قازاقستاندا جاستار ساياساتى سوڭعى جىلدارى مەملەكەتتىك دامۋدىڭ باسىم باعىتتارىنىڭ بىرىنە اينالدى. جاستاردىڭ ءبىلىم الۋى، جۇمىسپەن قامتىلۋى، كاسىپكەرلىكپەن اينالىسۋى، ەرىكتىلىك قوزعالىسىنا قاتىسۋى جانە قوعامدىق ومىرگە بەلسەندى ارالاسۋى ءۇشىن ءتۇرلى باعدارلامالار جۇزەگە اسىرىلىپ كەلەدى. وسى تۇرعىدان العاندا استانا قالاسى جاستاردىڭ يدەيالارى مەن باستامالارى توعىسقان، ولاردىڭ الەۋەتىن دامىتۋعا قولايلى ورتا قالىپتاستىرعان وڭىرلەردىڭ ءبىرى سانالادى.

مەملەكەت باسشىسى قاسىم-جومارت توقاەۆ جاستارعا قاراتا ايتقان سوزىندە وتانشىلدىق سەزىمگە، قوعامدا «زاڭ مەن ءتارتىپ» ۇستەمدىگىن ورناتۋدىڭ ماڭىزىنا توقتالعان بولاتىن.

«قازىرگى كوكىرەگى وياۋ جاس ۇرپاق وتانشىلدىق دەگەن ءسوزدى باسقاشا قابىلدايدى. جاستاردىڭ باسىم كوپشىلىگى اسىرەدىنشىلدىكتى، اسىرەۇلتشىلدىقتى قولدامايدى. ولار ءۇشىن ءپاتريوتيزمنىڭ باستى كورسەتكىشى – جاسامپازدىق پەن جاڭاشىلدىق. جاستار «ەلدى ءسۇيۋ دەگەنىمىز – حالىققا پايداسى تيەتىن جاڭالىق اشۋ، جاڭا ءىس باستاۋ» دەپ تۇسىنەدى. ولار قازاقستاندى دامىعان، كوركەيگەن مەملەكەت رەتىندە كورگىسى كەلەدى. زاماناۋي تەحنولوگيالاردى مەڭگەرىپ، حالقىمىزدى وزىق ويلى ۇلتتاردىڭ قاتارىنا قوسۋعا تالپىنادى. وسكەلەڭ ۇرپاقتىڭ بويىنداعى پاتريوتيزم – بولاشاققا دەگەن شىنايى ۇمتىلىس.  حاكىم اباي «ادامنىڭ ادامشىلىعى اقىل، عىلىم، جاقسى اتا، جاقسى انا، جاقسى قۇربى، جاقسى ۇستازدان بولادى» دەپ ايتقان. بۇل ناقىل سوزگە مەملەكەت باسشىسى رەتىندە قوسارىم: وركەنيەتتى ءارى وزىق ەلدىڭ زاڭى – ءادىل، بيلىگى – بىلىكتى، ال ازاماتتارى سانالى جانە بەلسەندى بولارى حاق. مەملەكەت دەڭگەيىندە قابىلدانعان ءاربىر شەشىمنىڭ ءمان-ماڭىزى، ەڭ الدىمەن، حالىقتىڭ تۇرمىسىن جاقسارتۋ، ەكونوميكانى تۇراقتاندىرىپ، الەۋمەتتىك ادىلدىك ورناتۋ ءۇشىن جاسالعان ناقتى ىستەرمەن ولشەنۋگە ءتيىس. سوندا ءبىز جاڭا تۇرپاتتى، مىقتى ەل بولامىز. قازاقستان جان-جاقتى، تۇبەگەيلى رەفورمالاردىڭ ارقاسىندا دامۋدىڭ داڭعىل جولىنا ءتۇسىپ كەلەدى. الدا قارقىندى جۇمىس كۇتىپ تۇر»، – دەدى مەملەكەت باسشىسى.

ەلوردادا جاستاردى قولداۋعا باعىتتالعان كوپتەگەن جوبالار ىسكە اسىرىلۋدا. قالاداعى جاستار رەسۋرستىق ورتالىقتارى، ەرىكتىلەر ۇيىمدارى، ستۋدەنتتىك بىرلەستىكتەر مەن قوعامدىق قورلار جاستاردىڭ الەۋمەتتىك، مادەني جانە ازاماتتىق بەلسەندىلىگىن ارتتىرۋعا ىقپال ەتىپ كەلەدى. سونىمەن قاتار ءتۇرلى فورۋمدار، پىكىرسايىس الاڭدارى، قايىرىمدىلىق اكتسيالارى، ەكولوگيالىق باستامالار مەن ءبىلىم بەرۋ جوبالارى جاستاردىڭ قوعامدىق جاۋاپكەرشىلىگىن قالىپتاستىرۋدا ماڭىزدى ءرول اتقارادى.

