ەلوردا كۇنى قارساڭىندا استانانىڭ №1 يندۋستريالىق پاركىندە قالانىڭ ونەركاسىپتىك الەۋەتىن دامىتۋ اياسىندا جۇزەگە اسىرىلعان ءۇش جاڭا ءوندىرىس ورنى پايدالانۋعا بەرىلدى، دەپ حابارلايدى قالا اكىمدىگىنىڭ رەسمي سايتى.

اشىلعان كاسىپورىنداردىڭ ءبىرى – پلاستيكالىق مەديتسينالىق بۇيىمدار شىعاراتىن Heart Center Foundations زاۋىتى. جوباعا 4,155 ملرد تەڭگە ينۆەستيتسيا تارتىلىپ، 54 جاڭا جۇمىس ورنى اشىلدى.

كاسىپورىننىڭ وندىرىستىك قۋاتى جىلىنا ورتا ەسەپپەن 12 ملن دانا ءونىم شىعارۋعا ارنالعان.

ەكىنشى جوبا – جىلۋ اگرەگاتتارىن وندىرەتىن Nomad Tech Engineering زاۋىتى. بۇل جوباعا 2 ملرد تەڭگە ينۆەستيتسيا سالىنىپ، جاڭادان 40 جۇمىس ورنى قۇرىلدى. كاسىپورىننىڭ وندىرىستىك قۋاتى جىلىنا ورتا ەسەپپەن 19 ءونىمدى قۇرايدى.

سونداي-اق پوليپروپيلەننەن بلوكتى-ءمودۋلدى تازارتۋ قۇرىلىسىن (لوس، كوس، كنس) شىعاراتىن TAZAU زاۋىتى جۇمىسىن باستادى.

جوبانى ىسكە اسىرۋعا 510 ملن تەڭگە ينۆەستيتسيا قۇيىلىپ، 60 جاڭا جۇمىس ورنى اشىلدى.

كاسىپورىن جىلىنا شامامەن 200 ءونىم وندىرۋگە قاۋقارلى.

№1 يندۋستريالىق پاركتە جاڭا وندىرىستەردىڭ ىسكە قوسىلۋى ەلوردانىڭ وڭدەۋ ونەركاسىبىنىڭ دامۋىنا، ينۆەستيتسيا تارتۋعا جانە جاڭا جۇمىس ورىندارىن اشۋعا ىقپال ەتەدى.

Abai.kz