولعان جوق!

تاعى قايتالاپ ايتام، ەشبىر پارتيانىڭ جانە ەشبىر دەپۋتاتتىڭ ءتىسى باتقان ەمەس…

مىنە، اراعا تۇپ-تۋرا وتىز ەكى جىل سالىپ، ەكىنشى مارتە ءسوز قوعان وتىرعان — «ادىلەت» پارتياسى جانە ونىڭ توراعاسى ايبەك دادەباي مىرزا عانا!

بۇل — ادىلەتتى قازاقستاننىڭ شىنداپ اتقا مىنگەنىن كورسەتەتىن تاريحي وقيعا!!

وتە قۇپتارلىق، ەل-جۇرت بولىپ قولداۋعا تاتيتىن ەڭ وزەكتى باستاما!!!

ماسەلە كوتەرىلگەن ەكەن، بۇل جەردە ونىڭ شەشۋدى قايدان باستاۋ كەرەكتىگى —ەڭ ماڭىزدى!

«ادىلەت» پارتياسى كوتەرگەن بۇل ماسەلەنى ءوز دەڭگەيىندە ادىلەتتى جولمەن شەشۋ ءۇشىن، جۇمىستى «جەر قويناۋى جانە جەر قويناۋىن پايدالانۋ تۋرالى» زاڭىنان باستاعان دۇرىس!

اتالعان زاڭنىڭ 28-1-بابىندا: «كاسىپكەرلىكتى ىنتالاندىرۋ تۋرالى كەلىسىم شارتتارىنىڭ ورىندالۋىن مونيتورينگتەۋدى، سونداي-اق ونىڭ قورىتىندىلارىن ينتەرنەت-رەسۋرستاردا جاريالاۋدى قازاقستان رەسپۋبليكاسىنىڭ ۇلتتىق كاسىپكەرلەر پالاتاسى كومىرسۋتەكتەر، ۋران ءوندىرۋ جانە پايدالى قاتتى قازبالار سالاسىنداعى ۋاكىلەتتى ورگاندارمەن بىرلەسىپ، ەلەكتروندىق ساتىپ الۋ جۇيەلەرىنە قولجەتىمدىلىكتى قامتاماسىز ەتۋ ارقىلى جەر قويناۋىن پايدالانۋشىلاردىڭ ۇسىناتىن مالىمەتتەرى نەگىزىندە جۇزەگە اسىرادى»،-دەپ جازىلعان.

بار ماسەلە وسى 28-1-باپتا تۇر!

ايبەك ارقابايۇلى كوتەرىپ وتىرعان وسى ادىلەتتىلىككە قول جەتكىزۋ ءۇشىن، ەڭ الدىمەن وسى 28-1-باپتىڭ كوزىن قۇرتۋ كەرەك!

قالعانى — بوس اۋرەشىلىك!

مەن «ادىلەت» پارتياسىنا جانە ونىڭ تورعاسى ايبەك دادەباي مىرزاعا تەك قانا جەڭىس تىلەيمىن!

اۋىت مۇقيبەك

Abai.kz