قۇرمەتتى ەرجان ساپاربەكۇلى!

مەن ءسىزدىڭ اتىڭىزعا ارنايى حات جازىپ، اتاجۇرتىنا كوشىپ كەلىپ، وسى جىلدىڭ اقپان ايىنان بەرى قاتاڭ اتقارىلا باستاعان «قانداس مارتەبەسىن بەرۋ نەمەسە ۇزارتۋ» مەملەكەتتىك كورسەتىلەتىن قىزمەتتەرى بويىنشا پيلوتتىق جوبانى ىسكە قوسۋ جانە ىسكە اسىرۋ تۋرالى بىرلەسكەن بۇيرىقتىڭ كەسىرىنەن قازاقستان ازاماتتىعىن الا الماي وتىرعان 430 ەتنيكالىق قازاق  وتباسىنىڭ ءتىزىمىن جولداپ وتىرمىن.

ولاردىڭ قۇجاتتانا الماي قالۋىنىڭ سەبەبى بىرەۋ-اق!

ول – اتالعان «بىرلەسكەن بۇيرىقتىڭ» شارتتارىنىڭ زاڭسىزدىعى مەن اۋىرلىعى!!!

قۇرمەتتى ەرجان ساپاربەكۇلى!

ءوزىڭىز جاقسى بىلەسىز، قازىر «زاڭ مەن ءتارتىپ!» قاعيداتى سالتانات قۇرعان زامان!

«بىرلەسكەن بۇيرىقتى» قابىلداتۋعا ىقپال ەتكەندەر ويلاپ قالماسىن، «قانداستار تۋرالى پرەزيدەنتكە جاعىمسىز اقپارات بەرىپ، وسىلاي پيوتتىق جوبا قابىلداپ، اتاجۇرتىنا ورالعان ەتنيكالىق قازاقتاردىڭ قۇجاتتانۋ پروتسەسسىن بارىنشا قيىنداتساق، ۇلى كوش توقتايدى...»، - دەپ!

ەستەرىڭىزدە بولسىن، ۇلى كوش ماڭگى توقتامايدى!

سالىق زيمانوۆ باستاپ، نۇرسۇلتان نازارباەۆ قوستاپ، ۇلى كوشتى سوناۋ تاۋەلسىزدىكتىڭ ءبىرىنشى كۇنى ماڭگىلىككە شەگەلەپ كەتكەن بولاتىن!

«قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىنىڭ (1991 جىلعى 16 جەلتوقساندا قابىلدانعان) 7-بابىندا «قازاقستان رەسپۋبليكاسىنىڭ ءوز ازاماتتىعى بار. باسقا مەملەكەتتەردە تۇراتىن رەسپۋبليكا تەرريتورياسىن تاستاپ شىعۋعا ءماجبۇر بولعان بارلىق قازاقتاردىڭ سول مەملەكەتتەردiڭ ازاماتتىعىمەن بiرگە، ەگەر بۇل ولار ازاماتى بولىپ وتىرعان مەملەكەتتەردىڭ زاڭدارىنا قايشى كەلمەيتiن بولسا، قازاقستان رەسپۋبليكاسىنىڭ ازاماتتىعىن الۋ حۇقى تانىلادى»، - دەپ جازىلعان!

كونستيتۋتسيانى، كونستيتۋتسيالىق زاڭدار مەن زاڭداردى جىلىنا، ايىنا ەمەس، اپتاسىنا، ءتىپتى كۇنىنە وزگەرتە بەرۋگە بولادى.

ال، «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭ (1991 جىلعى 16 جەلتوقساندا قابىلدانعان) ەشقاشان وزگەرمەيدى!

ول – ماڭگىلىك ەلىمىزبەن بىرگە ماڭگى جاسايتىن زاڭ!

كەرەك بولسا، كونستيتۋتسيانىڭ ءوزى وسى «ەگەمەندىك تۋرالى» دەكلاراتسيا مەن وسى «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىنىڭ نەگىزىندە جاسالادى!

اتالعان كونستيتۋتسيالىق زاڭدا تاعى: «قازاقستان رەسپۋبليكاسى كوشi-قون پروتسەستەرiن رەتتەپ وتىرادى. قازاقستان رەسپۋبليكاسى جاپپاي قۋعىن-سۇرگiن، كۇشتەپ ۇجىمداستىرۋ كەزەڭدەرiندە، ادامگەرشiلiككە جات وزگە دە ساياسي شارالار ناتيجەسىندە رەسپۋبليكا تەرريتورياسىنان كەتۋگە ءماجبۇر بولعان ادامدار مەن ولاردىڭ ۇرپاقتارىنىڭ، سونداي-اق بۇرىنعى وداقتاس رەسپۋبليكالار تەرريتورياسىندا تۇراتىن قازاقتاردىڭ ءوز تەرريتورياسىنا قايتىپ ورالۋى ءۇشiن جاعداي جاسايدى» جانە «قازاقستان رەسپۋبليكاسى رەسپۋبليكا شەگiنەن تىس جەرلەردە تۇراتىن قازاقتاردىڭ ۇلتتىق-مادەني، رۋحاني جانە تiلدiك قاجەتتەرىن قاناعاتتاندىرۋعا قامقورلىق جاسايدى، ولار ازاماتى بولىپ وتىرعان مەملەكەتتەرمەن جاسالعان شارتتار نەگiزiندە بۇل ازاماتتاردىڭ مۇددەلەرiن قورعايدى» دەگەن قاسيەتتى نورمالار بار!

