بۇگىن ساعات 18:00-دەن كەيىن سايلاۋ الدىنداعى ۇگىت كەزەڭى باستالادى جانە 22 تامىز ساعات 00:00-دە اياقتالادى.

اعىمداعى سايلاۋ ناۋقانىندا سايلاۋ الدىنداعى ۇگىتكە قاتىستى زاڭنامالىق جاڭاشىلدىقتار تۋرالى بۇگىن ورتالىق سايلاۋ كوميسسياسىنىڭ وتىرىسىندا وسك مۇشەسى ءلاززات سۇيىندىك باياندادى.

ول جاڭاشىلدىقتاردىڭ ءبىرى رەتىندە داۋىس بەرۋ كۇنى تولتىرىلعان سايلاۋ بيۋللەتەنىن فوتو جانە بەينەجازباعا تۇسىرۋگە, سونداي-اق ونى تاراتۋعا تىيىم سالىنعانىن اتاپ ءوتتى. سونىمەن قاتار، اعىمداعى سايلاۋ ناۋقانى ءۇشىن دايىندالماعان ۇگىت ماتەريالدارىن پايدالانۋعا دا تىيىم سالىناتىنىن ايتتى.

«داۋىس بەرۋ كۇنى تولتىرىلعان سايلاۋ بيۋللەتەنىن فوتوجازباجانە بەينەجازباعا تۇسىرۋگە، سونداي-اق ونى تاراتۋعا تىيىم سالىنادى. بۇل نورما ساياسي پارتيالاردى جاريا تۇردە قولداۋدى كورسەتۋگە جول بەرمەۋگە باعىتتالعان جانە ەركىن ءارى جاسىرىن داۋىس بەرۋدى، سايلاۋ پروتسەسىنە قاتىسۋشىلاردىڭ بارلىعى ءۇشىن تەڭ جاعدايلاردى، سونداي-اق سايلاۋشىلاردىڭ ەركىن ەرىك ءبىلدىرۋىن قامتاماسىز ەتۋگە ارنالعان. سونىمەن قاتار، شارتتىق نەگىزدە ۇگىت ماتەريالدارىن ورنالاستىرۋ تۋرالى تالاپ وزدەرىنىڭ ينتەرنەت-رەسۋرستارى مەن ونلاين-پلاتفورمالارداعى اككاۋنتتارىن پايدالاناتىن ساياسي پارتيالار مەن كانديداتتارعا قولدانىلمايدى. بۇدان بولەك، ۇگىت ماتەريالدارىنا قويىلاتىن قوسىمشا تالاپتار ەنگىزىلدى. اتاپ ايتقاندا، بۇرىننان قولدانىستا بولعان قازاقستان رەسپۋبليكاسىنىڭ اۋماعىنان تىس جەردە ۇگىت ماتەريالدارىن دايىنداۋعا جانە جاسىرىن ۇگىت ماتەريالدارىن تاراتۋعا تىيىم سالۋمەن قاتار، ەندى اعىمداعى سايلاۋ ناۋقانى ءۇشىن دايىندالماعان ۇگىت ماتەريالدارىن پايدالانۋعا دا تىيىم سالىندى»، – دەپ اتاپ ءوتتى ءلاززات سۇيىندىك.

كوميسسيا مۇشەسى سونداي-اق سايلاۋ ناۋقانىن بۇقارالىق اقپارات قۇرالدارىندا وبەكتيۆتى تۇردە جاريا ەتۋدىڭ ماڭىزدىلىعىن اتاپ ءوتتى. ول كانديداتتىڭ نەمەسە ساياسي پارتيانىڭ ار-نامىسىنا، قادىر-قاسيەتىنە جانە ىسكەرلىك بەدەلىنە كورىنەۋ نۇقسان كەلتىرەتىن ۇگىت ماتەريالدارىن جاريالاۋدان باس تارتۋعا، سونداي-اق ولارعا تەرىسكە شىعارۋ حابارلارى مەن ماتەريالدارىن ءدال سونداي كولەمدە تەگىن جاريالاۋ مۇمكىندىگىن قامتاماسىز ەتۋگە شاقىردى.

«سايلاۋ ناۋقانىنا دايىندىق شەڭبەرىندە ورتالىق سايلاۋ كوميسسياسى سايلاۋ پروتسەسىنە قاتىسۋشىلاردىڭ بارلىعى ءۇشىن ءتۇسىندىرۋ جۇمىستارىن جۇيەلى تۇردە جۇرگىزىپ كەلەدى. اتاپ ايتقاندا، 3 شىلدەدە ساياسي پارتيالاردىڭ وكىلدەرى ءۇشىن، ال 22 شىلدەدە بۇقارالىق اقپارات قۇرالدارىنىڭ وكىلدەرى ءۇشىن قۇرىلتاي دەپۋتاتتارىنىڭ سايلاۋىن دايىنداۋ جانە وتكىزۋ ماسەلەلەرى بويىنشا سەمينارلار ۇيىمداستىرىلدى. ءسوزىمدى قورىتىندىلاي كەلە، سايلاۋ كۇنى جانە ونىڭ الدىنداعى كۇنى كەز كەلگەن سايلاۋالدىنداعى ۇگىت جۇرگىزۋگە تىيىم سالىناتىنىن تاعى دا ەسكە سالعىم كەلەدى. سونداي-اق داۋىس بەرۋ كۇنىنىڭ الدىنداعى بەس كۇن ىشىندە جانە داۋىس بەرۋ كۇنى بۇقارالىق اقپارات قۇرالدارىندا جانە ونلاين-پلاتفورمالاردا قوعامدىق پىكىرگە ساۋال سالۋ ناتيجەلەرىن، سايلاۋ ناتيجەلەرىنە قاتىستى بولجامداردى، سايلاۋعا بايلانىستى وزگە دە زەرتتەۋلەردىڭ ناتيجەلەرىن، سونداي-اق كانديداتتاردى نەمەسە ساياسي پارتيالاردى قولداۋعا ارنالعان داۋىس بەرۋ ناتيجەلەرىن جاريالاۋعا جول بەرىلمەيدى»، - دەپ ەسكە سالدى ورتالىق سايلاۋ كوميسسياسىنىڭ مۇشەسى.

Abai.kz