الەۋمەتتىك جەلىدە قازاق ءتىلى مەن قازاقتاردىڭ مەكەنىنە قاتىستى كەمسىتۋشىلىك سوزدەر ايتىپ، قوعامدا ۇلكەن رەزونانس تۋدىرعان بۇرىنعى رەسەي ازاماتى دانيل سكۋراتوۆ سوت شەشىمىمەن 15 تاۋلىككە اكىمشىلىك قاماۋعا الىندى.

جەلىدەگى Instagram پاراقشاسىندا رەسەيدەن موبيليزاتسيا ارقىلى كەلگەنىن جانە استانا قالاسىندا تۇرىپ جاتقانىن كورسەتكەن ول Threads پلاتفورماسىندا جەلى قولدانۋشىلارىنىڭ اشۋ-زاڭىن تۋعىزعان بىرنەشە جازبا قالدىرعان. سكۋراتوۆ ءوز سوزىندە قازاق ءتىلىن كەمسىتىپ، ونى «ەشكىمگە كەرەگى جوق» دەپ سيپاتتاعان، سونداي-اق حالىققا قاتىستى جاعىمسىز سوزدەر ايتقان.

الەۋمەتتىك جەلىدەگى داۋلى پىكىرلەر:

«مەن قازاق ءتىلىن بىلمەيمىن جانە 39 جىل بويى تاماشا ءومىر ءسۇرىپ كەلەمىن»;

«مامبەتتەر مەن قوناقجايلىلىق ەكەۋى ەكى ءتۇرلى ۇعىم. كەيىن تۋريستەر نەگە جوق دەپ تاڭعالادى»;

«قازاق ءتىلىن بىلمەيتىن جاپوندىقتار مىقتى اۆتوكولىكتەر، Apple كومپانياسى iPhone-دار شىعارىپ جاتىر. سەندەر ءبىر-بىرلەرىڭمەن قازاقشا سويلەۋدەن باسقا ەشتەڭە بىلمەيتىن اقىماقسىڭدار... قازاق ءتىلى ەشكىمگە دە كەرەك ەمەس».

وسى وقيعادان كەيىن الماتى قالالىق پوليتسيا دەپارتامەنتى بوستاندىق اۋداندىق پوليتسيا باسقارماسى ارقىلى ارنايى تەكسەرىس جۇرگىزىپ، زاڭ بۇزۋشىنىڭ جەكە باسىن انىقتادى.

پوليتسيا دەپارتامەنتى ازاماتقا قاتىستى قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 434-بابى 1-بولىگى («ۇساق بۇزاقىلىق») بويىنشا ءىس قوزعاپ، جينالعان ماتەريالداردى شەشىم شىعارۋ ءۇشىن الماتى قالاسىنىڭ مامانداندىرىلعان اۋدانارالىق اكىمشىلىك سوتىنا جولدادى.

سوت وتىرىسى بارىسىندا ايىپتالۋشى دانيل سكۋراتوۆ ءوز كىناسىن تولىق مويىنداپ، سوتتان جەڭىلدەۋ جازا قولدانۋدى سۇراعان. دەگەنمەن سوت ونىڭ ارەكەتىن قوعامدىق ءتارتىپتى بۇزۋ دەپ تانىپ، 15 تاۋلىككە قاماۋعا الۋ تۋرالى ۇكىم شىعاردى.

Abai.kz