«وتباسى بانك» باسقارما توراعاسى ءلاززات يبراگيموۆا تۇرعىن ءۇي كەزەگىن زاڭسىز جىلجىتۋ بويىنشا جەمقورلىق فاكتىلەرى تۋرالى تىلشىلەر سۇراعىنا جاۋاپ بەردى. 

ونىڭ سوزىنشە، بۇل — 2025 جىلدىڭ ءساۋىر-مامىر ايلارىندا تىركەلگەن ءبىر رەتتىك جاعداي.

— بۇل ءبىر عانا وقيعا بولدى. ازامات تۇرعىن ءۇي كەزەگىندە تۇرعان، الايدا جەڭىلدىگى جوعارى ساناتقا ءوتۋ ءۇشىن ءوز ساناتىن «مۇگەدەكتىگى بار بالا تاربيەلەپ وتىرعان وتباسى» رەتىندە وزگەرتكەن، — دەدى ءلاززات يبراگيموۆا ۇكىمەتتە وتكەن بريفينگتە.

بانك توراعاسىنىڭ ايتۋىنشا، اتالعان جاعداي 2025 جىلعى تامىزدا جاڭا اقپاراتتىق جۇيە ىسكە قوسىلعانعا دەيىن بولعان.

— ءبىز بۇدان ۇلكەن ساباق الدىق. تسيفرلاندىرۋ كەزىندە ءاربىر ارەكەتتىڭ تسيفرلىق ءىزى ساقتالۋى وتە ماڭىزدى ەكەنىن تۇسىندىك. جۇيەگە كىمنىڭ قانداي لوگينمەن كىرگەنى، قانداي ارەكەت جاساعانى تولىق تىركەلۋى قاجەت، — دەدى ول.

وقيعاعا بانكتىڭ ەكى قىزمەتكەرى — وڭىرلىك فيليالداردىڭ ءبىرىنىڭ مامانى مەن ورتالىق اپپاراتتىڭ بيزنەس-تالداۋشىسى قاتىسقان. وتباسى بانكتىڭ باستاماسىمەن ولاردىڭ ەڭبەك شارتتارى بۇزىلىپ، جۇمىستان شىعارىلعان.

سونداي-اق بانك قىزمەتكەرلەردى قىلمىستىق جاۋاپقا تارتۋ تۋرالى قۇقىق قورعاۋ ورگاندارىنا ارىز جولداعان. قازىر قىلمىستىق ىستەر تىركەلىپ، تەرگەۋ جۇرگىزىلىپ جاتىر.

ءلاززات يبراگيموۆا اتالعان قىزمەتكەرلەردىڭ مەملەكەتتىك فۋنكتسيالاردى ورىنداۋعا ۋاكىلەتتى تۇلعالار قاتارىنا جاتپايتىنىن اتاپ ءوتتى.

— ەشقانداي شىعىن كەلگەن جوق. زاڭسىز بولىنگەن پاتەر نەسيە شارتىن راسىمدەۋ كەزەڭىندە توقتاتىلىپ، قايتارىلدى. كەيىن ول تۇرعىن ءۇيدى ءبولۋ پروتسەسىنە قايتادان قاتىستىرىلدى، — دەدى بانك باسشىسى.

كەشە «وتباسى بانك» قىزمەتكەرلەرى زاڭسىز اقشا الىپ، جالعان قۇجات جاساعانى تۋرالى اقپارات جاريالانعان ەدى.

Abai.kz