سايلاۋالدى باعدارلامالارى – قۇر جاي عانا ۋادەلەر جيناعى ەمەستىگى امبەگە ايان.

سوندىقتان ايتۋلى دودادا باعىن سىناپ جاتقان ءار پارتيانىڭ ءوز قۇرىلتايىندا بەكىتىلگەن قۇجاتتان ونىڭ قوعامعا قانداي كوزقاراس ۇسىنعانىن، قانداي الەۋمەتتىك توپقا سۇيەنگەنىن جانە بيلىككە كەلگەن جاعدايدا قاي باعىتقا باسىمدىق بەرەتىنىن بەيمارال اڭعارۋعا بولادى. ءبىرى جۇيەنى ىشتەن جاڭعىرتۋدى كوزدەدى. ەكىنشىسى ەكونوميكانى مەملەكەتتەن «بوساتۋعا» ۇمتىلدى. ءۇشىنشىسى اۋىلدىڭ جوعىن جوقتادى. ال كەي پارتيا الەۋمەتتىك ادىلەتتىلىك، ەكولوگيا مەن ساياسي باسەكەنى نەگىزگى ۇران ەتىپ اتويلايدى.

سول سەبەپتى پارتيا باعدارلامالارىن تەك «كىم نە ۋادە ەتتى؟» دەگەن سۇراقپەن باعالاۋ جەتكىلىكسىز. نەگىزگى ماسەلە – ءار پارتيا ەلدىڭ پروبلەماسىن قايدان كوردى جانە ونى قانداي جولمەن شەشپەك بولدى؟ بار گاپ وسىندا!؟

«ادىلەت»: وزگەرىستى باسقارۋ

«ادىلەت» پارتياسىنىڭ قۇرىلتايدا بەكىتىلگەن باعدارلاماسىنان مەملەكەتتىك باسقارۋ مەن جۇيەلى رەفورمالارعا باسىمدىق بەرىلگەنى بايقالدى. پارتيا ەلدەگى وزگەرىستەردى كۇرت ساياسي بۇرىلىس ارقىلى ەمەس، كەزەڭ-كەزەڭىمەن جۇزەگە اساتىن مەملەكەتتىك ساياسات رەتىندە ۇسىندى.

بۇل – پارتيانىڭ نەگىزگى ساياسي ماقساتىن دا ايقىندايدى. «Amanat» ءوزىن قوعام مەن بيلىك اراسىنداعى نەگىزگى ساياسي ارنا رەتىندە كورسەتتى. ياعني پارتيانىڭ ۇستانىمى – وزگەرىس كەرەك، بىراق ول جۇيەنى شايقالتپاي، باسقارىلاتىن تۇردە جۇزەگە اسۋى ءتيىس دەگەنگە سايادى.

«ادىلەت» ءۇشىن باستى ماسەلە – مەملەكەتتىڭ جۇمىس ىستەۋ ساپاسى. الەۋمەتتىك جاعداي، ينفراقۇرىلىم جانە حالىقتىڭ ءال-اۋقاتى مەملەكەتتىك باسقارۋدىڭ تيىمدىلىگىمەن تىكەلەي بايلانىستىرىلدى.

«اق جول»: مەملەكەت از ارالاسسىن، ەكونوميكا كوپ جۇمىس ىستەسىن!

«اق جول» پارتياسىنىڭ باعدارلاماسى ەكونوميكالىق ەركىندىك پەن كاسىپكەرلىككە كوبىرەك سەنىم ارتتى.

پارتيانىڭ نەگىزگى ماقساتى – مەملەكەتتىڭ ەكونوميكاعا شامادان تىس ارالاسۋىن شەكتەۋ، باسەكەنى كۇشەيتۋ جانە ۇلتتىق بيزنەستىڭ مۇمكىندىگىن كەڭەيتۋ. «اق جولدىڭ» ساياسي ۇستانىمى ايقىن: مەملەكەت بيزنەسكە كەدەرگى ەمەس، مۇمكىندىك جاساۋى كەرەك!

وسى تۇستا پارتيانىڭ «ادىلەتتەن» ايىرماشىلىعى كورىنەدى. «اق جول» ەكونوميكالىق ەركىندىكتى نەگىزگى شەشىم رەتىندە قاراستىردى.

«اۋىل»: اۋىلدى سايلاۋ الدىندا عانا ەسكە الماۋ

«اۋىل» پارتياسى اۋىل شارۋاشىلىعى مەن اۋىلدىق اۋماقتاردىڭ ماسەلەسىن ۇلتتىق كۇن ءتارتىبىنىڭ ورتاسىنا شىعارۋعا تىرىستى. پارتيا ءۇشىن اۋىل – تەك اگرارلىق سەكتور ەمەس. اۋىل ماسەلەسى دەموگرافيامەن، جۇمىسپەن قامتۋمەن جانە الەۋمەتتىك تۇراقتىلىقپەن تىكەلەي بايلانىستى. سوندىقتان «اۋىلدىڭ» نەگىزگى ماقساتى – اۋىلدى ەل دامۋىنىڭ شەتكى ماسەلەسى ەمەس، ستراتەگيالىق باسىمدىعى رەتىندە كورسەتۋ.

