ايبەك دادەباي باۋىرىمىز 46 جاسىندا قۇرىلتاي توراعاسى بولىپ تاعايىندالدى.

قازاق: «ەردىڭ جاسى — ەلۋ»، - دەيدى.

بۇل تۇرعىدان قاراعاندا، ايبەك ارقابايۇلى ەردىڭ جاسىنا ءالى جەتە قويعان جوق، وعان ءالى ءتورت جىل بار. ال، قازاقستان حالقىنىڭ ورتاشا ءومىر ءسۇرۋ ۇزاقتىعى 75,3 جاس ەكەنىن ەسكەرسەك، ايبەك دادەبايدىڭ جاسى ورتا جاستان اسىپ جىعىلادى ەكەن.

قالاي دەسەك تە، ايبەك باۋىرىمىزدىڭ بۇل جاسى — ناعىز تولىسقان، دەگەن كەمەلىنە كەلگەن جاس!

بۇگىن «قازاقتىڭ اتى اڭىزعا اينالعان ايتۋلى تۇلعالارى 46 جاسىندا نە ءبىتىردى ەكەن، قانداي بيىككە كوتەرىلدى ەكەن، قانداي جەتىستىككە جەتتى ەكەن؟»، - دەگەندى ويلاپ، اشىق اقپارات كوزدەرىنەن تەكسەرىپ كوردىم.

ىبىراي التىنسارين 46 جاسىندا تۇڭعىش قىزدار ۋچيليششەسىن اشىپتى; قارابۇتاق مەكتەبىنىڭ نەگىزىن قالاپتى.

كەمەڭگەر اباي 46 جاسىندا ەل اراسىنا كەڭ تارالعان، جۇرتتىڭ اۋزىنان تۇسپەيتىن اتاقتى «سەگىز اياق»، «قور بولدى جانىم»، «كۇشىك اسىراپ، يت ەتتىم...»، «جۇرەگىم، ويباي، تىنىش وتىر...»،«بازارعا قاراپ تۇرسام، اركىم بارار...» اتتى كلاسسيكالىق ولەڭدەرىن جازىپتى.

سونىمەن بىرگە، ابايدىڭ ەكىنشى قارا ءسوزى (قازاق پەن وزگە حالىقتاردى، ونىڭ ىشىندە وزبەك، ورىس، نوعايلاردى سالىستىرىپ، عىلىم-بىلىمگە ۇمتىلۋدى ءسوز ەتەتىن شىعارماسى) مەن ءۇشىنشى قارا ءسوزى (ەل باسقارۋ جۇيەسى، بولىستار مەن بيلەردىڭ سايلانۋى، حالىقتىڭ مىنەز-قۇلقى مەن قۇقىقتىق ماسەلەلەرى تەرەڭ تالقىلاناتىن ەڭ كولەمدى قارا سوزدەرىنىڭ ءبىرى) دە ءدال وسى 46 جاسىندا جازىلعان ەكەن.

ءاليحان بوكەيحانوۆ 46 جاسىندا پاتشا وكىمەتىنىڭ شەشىمىمەن تۋعان ەلىنەن قۋعىندالىپ، رەسەيدىڭ سامارا قالاسىندا ساياسي ايداۋدا ءجۇرىپتى.

دىنمۇحامەد قوناەۆ 46 جاسىندا قازاق كسر مينيسترلەر كەڭەسىنىڭ توراعاسى (ۇكىمەت باسشىسى) قىزمەتىن اتقارىپتى.

مۇحتار اۋەزوۆ 46 جاسقا كەلگەندە اتاقتى «اباي» رومانىن جازىپ بىتىرگەن بولىپ شىقتى.

قاليبەك حاكىم رايىمبەكۇلى 46 جاسىندا ەلىن كوممۋنيس قىتاي ۇكىمەتىنەن الىپ قاشىپ، گيمالاي تاۋىنان اسىپ، ءۇندىستاننىڭ كاشمىر ايماعىنا جەتكىزگەن ەكەن.

قاليبەك حاكىمنىڭ مەن جۇكتەگەن ايگىلى فوتوسىن سول كاشمىردە اقش-تىڭ اتاقتى The National Geographic جۋرنالىنىڭ تىلشىلەرى ءتۇسىرىپتى.

وزبەكالى جانىبەكوۆ 46 جاسىندا قازاق كسر مادەنيەت ءمينيسترىنىڭ ورىنباسارى قىزمەتىنە تاعايىندالىپتى.

شىڭجاڭ پارتيا كوميتەتى مەن ۇكىمەتىندە قىرىق جىل ەڭ جوعارى جانە اسا جاۋاپتى قىزمەت اتقارعان ءجانابىل سىماعۇلۇلى 46 جاسىندا پەكينگە بارىپ، سول كەزدەگى قىتاي كومپارتياسىنىڭ ءبىرىنشى حاتشىسى حۋ ياۋباڭعا كەزدەسىپ، ودان ارى اتاقتى دەن سياوپينگە جولىعىپ، ۋاڭ ىنماۋدى شىڭجاڭ ولكەسىنە ءبىرىنشى حاتشىلىققا اتتاي قالاپ سۇراپ العانى ءمالىم.

نۇرسۇلتان نازارباەۆ 46 جاسىندا قازاق كسر مينيسترلەر كەڭەسىنىڭ توراعاسى (رەسپۋبليكا ۇكىمەتىنىڭ باسشىسى) قىزمەتىن اتقارىپتى.

قاسىم-جومارت توقاەۆ 46 جاسىندا قازاقستان رەسپۋبليكاسىنىڭ پرەمەر-ءمينيسترى قىزمەتىنە تاعايىندالىپتى.

مۇنىڭ ءبارى ۋاقىت پەن زامان ءوزى تۋدىرعان تۇلعالار مەن قايراتكەرلەر. تىزە بەرسەك، قازاق تاريحىندا 46 جاسىندا تاريحي جەتىستىككە جەتكەن مۇنداي تۇلعالار از ەمەس. قازاقتىڭ ءبىراز مىقتى تۇلعالارىنىڭ 45 جاسىندا ومىردەن وتكەنى دە شىندىق.

ايبەك دادەبايدى پرەزيدەنت سەنىم ارتىپ، قۇرىلتاي توراعالىعىنا ۇسىندى. قۇرىلتاي دەپۋتاتتارى ول كىسىنى ءبىر اۋىزدان قولدادى.

ايبەك ارقابايۇلى باۋىرىمىزدىڭ اتالعان اتالارى مەن اعالارى زور جەتىستىكتەر مەن بيىك تۇعىرعا وتىرعان ءدال 46 جاستا قۇرىلتاي توراعاسى بولىپ تاعايىندالۋى، مەملەكەتتىك لاۋازىمداعى الدىڭعى ءۇش تۇلعانىڭ قاتارىنا ءىلىنۋى — جاي وقيعا ەمەس دەپ ويلايمىن. بۇل سايكەستىكتى مەن جاقسىلىقتىڭ نىشانى دەپ ىرىمدادىم…

اۋىت مۇقيبەك

Abai.kz