بۇگىندە استانادا ەرىكتىلەر قوزعالىسى ەرەكشە قارقىن الىپ كەلەدى. قالادا وتەتىن حالىقارالىق فورۋمدار، سپورتتىق جارىستار، مادەني ءىس-شارالار مەن الەۋمەتتىك اكتسيالاردىڭ بارلىعىنا دەرلىك جاستار بەلسەندى اتسالىسادى. ولار قارتتارعا كومەك كورسەتىپ، ەكولوگيالىق سەنبىلىكتەر ۇيىمداستىرىپ، توتەنشە جاعداي كەزىندە دە قوعامدىق قولداۋ جۇمىستارىنان شەت قالمايدى. بۇل جاستاردىڭ تەك ءوز بولاشاعىنا عانا ەمەس، قوعامنىڭ دامۋىنا دا بەيجاي قارامايتىنىن كورسەتەدى.

جاستار ساياساتىنىڭ باستى ماقساتى – جاستاردىڭ الەۋەتىن اشىپ، ولاردىڭ باستامالارىن قولداۋ ارقىلى ەلدىڭ تۇراقتى دامۋىنا ۇلەس قوسۋ. وسى باعىتتا مەملەكەتتىك قولداۋ مەن قوعامدىق ۇيىمداردىڭ بىرلەسكەن جۇمىسى وڭ ناتيجەسىن بەرىپ كەلەدى. قازىرگى جاستار تەك ءبىلىم الىپ قانا قويماي، ءوز جوبالارىن جۇزەگە اسىرىپ، الەۋمەتتىك ماسەلەلەردىڭ شەشىمىنە دە بەلسەندى ارالاسۋدا.

ەلورداداعى بەلسەندى جاستاردىڭ ءبىرى، ەرىكتى دانيار ەرسىنبەك ەرىكتىلىك قىزمەتتىڭ جاستار ءۇشىن ماڭىزى ەرەكشە ەكەنىن ايتادى.

«ەرىكتىلىك – جاي عانا كومەك كورسەتۋ ەمەس. بۇل – جاۋاپكەرشىلىك، تاجىريبە جانە قوعامعا پايدالى بولۋدىڭ مۇمكىندىگى. استانادا جاستاردىڭ ءوز يدەياسىن جۇزەگە اسىرۋىنا بارلىق جاعداي جاسالعان. وسىنداي مۇمكىندىكتەردى ءتيىمدى پايدالانا بىلسەك، ءوزىمىزدى دە دامىتامىز، قوعامعا دا ناقتى پايدا كەلتىرەمىز. ەڭ باستىسى – بەيجاي قالماي، ءار ازامات ءوز ورتاسىنىڭ دامۋىنا ۇلەس قوسۋى كەرەك»، – دەيدى ول.

ساراپشىلاردىڭ پىكىرىنشە، جاستاردىڭ قوعامدىق بەلسەندىلىگى ەلدىڭ الەۋمەتتىك تۇراقتىلىعى مەن ازاماتتىق قوعامنىڭ دامۋىنا تىكەلەي اسەر ەتەدى. سوندىقتان جاستاردىڭ باستامالارىن قولداۋ، ولاردىڭ كوشباسشىلىق قابىلەتىن دامىتۋ جانە ەرىكتىلىك مادەنيەتىن قالىپتاستىرۋ الداعى ۋاقىتتا دا وزەكتى باعىت بولىپ قالا بەرەدى.

استانا بۇگىندە تەك اكىمشىلىك ورتالىق قانا ەمەس، بەلسەندى جاستاردىڭ جاڭا يدەيالارى جۇزەگە اساتىن الاڭعا اينالىپ وتىر. قالانىڭ قارقىندى دامۋى جاستاردىڭ شىعارماشىلىق جانە الەۋمەتتىك الەۋەتىن اشۋعا مۇمكىندىك بەرۋدە. ال مۇنداي مۇمكىندىكتەردى ءتيىمدى پايدالانۋ – ەلىمىزدىڭ بولاشاعىنا سالىنعان ماڭىزدى ينۆەستيتسيا. جاستاردىڭ بىلىمگە، ەڭبەككە جانە قوعامدىق ىسكە دەگەن ۇمتىلىسى قازاقستاننىڭ تۇراقتى دامۋىنىڭ باستى قوزعاۋشى كۇشتەرىنىڭ ءبىرى بولىپ قالا بەرەتىنى ءسوزسىز.

Abai.kz