«قازاقستان حالىق پارتياسى»: حالىق ەكونوميكانىڭ «ەسەبىن» سەزىنە مە؟

«قازاقستان حالىق پارتياسى» الەۋمەتتىك ادىلەتتىلىك پەن حالىقتىڭ تۇرمىس دەڭگەيىنە باسىمدىق بەردى. پارتيا ءۇشىن ەكونوميكالىق ءوسىمنىڭ ءوزى جەتكىلىكسىز. ەڭ ماڭىزدىسى – ونىڭ ناتيجەسى قاراپايىم ازاماتتىڭ ومىرىنە اسەر ەتۋى. سوندىقتان پارتيانىڭ نەگىزگى ساياسي ماقساتىن الەۋمەتتىك تەڭسىزدىكتى ازايتۋ جانە مەملەكەتتىڭ ازامات الدىنداعى جاۋاپكەرشىلىگىن كۇشەيتۋ دەپ تۇسىندىرۋگە بولادى.

«RESPUBLICA»: ساياساتقا جاڭا بۋىننىڭ كەلۋى

«Respublica» پارتياسى ءوزىن جاڭا بۋىننىڭ، كاسىپكەرلەردىڭ جانە زاماناۋي ەكونوميكالىق ويلاۋدىڭ وكىلى رەتىندە تانىتۋعا تىرىستى. پارتيانىڭ باعدارلاماسىندا باسقارۋ ساپاسى، جاڭا ەكونوميكا جانە كاسىپكەرلىككە جاعداي جاساۋ ماسەلەلەرى الدىڭعى ورىنعا شىقتى. «Respublica-نىڭ» نەگىزگى ساياسي ماقساتى – مەملەكەتتىڭ بارلىق ماسەلەنى ءوزى شەشەتىن مودەلىنەن باس تارتىپ، قوعام مەن بيزنەستىڭ بەلسەندىلىگىن ارتتىرۋ.

«بايتاق»: ەكولوگيانى ساياساتتىڭ شەتىنە ىسىرىپ قويۋعا بولمايدى

«بايتاق» پارتياسى ەكولوگيالىق ماسەلەلەردى ساياسي باعدارلامانىڭ وزەگىنە شىعاردى. قازاقستاندا ەكولوگيا كوبىنە جەكەلەگەن وڭىرلەردىڭ پروبلەماسى رەتىندە قاراستىرىلىپ كەلدى. «بايتاق» بۇل ماسەلەنى ۇلتتىق دەڭگەيگە كوتەرۋگە تىرىستى.

پارتيانىڭ نەگىزگى ماقساتى – ەكونوميكالىق دامۋ مەن قورشاعان ورتانى قورعاۋ اراسىنداعى تەپە-تەڭدىكتى قالىپتاستىرۋ.

«جسدپ»: جۇيەگە سۇراق قويعان پارتيا

«جالپىۇلتتىق سوتسيال-دەموكراتيالىق پارتيا» الەۋمەتتىك ادىلەتتىلىك پەن ساياسي وزگەرىس ماسەلەسىن العا شىعاردى. پارتيا ءوزىن ساياسي بالاما ىزدەيتىن ازاماتتاردىڭ وكىلى رەتىندە كورسەتۋگە ۇمتىلدى. ونىڭ باعدارلاماسىندا الەۋمەتتىك ساياساتپەن قاتار ازاماتتىق قۇقىقتار مەن ساياسي باسەكە ماسەلەلەرى دە ماڭىزدى ورىن الدى.

«جسدپ-نىڭ» نەگىزگى ەرەكشەلىگى – ساياسي جۇيەگە سىني كوزقاراس ۇسىنۋى.

جەتى پارتيانىڭ ورتاق ءسوزى – حالىق. بىراق ساياسي ماقساتى بولەك!

پارتيالاردىڭ قۇرىلتايىندا بەكىتىلگەن باعدارلامالاردى سالىستىرعاندا، ولاردىڭ ءبارى دەرلىك حالىقتىڭ ءال-اۋقاتى مەن ەلدىڭ دامۋىن ءسوز ەتتى. الايدا ءار پارتيا بۇل ماقساتقا جەتۋدىڭ جولىن ءارتۇرلى ءتۇسىندى.

«ادىلەت» – جۇيەلى مەملەكەتتىك وزگەرىستى; «اق جول» – ەكونوميكالىق ەركىندىكتى; «اۋىل» – اۋىلدىڭ دامۋىن; «قازاقستان حالىق پارتياسى» – الەۋمەتتىك ادىلەتتىلىكتى; «Respublica» – جاڭا ەكونوميكانى; «بايتاق» – ەكولوگيالىق قاۋىپسىزدىكتى; «جسدپ» – ساياسي باسەكەنى نەگىزگى باسىمدىق رەتىندە تاڭدادى.

وسى ايىرماشىلىقتاردىڭ ءوزى پارتيالاردىڭ ساياسي تابيعاتىن اشىپ بەرەدى. ءبىرى مەملەكەتكە كوبىرەك سەندى. ەكىنشىسى نارىققا سۇيەندى. ءۇشىنشىسى اۋىلدىڭ ماسەلەسىن العا شىعاردى. تاعى ءبىرى قوعامداعى الەۋمەتتىك تەڭسىزدىككە نازار اۋداردى. ال ەكولوگيا مەن ساياسي باسەكە جەكە پارتيالاردىڭ نەگىزگى ساياسي نىساناسىنا اينالدى.

شىن مانىندە، پارتيالاردىڭ سايلاۋالدى باعدارلامالارى – ەلدىڭ بولاشاعى تۋرالى جەتى ءتۇرلى كوزقاراستىڭ كورىنىسى. ءبىر ەل، ءبىر قوعام، بىراق ونى دامىتۋدىڭ جەتى ءتۇرلى جولى ۇسىنىلدى. سايلاۋدىڭ ساياسي سالماعى دا ءدال وسى تاڭداۋدان كورىنەدى.

Abai.kz