«ءسوز — مارجان، داۋىسىم داۋىل، ءانىم اسقاق…». بۇدان ءبىر جارىم عاسىرداي بۇرىن شىققان بۇل ءسوزدىڭ ءمان-ماعىناسىن بۇرناعى كۇنى بىلدىك.

بۇنداي بيىكتىك بۇگىندە ديماشقا جاراسار. قازىردە كۇللى الەم ءۇشىن ءان ونەرىندە جان بارماعان بيىكتىك بولسا – ادام داۋىسىنىڭ سۇلۋلىعى مەن كەڭدىگىندە شىن مانىندەگى قۇبىلىس بولسا – ەگەر ونى جاھانداعى سەگىز ميلليارد كىسىدەن ءبىر ادام عانا جاساسا – سول سەگىز ميللياردتان ءبىر بىرلىك – ول ءبىزدىڭ ۇل – ديماش قۇدايبەرگەن!

قاتون-قاراعايعا – ءتور التايداعى بۇقتىرمانىڭ بويىنا ونەرلى نوكەرلەرىمەن كوشىپ كەلگەن ديماش قاناتۇلى بايتاق وتانىنىڭ تۋ شىعىسىندا، الىپ كەمەنىڭ ۇشار باسىندا، ايدارىندا ايقايلاتىپ تۇرىپ، عاجايىپ كونتسەرت قويدى.

كونتسەرت بولعاندا دا ءبىز ودان نيۋ-يوركتەگى «Madison Square Garden»، مەحيكوداعى «Palacio de los Deportes»، بارسەلوناداعى «Olimpic Arena Badalona» (بۇل ارەنادا بولىپ ەم), لوندونداعى «OVO Arena Wembley»، بەرليندەگى «Max-Schmeling-Halle» تاعى سونداي الەمنىڭ ەڭ ءىرى شاھارلارىنداعى كونتسەرتتەرى سياقتى تارتىمدى باعدارلامامەن كەرەمەت قۇلشىنىستاعى ديماشتى كوردىك. ديماشىمىزدىڭ ءبىز الگىندە اتاعان قالالاردان گورى قاتون-قاراعايىن قاتتىراق سۇيەتىنىن كوردىك.

ۇلىمىزدىڭ عاجايىپ داۋىسىنان، ءار قيمىل، ءار سوزىنەن قازاعىنا، قازاقستانىنا، ونىڭ سوناۋ قيىر تۇكپىرىندەگى اۋىلىنا، كۇللى تۇركىنىڭ التايىنا دەگەن الىپ ۇشىپ تۇرعان ماحابباتتى كوردىك.

دالا جاعدايىنا قۇرعان الىپ ساحنانىڭ الدىندا تەڭىزدەي تولقىعان قازاقتى، ونىڭ رۋحىن، ونىڭ ءوز ۇلىنا، ونىڭ بيىك ونەرگە دەگەن ولشەۋسىز قۇرمەتىن كوردىك.

ءبىزدىڭ ۇلتتىڭ توپتاسا الاتىنىن، جينالا الاتىنىن، جاقسىلىققا تالپىنىسىن، كوركەمدىككە قۇلشىنىسىن، ەڭ قىزىعى سول ءۇشىن وسىنشاما قيانعا قينالماي جەتەتىن قازاقتىڭ كوپتىگىن، قاتارىنىڭ قالىڭدىعىن كوردىك. كەڭسىرىگىمىز اشىپ، كوزىمىز بۇلدىراپ، اقىن جۇرەگىمىز اتقالاقتاپ تولقىپ تۇردىق.

ءبىزدىڭ ءان ۇرانىمىزدا جۇمەكەن ايتقانداي، «تۋعان جەرىم مەنىڭ – قازاقستانىم» دەپ سوعىپ تۇرعان جۇرەكتى كوردىك. سول جۇمەكەن تۋعان قيعاشتان، قۇدايبەرگەن تۋعان قوبداعا، ودان وسى ورالحان تۋعان بۇقتىرماعا دەيىنگى كەز-كەلگەن اۋىل وسىنداعى ءار قازاقتىڭ تۋعان جەرى ەكەنىن سەزىپ تۇردىق. ەگەر ءوز تۋعان جەرىندەي بيىك قاستەرلەمەسە ديماش قاناتۇلىنىڭ بارسەلونادا وتكەن كونتسەرتى بۇل بۇقتىرمادا وتپەس پە ەدى؟..

«بۇلبۇلمىن، داۋسىم كوكتە دامىلداعان» دەپ ءانشى اسەت ءان سالعاندا داۋىسى التى قىردان ارى كەتەدى دەيتىن كورگەن قاريالار.

بۇگىن مۇندا ديماش ءان شىرقاعاندا التايدىڭ قويۋ بۇلتتارى اعارىپ، اپپاق شۇكەگە اينالىپ، قالىقتاپ شىڭ باسىنداعى قارعا قاراي باياۋ جىلجىپ بارا جاتقانىن كوردىك.

وركەنىڭ ءوسسىن، ديماش ۇل!

قوسىمشا: تۇسىمىزدان ءوتىپ بارا جاتقان ديماش ۇل سالەم بەرگەندە، ءجۇرسىن اعا الدە نەنى ەسىنە الىپ، ويلانىپ قالعانىن الەۋمەتتىك جەلىدەن بايقادىڭىزدار. ديماشتى كورگەندە جاپا-تارماعاي تەلەفونىن كولدەنەڭ ۇستاعان جۇرت تىنا قالعاندا، جۇكەڭ سۇراۋلى جۇزىمە قاراپ ءسال جىميىپ ءسوز باستادى.

— ديماشتىڭ استاناداعى تۇڭعىش كونتسەرتىندە ءاسانالى ەكەۋمىز «لۋدجادا» وتىر ەدىك، يمانعالي كىرىپ كەلدى. قاسىندا يگور بار ەكەن، تانىستىرىپ جاتىر. مەن سالەمىن ەلەۋسىز العان كەيىپتە ءبىزدىڭ بالا بولماسا، سەنىڭ «كرۋتوي» تۇگىڭ دە جوق ەكەن دەدىم،— دەپ جىميدى.

ءجۇرسىن اعا جالپىلداپ امانداسىپ، بالپىلداپ باتا بەرەتىن ديۋانا ءراۋىشتى شال ەمەس. ەسەسىنە تمد-نىڭ يگور كرۋتويىنا: «ءبىزدىڭ ۇلدىڭ قاسىندا ەشكىم ەمەسسىڭ»، - دەيتىن ادام. باتا بەرمەدى دەي مە؟! ودان ونداي كەيىپ كۇتپەڭدەر.

ورەل — وسكەمەن — الماتى

الماس احمەتبەكۇلى

Abai.kz