قازاقستاندا پايدالانىلماي جاتقان جانە زاڭ تالاپتارىنا سايكەس كەلمەيتىن 1 ملن گەكتاردان استام اۋىل شارۋاشىلىعى ماقساتىنداعى جەر مەملەكەت مەنشىگىنە قايتارىلدى.

قر اۋىل شارۋاشىلىعى مينيسترلىگىنىڭ جەر رەسۋرستارىن باسقارۋ كوميتەتى بيىل نىسانالى ماقساتى بويىنشا يگەرىلمەگەن نەمەسە جەر زاڭناماسى تالاپتارى بۇزىلعان 1 ملن گەكتار جەردى قايتارۋدى جوسپارلاعان. ۆەدومستۆونىڭ مالىمەتىنشە، بۇل جوسپار تولىق ورىندالدى.

— جەردى مەملەكەت مەنشىگىنە قايتارۋ جۇمىستارى پايدالانىلماي جاتقان اۋىل شارۋاشىلىعى القاپتارىن انىقتاۋ جانە جەردى ءتيىمدى پايدالانۋ ماقساتىندا جۇرگىزىلىپ جاتىر. قايتارىلعان جەرلەردى قايتادان شارۋاشىلىق اينالىمىنا ەنگىزۋ، جەر رەسۋرستارىن ۇتىمدى پايدالانۋ جانە مەملەكەتتىك باقىلاۋدى كۇشەيتۋ كوزدەلىپ وتىر، — دەلىنگەن حابارلامادا.

جەر زاڭناماسىنىڭ ساقتالۋىن قامتاماسىز ەتۋ باعىتىنداعى جۇمىستار الداعى ۋاقىتتا دا جالعاسادى.

ايتا كەتەيىك، 2022 جىلدان بەرى قازاقستاندا جالپى كولەمى 15,4 ملن گەكتار جەر مەملەكەت مەنشىگىنە قايتارىلعان.

ەسكە سالايىق، بۇعان دەيىن الماتىدا بۇرىنعى تەمىرجول اۋرۋحاناسى مەن جەر ۋچاسكەلەرى مەملەكەتكە قايتارىلعانىن حابارلاعانبىز.

Abai.kz