«كىتاپ وقيتىن ۇلت» جانە «QAZAQ Creative» قورلارى زيالى قاۋىم وكىلدەرىمەن تاعىلىمدى كەزدەسۋ وتكىزىپ، 1 قىركۇيەكتە باستالاتىن رەسپۋبليكالىق «كىتاپ وقيتىن ۇلت» مارافونىنىڭ جاڭا كەزەڭىنە دايىندىق بارىسىن تالقىلادى. بيىلعى جوبا 1 ميلليوننان استام ازاماتتى قامتۋدى كوزدەيدى.

مەملەكەت باسشىسىنىڭ كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى تاپسىرمالارىن جۇزەگە اسىرۋعا باعىتتالعان «كىتاپ وقيتىن ۇلت» مارافونىنىڭ باستى ماقساتى – ازاماتتاردى كىتاپ وقۋعا كەڭىنەن تارتۋ عانا ەمەس، وقۋ مادەنيەتىن قوعامنىڭ كۇندەلىكتى ءومىر سالتىنا اينالدىرۋ.

جوبا داستۇرىنە ساي، اۋقىمدى باستامانىڭ جاڭا كەزەڭى اعا بۋىن وكىلدەرىنىڭ اق باتاسىمەن باستالدى. ۇيىمداستىرۋشىلار زيالى قاۋىم وكىلدەرىمەن كەزدەسىپ، جوبانىڭ الداعى مىندەتتەرى مەن دامۋ باعىتتارىن ورتاعا سالدى.

«قازاق داستۇرىندە قانداي دا ءبىر ۇلكەن ءىستى باستاردا اعا بۋىننىڭ اق باتاسىن الۋ – تاعىلىمى تەرەڭ جول. بۇل – ۇلكەندەردىڭ ومىرلىك تاجىريبەسى مەن ىزگى تىلەگىن كەيىنگى بۋىنعا امانات ەتۋدىڭ ءبىر كورىنىسى. سوندىقتان ءبىز «كىتاپ وقيتىن ۇلت» سياقتى ەلدىڭ رۋحاني دامۋىنا باعىتتالعان اۋقىمدى جوبانى باستار الدىندا زيالى قاۋىم وكىلدەرىنە ارنايى جولىعىپ، اق باتاسىن الۋدى ءجون كوردىك. اعا بۋىننىڭ اق تىلەگى بىزگە ۇلكەن جاۋاپكەرشىلىك جۇكتەپ قانا قويماي، الداعى جۇمىستى ابىرويمەن اتقارۋعا جىگەر بەرەدى», – دەدى «كىتاپ وقيتىن ۇلت» قوعامدىق قورىنىڭ توراعاسى باقىتجان تۇرلىبەكوۆ.

كەزدەسۋگە جازۋشىلار، اقىندار، جۋرناليستەر مەن قوعام قايراتكەرلەرى قاتىستى. ولاردىڭ قاتارىندا الىبەك اسقاروۆ، ءشاربانۋ بەيسەنوۆا، قۋاندىق جيەنباي، بايانعالي ءالىمجانوۆ، ابۋباكىر سمايىل، وڭايگۇل تۇرجان، جانات اسكەربەكقىزى، باۋىرجان باباجانۇلى، جاناربەك ءاشىمجان، مۇحاربەك جاكەيۇلى، ۇلاربەك دالەيۇلى، قانات ابىلقايىر، باتىربولات ايتبولاتۇلى، اسقار التاي بار.

جيىن بارىسىندا جوبانى جۇزەگە اسىرۋدىڭ ناقتى تەتىكتەرى تالقىلانىپ، وسى جىلدىڭ 31 ناۋرىزىندا وتكەن الدىڭعى كەزدەسۋدە ايتىلعان ۇسىنىستاردىڭ ورىندالۋ بارىسى بويىنشا ەسەپ بەرىلدى.

زيالى قاۋىم وكىلدەرى جوبانىڭ بۇگىنگى ناتيجەلەرىنە جوعارى باعا بەرىپ، كىتاپ وقۋ مادەنيەتىن قالىپتاستىرۋ، ۇلتتىق سانانى جاڭعىرتۋ جانە زەردەلى ۇلت قالىپتاستىرۋ جولىنداعى ورتاق ءىستىڭ ماڭىزدىلىعىن اتاپ ءوتتى.

جازۋشى الىبەك اسقاروۆ جوباعا اقجولتاي تىلەگىن ءبىلدىردى. «كىتاپ وقۋ – ۇلتتىڭ رۋحاني قۋاتىن ارتتىراتىن ۇلكەن قۇندىلىق. وسىنداي يگى باستامانىڭ اۋقىمى كەڭەيىپ، ەل كولەمىندە جالعاسىن تابۋىنا تىلەكتەسپىن. «كىتاپ وقيتىن ۇلت» مارافونىنا ساتتىلىك تىلەيمىن. كىتاپقا بەت بۇرعان ءار ازاماتتىڭ وي-ءورىسى كەڭەيىپ، ەلىمىزدىڭ زەردەلى ۇرپاعى كوبەيە بەرسىن», – دەدى جازۋشى.

ۇيىمداستىرۋشىلاردىڭ ايتۋىنشا، مارافوننىڭ باستى كورسەتكىشى – قاتىسۋشىلاردىڭ سانى عانا ەمەس. نەگىزگى ماقسات – كىتاپتى ادامنىڭ كۇندەلىكتى ءومىرىنىڭ اجىراماس بولىگىنە اينالدىرىپ، وقۋ ارقىلى ويلايتىن، ىزدەنەتىن، زەردەلى قوعام قالىپتاستىرۋ.

​«كىتاپ وقيتىن ۇلت» رەسپۋبليكالىق مارافونى – كىتاپ وقۋ مادەنيەتىن دامىتۋعا باعىتتالعان ورتاق ىسكە بىرقاتار ماڭىزدى سەرىكتەستى بىرىكتىرىپ وتىرعان اۋقىمدى باستاما.

جوبانى ىسكە اسىرۋعا قازاقستان جازۋشىلار وداعى, كرەاتيۆتى يندۋستريالاردى دامىتۋ قورى جانە Yandex Qazaqstan تەحنولوگيالىق كومپانياسى «ياندەكس كىتاپتار» سەرۆيسىمەن بىرلەسىپ قاتىسۋدا. سەرىكتەستەردىڭ بىرلەسكەن جۇمىسى وقۋ مادەنيەتىن ىلگەرىلەتۋگە، زاماناۋي ادەبي باستامالاردى قولداۋعا جانە وقىرمان مەن كىتاپ اراسىنداعى بايلانىستىڭ جاڭا مۇمكىندىكتەرىن قالىپتاستىرۋعا باعىتتالعان.

جوبا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلۋدا.

Abai.kz