استانا قالاسىندا قارجى پيراميداسىن قۇرىپ، الاياقتىق جاساعان ۇيىمداسقان قىلمىستىق توپتىڭ قاتىسۋشىلارىنا قاتىستى ايىپتاۋ ۇكىمى شىعارىلدى.

سوتتا قىلمىستىق توپ قۇرامىندا 10-نان استام ادامنىڭ بولعانى جانە ولاردىڭ ارقايسىسىنىڭ ءوزارا ناقتى بولىنگەن مىندەتتەرى بولعانى انىقتالدى.

قالالىق پروكۋراتۋرا مالىمەتىنشە، توپ مۇشەلەرى ازاماتتاردى 1 ملن تەڭگەدەن 2 ملن تەڭگەگە دەيىن اقشالاي سىياقى تولەنەتىنىنە سەندىرىپ، اۆتوكرەديت راسىمدەۋگە كوندىرگەن. سونىمەن قاتار نەسيە بويىنشا مىندەتتەمەلەردى وزدەرى وتەيتىنىنە ۋادە ەتكەن. الىنعان اۆتوكولىكتەر زاڭسىز ساتىلىپ، ولاردىڭ ءبىر بولىگى قازاقستان رەسپۋبليكاسىنىڭ اۋماعىنان تىس جەرلەرگە شىعارىلعان.

قىلمىستىق ارەكەتتەردىڭ سالدارىنان 100-دەن استام ازامات جابىرلەنۋشى دەپ تانىلىپ، بارلىعى 165 اۆتوكولىك راسىمدەلگەن.

سوت ۇكىمىمەن كىنالىلەر ۇيىمداسقان قىلمىستىق توپتى قۇرعانى جانە وعان باسشىلىق جاساعانى، قارجى پيراميداسىن قۇرعانى جانە وعان باسشىلىق جاساعانى، سونداي-اق الاياقتىق جاساعانى ءۇشىن كىنالى دەپ تانىلىپ، 5 جىلدان 8 جىلعا دەيىنگى مەرزىمگە باس بوستاندىعىنان ايىرۋ جازاسىنا سوتتالدى.

جابىرلەنۋشىلەردىڭ ازاماتتىق تالاپ-ارىزدارى قاناعاتتاندىرىلدى.

سوت ۇكىمى زاڭدى كۇشىنە ەنگەن جوق.

Abai.kz