بۇگىن، 23 تامىزدا، تاڭعى ساعات 07:00-دە الماتىدا سايلاۋ ۋچاسكەلەرى اشىلدى. العاشقىلاردىڭ ءبىرى بولىپ گوگول كوشەسى، 114 مەكەنجايىنداعى قىزدار ۋنيۆەرسيتەتىنىڭ عيماراتىندا ورنالاسقان №102 سايلاۋ ۋچاسكەسى جۇمىسىن باستادى.

ساعات 07:00-گە قاراي داۋىس بەرۋگە 150-گە جۋىق الماتىلىق كەلدى. تاڭعى ۋاقىت ءارى جەكسەنبى بولعانىنا قاراماستان، ۋچاسكە الدىندا شاعىن كەزەك پايدا بولدى. داۋىس بەرۋدىڭ العاشقى مينۋتىنان بايقالعان بەلسەندىلىك قالا تۇرعىندارىنىڭ سايلاۋ ۇدەرىسىنە قىزىعۋشىلىعى جوعارى ەكەنىن اڭعارتتى.

تاڭمەن تالاسا داۋىس بەرۋگە كەلگەن سايلاۋشىلاردى قۇرمانعازى اتىنداعى وركەستر قارسى الىپ، مەرەكەلىك ءارى سالتاناتتى كوڭىل كۇي سىيلادى.

ۋچاسكەدە تۇرعىندار ءۇشىن مازمۇندى باعدارلاما ازىرلەنگەن. تاڭ مۋزىكالىق جاتتىعۋدان باستالدى.

كەلۋشىلەر ءۇشىن كونديتەرلىك ونىمدەر مەن ءۇي تاعامدارىنىڭ جارمەڭكەسى دە ۇيىمداستىرىلدى. ساندىك-قولدانبالى ونەر شەبەرلەرى تۋىندىلارىن ۇسىنىپ، قوناقتارعا قولدان جاسالعان اۆتورلىق بۇيىمدارمەن تانىسۋعا مۇمكىندىك بەردى.

سونداي-اق، ۋچاسكەدە الماتى مەن ونىڭ تاريحىنا ارنالعان كارتينالار مەن كىتاپتار كورمەسى جۇمىس ىستەيدى. قالا تۇرعىندارى ونەر تۋىندىلارىن تاماشالاپ، الماتىنىڭ قالىپتاسۋى، دامۋى جانە مادەني مۇراسى تۋرالى باسىلىمدارمەن تانىسا الادى.

شاحمات اۋەسقويلارى ءۇشىن ارنايى ايماق ۇيىمداستىرىلعان. مۇندا كەلۋشىلەر زياتكەرلىك ويىن ويناپ، ۋاقىت وتكىزە الادى. سونداي-اق تىنىعىپ، اڭگىمەلەسۋگە ارنالعان كوفە-ايماق جۇمىس ىستەيدى.

وڭىرلىك كوممۋنيكاتسيالار قىزمەتىنىڭ قىزمەتكەرلەرى دە №102 سايلاۋ ۋچاسكەسىنە بارىپ، قالا تۇرعىندارىمەن تىلدەسىپ، داۋىس بەرۋدىڭ العاشقى ساعاتتارىنداعى كوڭىل كۇيىن ءبىلدى.

وسىلايشا، كوپتەگەن الماتىلىق ءۇشىن بۇل جەكسەنبىنىڭ تاڭى ازاماتتىق بورىشىن وتەۋمەن عانا ەمەس، مۋزىكامەن، شىعارماشىلىقپەن، جۇزدەسۋمەن جانە تۋعان قالاسىنىڭ تاريحىنا دەن قويۋمەن باستالدى. داۋىس بەرۋ جالعاسىپ جاتىر.

الماتى قالاسى وڭىرلىك كوممۋنيكاتسيالار قىزمەتى

Abai.kz