قازىر بۇل نورمالاردىڭ بىرەۋى ورىندالىپ جاتقان جوق!

كەرىسىنشە، «بىرلەسكەن بۇيرىق» ارقىلى سىزدەر «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىنىڭ 7- جانە 8-باپتارىن بۇزىپ، اتاجۇرتىنا ورالعان قانداستارىمىزدىڭ قۇقىعىن شەكتەپ تاستادىڭىزدار!

سوندىقتان، اتاجۇرتىنا ورالعان ەتنيكالىق قازاقتاردىڭ قازاقستان رەسپۋبليكاسىنىڭ ازاماتتىعىن الۋىن قۇقىعىن شەكتەۋ – قىلمىس!!!

ادام قۇقىعىن بۇلاي شەكتەۋ تاۋەلسىز قازاقستاننىڭ تاريحىندا بولماعان جاعداي، تەك ستالين زامانىندا بولعان!

ءسىزدىڭ وسى «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا مۇلدە قايشى، ادام قۇقىعىن شەكتەيتىن بىرلەسكەن بۇيرىققا قالاي، نە ءۇشىن قول قويعانىڭىزدى تۇسىنبەي وتىرمىن!

قۇرمەتتى ەرجان ساپاربەكۇلى!

430 وتباسى – از سان ەمەس، مىڭنان استام ادام!

بۇل – مەنىڭ قولىما تۇسكەندەرى عانا!

ال، جالپى قۇجاتتانا الماي وتىرعان اعايىندارىمىزدىڭ سانى بۇدان الدەقايدا كوپ، ەكى-ءۇش ەسە ارتىق بولۋى مۇمكىن.

تىزىمدىككە قاراپ وتىرساق، ولاردىڭ ءبىرازى كوپبالالى وتباسىلار.

وزدەرىنىڭ ايتۋلارىنا قاراعاندا، «قانداس» مارتەبەسىن العاندارى دا جەتەرلىك ەكەن. ءبىر ءبولىمى ۇكىمەت ايقىنداعان وڭىرلەرگە قونىستانعاندار بولىپ شىقتى.

سوعان قاراماستان، ونداي ساناتتاعى وتباسىلار دا قۇجاتتانا الماي وتىر.

كوبىنىڭ ۆيزاسىنىڭ، «قانداس» مارتەبەسىنىڭ جانە وزگە دە قۇجاتتارىنىڭ مەرزىمى ءوتىپ كەتكەن...

قۇرمەتتى ەرجان ساپاربەكۇلى!

سىزگە ءوتىنىش، ەگەر، اتالعان 430 وتباسى سەكىلدى اتاجۇرتىنا ورالىپ، سىزدەر شىعارعان بىرلەسكەن بۇيرىقتىڭ كەسىرىنەن قۇجاتتانا الماي قالعان ەتنيكالىق قازاقتار وسى بەتى قۇجاتتانا الماسا، وندا ولاردىڭ بۇل ماسەلەسىن قالاي شەشۋ كەرەك دەپ ويلايسىز؟!

وسى سۇراققا بايلانىستى، مەنىڭ ءسىزدىڭ ويىڭىز بەن پىكىرىڭىزدى بىلگىم كەلەدى!

ءبىرىنشى، «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا مۇلدە قايشى، ادام قۇقىعىن شەكتەيتىن بىرلەسكەن بۇيرىققا قالاي، نە ءۇشىن قول قويعانىڭىزدى?!

ەكىنشى، ءوزىڭىز قول قويعان «بىرلەسكەن بۇيرىقتىڭ» كۇشىن جويىپ، قانداستارىمىزدى بۇرىنعى تارتىپپەن قۇجاتتاندىرسىز با، الدە، سەرگەلدەڭگە سالماي، كەلگەن ەلدەرىنە كەرى قايتاسىز با؟!!

قالاي بولسا دا، ءسىزدىڭ تەز شەشىم قابىلداۋىڭىزدى تالاپ ەتەمىن!

سونداي-اق، قارامەن بويالىپ، استى سىزىلعان ەكى سۇراققا، سەبەبىن تۇسىندىرە وتىرىپ، ءوز اتىڭىزدان ناقتى جاۋاپ بەرۋىڭىزدى وتىنەمىن!!

سونىمەن بىرگە، وسىمەن ءتورتىنشى مارتە سۇرانىپ جاتىرمىن، مەنى ءوزىڭىزدىڭ جەكە قابىلداۋىڭىزدى سۇرايمىن!!!

ەسكەرتۋ: 430 وتباسىنىڭ ءتىزىمى قوسا تىركەلدى.

قۇرمەتپەن، اۋىت مۇقيبەك,

Abai.kz