قازاقستاندا كىتاپ وقۋ مادەنيەتىن دامىتۋعا باعىتتالعان «كىتاپ وقيتىن ۇلت» رەسپۋبليكالىق مارافونىنىڭ تسيفرلىق مۇمكىندىكتەرى كەڭەيەدى. وسى ماقساتتا «كىتاپ وقيتىن ۇلت – چيتايۋششايا ناتسيا» قوعامدىق قورى مەن «Bilim Group Ltd» جشس ىنتىماقتاستىق تۋرالى مەموراندۋمعا قول قويدى.

قۇجاتقا «كىتاپ وقيتىن ۇلت – چيتايۋششايا ناتسيا» قوعامدىق قورىنىڭ توراعاسى باقىتجان تۇرلىبەكوۆ پەن «Bilim Group Ltd» جشس باس ديرەكتورى الەكساندر ساۆچەنكو قول قويدى.

مەموراندۋم اياسىندا KITAP تسيفرلىق وقىرماندىق پلاتفورماسى «كىتاپ وقيتىن ۇلت» مارافونىنىڭ تسيفرلىق سەرىكتەسى رەتىندە جوبا قاتىسۋشىلارىنىڭ ەلەكتروندىق جانە اۋديوكىتاپتارعا قولجەتىمدىلىگىن كەڭەيتۋگە باعىتتالعان بىرقاتار باستامانى قولدايدى.

بۇل ىنتىماقتاستىقتىڭ نەگىزگى ماقساتى – ءداستۇرلى كىتاپ وقۋدى زاماناۋي تسيفرلىق مۇمكىندىكتەرمەن ۇشتاستىرىپ، قازاقستان تۇرعىندارى ءۇشىن كىتاپتى ءارتۇرلى فورماتتا قولجەتىمدى ەتۋ جانە تۇراقتى وقۋ مادەنيەتىن دامىتۋ.

«ءبىزدىڭ ماقساتىمىز – كىتاپ وقۋدى جەكەلەگەن ادامداردىڭ جەكە ادەتى دەڭگەيىنەن كوتەرىپ، قوعامنىڭ ورتاق مادەني قۇندىلىعىنا اينالدىرۋ. ول ءۇشىن وقىرمانعا كىتاپتى وزىنە ىڭعايلى فورماتتا وقۋعا مۇمكىندىك بەرۋ ماڭىزدى. KITAP پلاتفورماسىمەن سەرىكتەستىك “كىتاپ وقيتىن ۇلت” مارافونىنىڭ وسى باعىتىن كۇشەيتىپ، ەلەكتروندىق جانە اۋديوكىتاپتارعا قولجەتىمدىلىكتى كەڭەيتۋگە مۇمكىندىك بەرەدى»، – دەدى «كىتاپ وقيتىن ۇلت – چيتايۋششايا ناتسيا» قوعامدىق قورىنىڭ توراعاسى باقىتجان تۇرلىبەكوۆ.

ىنتىماقتاستىق اياسىندا مارافون قاتىسۋشىلارىنا KITAP پلاتفورماسىنداعى ەلەكتروندى كىتاپتار، اۋديوكىتاپتار جانە باسقا دا تسيفرلىق كونتەنتتەر قولجەتىمدى بولادى. وقۋ جانە تىڭداۋمەن قاتار، پلاتفورما مەملەكەتتىك ءتىلدى قولداۋعا باعىتتالعان قۇرالداردى دا ۇسىنادى. اتاپ ايتقاندا، كىتاپ ءماتىنىنىڭ ىشىندە سوزدەر مەن ءسوز تىركەستەرىنىڭ اۋدارماسى مەن ماعىناسىن تۇسىندىرەتىن قازاقشا-ورىسشا كىرىكتىرىلگەن سوزدىك بار.

سونىمەن قاتار، كىرىكتىرىلگەن جاساندى ينتەللەكت چاتى وقىلعان كىتاپتى تالقىلاۋعا، ونىڭ مازمۇنى بويىنشا سۇراقتار قويۋعا جانە كىتاپتى تەرەڭىرەك تۇسىنۋگە مۇمكىندىك بەرەدى. بۇل قۇرالدى، سونىڭ ىشىندە، ءبىلىم بەرۋ ماقساتىندا دا پايدالانۋعا بولادى. جەكەلەندىرىلگەن ۇسىنىستار جۇيەسى وقىرماننىڭ قىزىعۋشىلىقتارى مەن تالعامىنا قاراي كىتاپتاردى ىرىكتەپ ۇسىنادى. ال وقۋ ستاتيستيكاسى وقىرمانعا ءوز پروگرەسىن باقىلاۋعا جانە تۇراقتى وقۋ ادەتىن قالىپتاستىرۋعا كومەكتەسەدى.

سونداي-اق تاراپتار جوبا قاتىسۋشىلارىنا ارنالعان ارنايى كىتاپ توپتامالارى مەن تسيفرلىق ۇسىنىستاردى ازىرلەۋ مۇمكىندىگىن قاراستىرۋدا.

«تسيفرلىق تەحنولوگيالار كىتاپتى وقىرمانعا جاقىنداتۋدىڭ جاڭا مۇمكىندىكتەرىن قالىپتاستىرىپ وتىر. KITAP پلاتفورماسىنىڭ “كىتاپ وقيتىن ۇلت” مارافونىنا قوسىلۋى ارقىلى ءبىز وقىرماندارعا ەلەكتروندىق جانە اۋديوكىتاپتاردى پايدالانۋدىڭ قولايلى مۇمكىندىكتەرىن ۇسىنۋعا جانە كىتاپ وقۋ تاجىريبەسىن زاماناۋي فورماتتارمەن تولىقتىرۋعا ۇلەس قوسامىز. ءبىز ءۇشىن ەڭ ماڭىزدىسى – كىتاپ وقۋعا نيەتتى ادامعا قاجەتتى كونتەنتتى ىڭعايلى ءارى قولجەتىمدى تۇردە ۇسىنۋ»، – دەدى «Bilim Group Ltd» جشس باس ديرەكتورى الەكساندر ساۆچەنكو.

«كىتاپ وقيتىن ۇلت» – قازاقستاندا كىتاپ وقۋ مادەنيەتىن ناسيحاتتاۋعا، ازاماتتاردىڭ تۇراقتى وقۋ داعدىسىن قالىپتاستىرۋعا جانە كىتاپقا قىزىعۋشىلىقتى ارتتىرۋعا باعىتتالعان رەسپۋبليكالىق مارافون.

تاراپتاردىڭ پىكىرىنشە، كىتاپ وقۋدى تسيفرلىق مۇمكىندىكتەرمەن ۇشتاستىرۋ وقىرمانداردىڭ كىتاپقا قولجەتىمدىلىگىن كەڭەيتىپ قانا قويماي، قازاقستانداعى وقۋ مادەنيەتىن جاڭا فورماتتار ارقىلى دامىتۋعا جول اشادى.

Abai.kz