اقتاۋداعى قاسىرەتتەن كەيىن الەۋمەتتىك جەلىدە قوعامنىڭ پىكىرى ەكىگە جارىلدى. ءبىر تاراپ جي ارقىلى قازا بولعانداردىڭ سۋرەتتەرىنەن اسەرلى بەينەلەر جاساپ تاراتقان بلوگەرلەردى «قوعامدىق رەزونانس تۋعىزعانى ءۇشىن» اقتاسا، ەكىنشى تاراپ تراگەديانى قارالىم جيناۋدىڭ قۇرالىنا اينالدىرۋعا بولمايتىنىن ايتىپ، ولاردى ايىپتاپ جاتىر.

بىراق بۇل ماسەلەگە ءبىر جاقتى قاراۋ قيىن.

ەگەر قوعامدىق رەزونانس بولماسا، قاسىرەتكە بيلىكتىڭ رەاكتسياسى دا ءتيىستى دەڭگەيدە بولماۋى مۇمكىن دەگەن ءۋاجدىڭ جانى بار. قوعامنىڭ داۋىسى كەيدە ادىلەتتى تالاپ ەتۋدىڭ ماڭىزدى تەتىگىنە اينالادى. سوندىقتان تراگەديا تۋرالى داۋىستاپ ايتقانداردىڭ ءبارىن جاپپاي كىنالاۋ دا ادىلەتتى ەمەس.

سونىمەن بىرگە قاسىرەتكە ءۇن قوسۋ مەن قاسىرەتتى اسەر قۇرالىنا اينالدىرۋدىڭ دا ارا جىگى بار.

ەڭ كۇردەلى ماسەلە — نيەت. بلوگەر قايعىنى پايدالانىپ قارالىم جيناعىسى كەلدى مە، الدە قوعامدى وياتقىسى كەلدى مە — مۇنى سىرتتاي دالەلدەۋ وڭاي ەمەس. نيەتتى بولجاپ، ادامعا ۇكىم شىعارۋ دا ءجونسىز.

ادامنىڭ ىشكى مادەنيەتى ونىڭ ارەكەتىنەن كورىنەدى.

قايتىس بولعان ادامنىڭ سۋرەتىن قالاي پايدالاندىڭ؟ قايعىنى قالاي كورسەتتىڭ؟ تۋىس-تۋعانىنىڭ جان جاراسىن ەسكەردىڭ بە؟ كورەرمەننىڭ اشۋىن قوزدىرۋدى كوزدەدىڭ بە، الدە ويلاندىرۋدى ما؟

قاسىرەتتىڭ قادىرىن ساقتاي وتىرىپ، قوعامنىڭ نازارىن اۋدارا الدىڭ با؟

مىنە، ماسەلە وسىندا.

ءبىر اقىننىڭ زارلى جوقتاۋى ەلدىڭ جۇرەگىن قوزعادى. ادامدار جىلادى. بىراق سول جوقتاۋدىڭ ىشىندە اسكەردەگى كەلەڭسىزدىكتەر، قوعامداعى جاۋاپسىزدىق، جەمقورلىق تۋرالى وتكىر وي دا كورىنىس تاپتى. دەمەك، قاسىرەتتى جۇرەككە جەتكىزۋ مەن قوعامدىق ماسەلەنى كوتەرۋ ءبىر-بىرىنە قايشى ەمەس.

قايعىنى قوعامنان جاسىرۋعا بولمايدى. ادىلەتتى تالاپ ەتۋ ءۇشىن كەيدە قاتتى سويلەۋگە تۋرا كەلەدى. بىراق قايعىنىڭ ءوزىن - ايقايعا، مارقۇمنىڭ بەينەسىن - اسەرگە، جاقىندارىنىڭ جان جاراسىن كوپشىلىككە ارنالعان كورىنىسكە اينالدىرماۋ — ادامنىڭ ءوز ىشكى مادەنيەتىنە بايلانىستى.

قاسىرەتتى ءبولىسۋ مادەنيەتى — ءۇنسىز قالۋ مادەنيەتى ەمەس.

ول — قاسىرەتتىڭ قادىرىن ساقتاي وتىرىپ سويلەۋ مادەنيەتى.

قوعامدىق رەزونانس قاجەت بولۋى مۇمكىن. بىراق رەزونانس پەن دابىرانىڭ، جاناشىرلىق پەن ەموتسيانى قوزدىرۋدىڭ ارا-جىگىن اجىراتا ءبىلۋ قاجەت.

ويتكەنى قاسىرەت — كونتەنت ەمەس. ونىڭ ارتىندا تاعدىر، وتباسى، كوز جاسى جانە ادام ءومىرى تۇر.

گءۇلماريا بارمانبەكوۆا

Abai.kz