ءبىر كەلى تەمىردىڭ قۇنى ونىڭ سالماعىمەن ەمەس، وعان قوسىلعان اقىل، ەڭبەك جانە تەحنولوگيامەن ولشەنەدى. شيكىزات كۇيىندە ءجۇز دوللار تۇراتىن مەتالل كۇردەلى وندىرىستەن وتكەن سايىن باعاسى ميلليونداعان دوللارعا دەيىن كوتەرىلۋى مۇمكىن.

تەمىردەن تاعا جاسالسا، ونىڭ قۇنى بىرنەشە ەسە وسەدى. ينە، ساعاتتىڭ سەرىپپەسى مەن تەتىگىنە اينالسا، باعاسى مىڭداعان ەسە ارتادى. ال اسا ءدال لازەرلىك قۇرىلعىنىڭ بولشەگى جاسالسا، قاراپايىم مەتالل جوعارى تەحنولوگيالىق ونىمگە اينالادى.

قازاقستاننىڭ باستى ەكونوميكالىق ساباعى دا وسىندا جاتىر. ءبىز مۇناي، گاز، ۋران، مىس، تەمىر، حروم مەن سيرەك مەتالدارعا باي ەلمىز. بىراق تابيعي بايلىقتى جەر استىنان قازىپ الىپ، سول كۇيىندە سىرتقا جونەلتۋ ارقىلى ونىڭ ەڭ ۇلكەن پايداسىن وزگە مەملەكەتتەرگە قالدىرىپ كەلەمىز.

مۇنايدى تەك شيكى كۇيىندە ساتپاي، ودان جانارماي، پوليمەر، پلاستماسسا، سينتەتيكالىق تالشىق جانە حيميالىق ءونىم شىعارساق، تابىس بىرنەشە ەسە كوبەيەدى. مىستان كابەل، ەلەكترونيكا بولشەكتەرى مەن ەلەكتر جابدىعىن وندىرۋگە بولادى. تەمىر مەن بولاتتان تەحنيكا، قوزعالتقىش، ۆاگون جانە كۇردەلى وندىرىستىك قۇرال جاساۋعا مۇمكىندىك بار.

شيكىزات ساتۋ جىلدام پايدا اكەلگەنىمەن، ەلدى ۇزاق مەرزىمدى بايلىققا جەتكىزە بەرمەيدى. ناعىز ءوسىم كەننىڭ وزىندە ەمەس، ونى وڭدەيتىن زاۋىتتا، جاڭا تەحنولوگيادا جانە بىلىكتى ماماننىڭ قولىندا قالىپتاسادى. ءبىر توننا مەتالدان قانشا ءونىم شىعارىلعانى مەملەكەتتىڭ وندىرىستىك قۋاتىن كورسەتەدى.

قازاقستانعا جەر قويناۋىن ماقتان ەتۋمەن شەكتەلمەي، سول بايلىقتى قىمبات تاۋارعا اينالدىراتىن ەكونوميكا قاجەت. سوندا مۇناي باعاسىنا قاراپ الاڭدامايتىن، مەتالىن ارزانعا بەرمەيتىن، ءوز تەحنولوگياسىن ەكسپورتتايتىن ەلگە اينالامىز. تابيعي رەسۋرس مەملەكەتتى ۋاقىتشا بايىتادى، ال تەرەڭ وڭدەۋ مەن ءبىلىم ۇلتتى ۇزاق ۋاقىت اسىرايدى.

نۇرلان جۇماقانوۆ

Abai.kz