ورتالىق سايلاۋ كوميسسياسىنىڭ مۇشەسى ءلاززات سۇيىندىك داۋىس بەرۋ قارساڭىندا جانە داۋىس بەرۋ كۇنى ساقتالۋى ءتيىس نەگىزگى ەرەجەلەر تۋرالى ايتىپ بەردى.

22 تامىز - تىنىشتىق كۇنى. بۇل كۇنى جانە داۋىس بەرۋ كۇنى سايلاۋ الدىنداعى ۇگىت جۇرگىزۋگە تىيىم سالىنادى. بۇعان دەيىن ورنالاستىرىلعان ۇگىت ماتەريالدارى، سونىڭ ىشىندە ينتەرنەتتەگى ماتەريالدار، بۇرىنعى ورىندارىندا قالا بەرەدى. الايدا ولاردى ينتەرنەت-رەسۋرستاردىڭ باستى بەتتەرىندە قايتا ورنالاستىرۋعا بولمايدى.

ساۋالنامالار مەن بولجامداردى جاريالاۋعا قاتىستى دا ارنايى شەكتەۋلەر بەلگىلەنگەن. داۋىس بەرۋگە دەيىنگى بەس كۇن ىشىندە جانە داۋىس بەرۋ كۇنى قوعامدىق پىكىرگە ساۋال سالۋ ناتيجەلەرىن، سايلاۋ ناتيجەلەرىنىڭ بولجامدارىن جانە سايلاۋعا بايلانىستى وزگە دە زەرتتەۋلەردى تاراتۋعا جول بەرىلمەيدى.

بۇل رەتتە داۋىس بەرۋ كۇنى exit poll ساۋالناماسىن تەك داۋىس بەرۋ ءۇي-جايلارىنان تىس جەردە جانە بۇل تۋرالى وسك-نى حاباردار ەتكەن ۇيىمدار عانا جۇرگىزە الادى.

​«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 27-بابىنا سايكەس، داۋىس بەرۋ كۇنى تولتىرىلعان بيۋللەتەننىڭ فوتو جانە (نەمەسە) بەينەتۇسىرىلىمىن جۇزەگە اسىرۋعا جانە ونى تاراتۋعا تىيىم سالىنادى. بۇل رەتتە سايلاۋشىنىڭ سايلاۋ ۋچاسكەسىندە فوتوعا ءتۇسۋ قۇقىعىنا شەكتەۋ قويىلمايدى. سايلاۋشىنىڭ قاي پارتياعا داۋىس بەرگەنى كورىنبەيتىن بولسا، سايلاۋ جاشىگىنىڭ جانىندا نەمەسە بيۋللەتەندى جاشىككە سالۋ كەزىندە دە فوتوعا تۇسۋگە بولادى. داۋىس بەرۋ كۇنىنەن كەيىن مۇنداي ماتەريالداردى تاراتۋعا قاتىستى تىيىم قولدانىلمايدى، ويتكەنى بۇل شەكتەۋ ءدال داۋىس بەرۋ كۇنىنە قاتىستى بەلگىلەنگەن»، – دەپ اتاپ ءوتتى ءلاززات سۇيىندىك.

بايقاۋشىلار مەن بۇقارالىق اقپارات قۇرالدارى وكىلدەرىنىڭ جۇمىسىنا دا ەرەكشە نازار اۋدارىلدى. ولار سايلاۋ ۋچاسكەلەرىندە بولۋعا جانە زاڭنامادا بەلگىلەنگەن وكىلەتتىكتەرى شەگىندە داۋىس بەرۋ بارىسىن باقىلاۋعا قۇقىلى. بۇل رەتتە بايقاۋشىلارعا سايلاۋ جاشىكتەرىن، سونداي-اق جاسىرىن داۋىس بەرۋگە ارنالعان كابينالاردىڭ كىرەتىن جانە شىعاتىن  تۇسىن بايقاۋ مۇمكىندىگى قامتاماسىز ەتىلۋگە ءتيىس.

سايلاۋ پروتسەسىنىڭ بارلىق قاتىسۋشىلارى ۋچاسكەدە بەلگىلەنگەن ءتارتىپتى ساقتاۋعا جانە ازاماتتاردىڭ ەركىن ەرىك بىلدىرۋنە كەدەرگى كەلتىرمەۋگە مىندەتتى.

Abai.kz