15 تامىز كۇنى الماتى قالاسىنىڭ ورتالىق ستاديونىندا YE كونتسەرتى وتەدى. كورەرمەندەردىڭ قاۋىپسىزدىگى مەن جايلى قاتىناۋىن قامتاماسىز ەتۋ ماقساتىندا قالادا جول قوزعالىسىن ۇيىمداستىرۋ جانە قوعامدىق كولىكتىڭ جۇمىسىن كۇشەيتۋ بويىنشا قوسىمشا شارالار قابىلدانادى.

قاۋىپسىزدىك شارالارىن قامتاماسىز ەتۋ ماقساتىندا ساعات 15:30-دان باستاپ ورتالىق ستاديون ماڭىندا كولىك قوزعالىسىنا كەزەڭ-كەزەڭىمەن شەكتەۋ ەنگىزىلەدى. ساتباەۆ كوشەسىنىڭ بايتۇرسىنوۆ كوشەسىنەن بايزاقوۆ كوشەسىنە دەيىنگى بولىگى ۋاقىتشا جابىلادى.

قاۋىپسىزدىك قىزمەتتەرىنىڭ شەشىمىمەن ستاديونعا جاقىن ورنالاسقان جولداردىڭ جەكەلەگەن ۋچاسكەلەرى دە ۋاقىتشا جابىلۋى مۇمكىن. بۇل رەتتە اباي داڭعىلى بويىنداعى قوعامدىق كولىك قالىپتى رەجيمدە قاتىناي بەرەدى.

كولىك اعىندارىن رەتتەۋ جانە جول كەپتەلىستەرىنىڭ الدىن الۋ ءۇشىن وقيعا ورنىندا پوليتسيا دەپارتامەنتىنىڭ قىزمەتكەرلەرى كەزەكشىلىك اتقارادى.

كونتسەرت اياقتالعاننان كەيىن كورەرمەندەردى قالانىڭ التى باعىتى بويىنشا 60 تەگىن شاتتل تاسىمالدايدى. اۆتوبۋستار ورتالىق ستاديوننان الماتى ارەناعا، «الاتاۋ» مەترو ستانتسياسىنا (رايىمبەك باتىر اۋدانى), الماتى-1 تەمىرجول ۆوكزالىنا، وربيتا شاعىناۋدانىنا، جۇلدىز شاعىناۋدانىنا جانە الماتى حالىقارالىق اۋەجايىنا قاتىنايدى.

سونداي-اق قوعامدىق كولىك پەن مەتروپوليتەننىڭ جۇمىسى كۇشەيتىلەدى. «بايقوڭىر» مەترو ستانتسياسى ساعات 21:00-دە جولاۋشىلار ءۇشىن جابىلادى. كونتسەرت قوناقتارىنا «اباي» جانە «مۇحتار اۋەزوۆ اتىنداعى تەاتر» مەترو ستانتسيالارىن پايدالانۋ ۇسىنىلادى. مەترونىڭ جۇمىسى كەمىندە ساعات 01:00-گە دەيىن، قاجەت بولعان جاعدايدا 03:00-گە دەيىن ۇزارتىلادى.

الماتى تۇرعىندارى مەن قالا قوناقتارىنا مارشرۋتتارىن الدىن الا جوسپارلاپ، قوزعالىسقا قويىلاتىن ۋاقىتشا شەكتەۋلەردى ەسكەرىپ، مۇمكىندىگىنشە قوعامدىق كولىكتى پايدالانۋ ۇسىنىلادى.

Abai.kz