AFP-تىڭ جازۋىنشا، يران اسكەريلەرى سارسەنبى كۇنى سوعىس كەزىندە زاقىمدالعان بارلىق قارۋ-جاراق جۇيەلەرى «قالپىنا كەلتىرىلگەنىن» جانە شەتەلدەن جاڭا قارۋ-جاراق قۇرىلعىلارى يمپورتتالعانىن مالىمدەگەن.

يران اسكەري وكىلى موحامماد اكرامينيا مەملەكەتتىك تەلەارناعا: «بارلىق بولىمشەلەردەگى  زاقىمدالعان قارۋ-جاراق جۇيەلەرى جوندەلدى، سونداي-اق جاڭا قارۋ-جاراق قۇرىلعىلارى ەنگىزىلدى»، - دەگەن.

ول : «شىت جاڭا قارۋ-جاراق جۇيەمىز قورعانىس ونەركاسىبى مەن اسكەريلەردىڭ كۇش-جىگەردىڭ ارقاسىندا جاساقتالدى، كەيبىرەۋلەرى شەتەلدەن  يمپورتتالدى. بۇل جابدىق ءبىزدىڭ جاۋىنگەرلىك قابىلەتىمىزدى ارتتىرادى» دەپ مالىمدەگەن. دەگەنمەن، ول قاي ەلدەردەن، قانداي قارۋ-جاراق يمپورتتاعانىن اشىپ ايتپاعان.

تاياۋ شىعىس سوعىسى اقپان ايىنىڭ سوڭىندا اقش پەن ءيزرايلدىڭ يران يسلام رەسپۋبليكاسىنا يادرولىق قارۋعا يە بولۋىنا جول بەرمەۋ ماقساتىنداعى بىرلەسكەن اۋە شابۋىلىنان كەيىن باستالدى. يران كەك قايتارىپ، نەگىزىنەن ايماقتاعى ۆاشينگتونمەن بىرلەسكەن ەلدەردى نىساناعا الدى.

ءساۋىر ايىندا قول جەتكىزىلگەن اتىستى توقتاتۋ تۋرالى كەلىسىم شامامەن 40 كۇنگە سوزىلعان سوعىستى توقتاتتى، بىراق ارا-تۇرا بولىپ تۇرعان ءوزارا شابۋىلدار ستراتەگيالىق ماڭىزى بار ورمۋز بۇعازىنىڭ اينالاسىندا وربىگەن بەيبىتشىلىك كەلىسىمىنە قول جەتكىزۋ مۇمكىندىگىن جوققا شىعاردى.

يران اسكەري وكىلى: «ءبىز ىلگەرىدە  جاۋ زاقىمداعان اسكەري جۇيەلەردى قالپىنا كەلتىرۋ جانە قايتا ورنالاستىرۋ ءۇشىن ماڭىزدى قادامدار جاسادىق»، - دەپ قوستى.

ونىڭ ايتۋىنشا: «حالىقارالىق قۇقىق پەن بۇۇ جارعىسىنا نەگىزدەلگەن الدىن الا ەسكەرتىلگەن شابۋىل زاڭدى ارەكەت بولىپ تابىلادى; ارينە، شابۋىل پروپورتسيونالدىلىق پەن قاجەتتىلىك قاعيداتتارىنا سايكەس كەلۋى كەرەك».

Abai.kz