قازاقستان قارۋلى كۇشتەرىنىڭ 11 اسكەري قىزمەتشىسى بىرىككەن ۇلتتار ۇيىمىنىڭ ليۆانداعى ۋاقىتشا كۇشتەرى (UNIFIL) ميسسياسىنىڭ قۇرامىندا بىتىمگەرلىك قىزمەت اتقارۋ ءۇشىن ليۆانعا باردى. ولار ليۆاننىڭ وڭتۇستىك بولىگىندە ءۇندىستان اسكەري كونتينگەنتىنىڭ قۇرامىندا قىزمەت ەتەتىن بولادى.

قازاقستاندىق بىتىمگەرلەر بۇۇ قاۋىپسىزدىك كەڭەسىنىڭ مانداتىنا سايكەس، اتىستى توقتاتۋ رەجيمىن قامتاماسىز ەتۋ، جاۋاپكەرشىلىك ايماعىنداعى جاعدايدى باقىلاۋدا ۇستاۋ، جەرگىلىكتى بيلىك ورگاندارىمەن جانە تۇرعىندارمەن بايلانىس ورناتۋ، گۋمانيتارلىق ءىس-شارالاردى سۇيەمەلدەۋ، پاترۋلدەۋ، بۇۇ نىساندارىن كۇزەتۋ جانە وڭىردەگى تۇراقتىلىقتى ساقتاۋعا جاردەمدەسۋ سەكىلدى مىندەتتەردى ورىندايدى.

قورعانىس مينيسترلىگى مالىمەتىنشە، بارلىق اسكەري قىزمەتشىلەر بۇۇ قاۋىپسىزدىك كەڭەسىنىڭ رەزوليۋتسياسىنا سايكەس حالىقارالىق ستاندارتتار بويىنشا جان-جاقتى دايىندىقتان ءوتتى. ونىڭ اياسىندا حالىقارالىق گۋمانيتارلىق قۇقىق نورمالارى، كۇش قولدانۋ ەرەجەلەرى، بەيبىت تۇرعىندارمەن قارىم-قاتىناس جاساۋ ەرەكشەلىكتەرى زەردەلەنىپ، تىلدىك دايىندىق جۇرگىزىلدى.

سونداي-اق قازىرگى زامانعى بىتىمگەرلىك وپەراتسيالار جاعدايىنداعى ءىس-قيمىلدار بويىنشا پراكتيكالىق جاتتىعۋلار ۇيىمداستىرىلدى.

قازاقستاندىق اسكەري قىزمەتشىلەردىڭ ليۆانداعى بىتىمگەرلىك ميسسياسىنداعى تاجىريبەسى مول. بۇگىنگى كۇنى جاۋاپكەرشىلىك ايماعىنا ۇلتتىق كونتينگەنتتىڭ 11-ءشى قۇرامى جىبەرىلىپ وتىر.

بۇعان دەيىن دە قازاقستاندىق بىتىمگەرلەر UNIFIL ميسسياسىنداعى ءۇندى كونتينگەنتىنىڭ قۇرامىندا مىندەتتەرىن ءساتتى اتقارعان بولاتىن. قىزمەت بارىسىندا ولار جوعارى كاسىبي دايىندىعىن، تەمىردەي ءتارتىبىن جانە كوپۇلتتى ورتادا تاپسىرمالاردى ورىنداۋعا ازىرلىگىن كورسەتىپ، ميسسيا قولباسشىلىعى مەن حالىقارالىق سەرىكتەستەر تاراپىنان جوعارى باعا العان.

قازاقستاننىڭ بۇۇ بىتىمگەرلىك وپەراتسيالارىنا قاتىسۋى – ەلىمىزدىڭ حالىقارالىق قاۋىپسىزدىكتى قامتاماسىز ەتۋ باعىتىنداعى ىنتىماقتاستىعىنىڭ ماڭىزدى بولىگى. بۇل قادام قازاقستاننىڭ جاھاندىق بەيبىتشىلىكتى ساقتاۋ جولىنداعى جاۋاپتى مەملەكەت رەتىندەگى بەدەلىن ارتتىرۋعا سەپتىگىن تيگىزەدى. سونداي-اق اسكەري قىزمەتشىلەردىڭ كوپۇلتتى كونتينگەنتتەر قۇرامىندا قىزمەت ەتىپ، بىرەگەي ءىس-تاجىريبە جيناقتاۋىنا جول اشادى.

قازاقستاندىق بىتىمگەرلەر سيريا تۇرعىندارىنا مەديتسينالىق كومەك كورسەتكەنىن جازعان ەدىك.

دەرەككوزى: kaz.inform.kz

Abai.kz