قازاقستاندىق Jas tolqyn بايقاۋىنىڭ جەڭىمپازدارى استراحاندا وتكەن كاسپي ءوڭىرىنىڭ «دوستىق كوپىرى. رەسەي – قازاقستان» حالىقارالىق مادەني فورۋمىنا جولداما الدى. حالىقارالىق ساحنادا جاس ونەرپازدار تاعى دا جەتىستىككە جەتىپ، ءۇش گران-پري، ءتورت ءبىرىنشى جانە ەكى ەكىنشى ورىندى جەڭىپ الدى. فورۋم 2026 جىلعى 25 قىركۇيەكتە استراحان وپەرا جانە بالەت تەاترىندا وتكەن گالا-كونتسەرتپەن قورىتىندىلاندى.

جۇلدەگەرلەر قاتارىندا اتىراۋ مەن ورالدىڭ جاس انشىلەرى، اسپاپشىلارى مەن بيشىلەرى، سونداي-اق اتىراۋ وبلىسىنىڭ اۋىلدارىنان كەلگەن قاتىسۋشىلار بار. بەيبارىس پەن اققىستاۋ اۋىلدارىنىڭ بالالارىنا Jas tolqyn بايقاۋى تۋعان ولكەسىن حالىقارالىق ساحنادا تانىستىرۋعا مۇمكىندىك بەردى.

گران-پري جۇلدەسىن اتىراۋلىق نۇرسۇلتان ابىلاي (ۆوكال), اتىراۋدىڭ «تۇران» دومبىراشىلار ءانسامبلى (اسپاپتىق جانر) جانە ورالدىڭ «التىن بىلەزىك» حورەوگرافيالىق ءانسامبلى يەلەندى.

ءبىرىنشى ورىنداردى اتىراۋلىق سانجار اسكاروۆ (كلاسسيكالىق اسپاپتىق جانر) پەن ءنايليا بەكقۇل (الەۋمەتتىك بەينە), اتىراۋ وبلىسى ماحامبەت اۋدانىنىڭ بەيبارىس اۋىلىنان كەلگەن نۇر ورىنباي ء(داستۇرلى ءان) جانە ورالدىق رايىمبەك ماقسوت (ۆوكال) جەڭىپ الدى.

ەكىنشى ورىندار اتىراۋلىق اينۇرلى مۇحيتقا (حالىق اسپاپتارىندا ورىنداۋ) جانە اتىراۋ وبلىسى يساتاي اۋدانىنىڭ اققىستاۋ اۋىلىنان كەلگەن «اسەماي» انسامبلىنە ء(داستۇرلى ءان) بۇيىردى.

استراحاندا بولعان بىرنەشە كۇن ىشىندە جاس ونەرپازدار استراحان كرەملىندەگى شەبەرلىك ساباقتارىنا قاتىسىپ، فورۋمنىڭ وزگە قاتىسۋشىلارىمەن تاجىريبە الماستى جانە قالانىڭ مادەني نىساندارىمەن تانىستى. قازاقستاندىق دەلەگاتسيا قۇرمانعازى اتىنداعى وڭىرلىك مادەني ورتالىققا دا باردى. باعدارلاما اياسىندا Jas tolqyn جەڭىمپازدارىنىڭ استراحان مەملەكەتتىك فيلارمونياسىندا وتكەن جەكە كونتسەرتى ەرەكشە ورىن الدى. كونتسەرت 24 قىركۇيەكتە، قورىتىندى گالا-كونتسەرت قارساڭىندا ءوتتى.

كونتسەرت استراحان وبلىسىنداعى قازاق دياسپوراسى وكىلدەرىنىڭ ەرەكشە قىزىعۋشىلىعىن تۋدىردى. قازاقستاندىق جاس ونەرپازداردىڭ ونەرىن تاماشالاۋعا كوپتەگەن كورەرمەن وبلىستىڭ شالعاي اۋداندارىنان دا كەلدى. استراحان مەملەكەتتىك فيلارمونياسىنىڭ 600 كورەرمەنگە ارنالعان زالى لىق تولدى.

«ءبىز Jas tolqyn قاتىسۋشىلارىنىڭ اراسىنان قازاقستاننىڭ بولاشاق جۇلدىزدارى شىعاتىنىنا سەنەمىز. بۇگىندە ولارعا قولداۋ كورسەتىپ، ءوز قابىلەتىن تانىتۋعا مۇمكىندىك بەرۋ اسا ماڭىزدى. سوندىقتان كقك ءوزىنىڭ قايىرىمدىلىق باعدارلاماسى ارقىلى قالالار مەن اۋىلدارداعى دارىندى بالالاردىڭ ونەر شەبەرلەرىنەن ءتالىم الىپ، ۇلكەن ساحنادا العاشقى قادامدارىن جاساۋىنا كومەكتەسەدى. استراحان وسى جولدىڭ ماڭىزدى ءبىر بەلەسىنە اينالدى. بۇل — قازاقستانمەن كاسپي، تاريح جانە قۇرمانعازى مۇراسى ارقىلى ساباقتاسىپ جاتقان، بىزگە جاقىن ولكە. مۇندا بالالارىمىز سول بايلانىستى سەزىنىپ، ونى ءوز ونەرىمەن جالعاستىرا الدى. ولاردىڭ جەڭىستەرى ءبىزدى قۋانتادى. سونىمەن بىرگە ەلگە ءوز كۇشىنە دەگەن سەنىممەن، العا ۇمتىلۋعا دەگەن قۇلشىنىسپەن ورالۋى دا ءبىز ءۇشىن اسا قۇندى. بالكىم، وسى العاشقى جەتىستىكتەر ەرتەڭ بۇكىل ەل نازار اۋداراتىن شىعارماشىلىق جولدىڭ باستاۋى بولار»، — دەدى «كقك-ق» اق باس ديرەكتورىنىڭ قازاقستان رەسپۋبليكاسىنىڭ ۇكىمەتىمەن بايلانىس جونىندەگى ورىنباسارى قايىرگەلدى قابىلدين.

Jas tolqyn بايقاۋى تۋرالى

Jas tolqyn — قازاقستاننىڭ باتىس وڭىرىندەگى دارىندى بالالارعا ارنالعان شىعارماشىلىق بايقاۋ. جوبا «كاسپي قۇبىر كونسورتسيۋمى-ق» اق قايىرىمدىلىق باعدارلاماسى اياسىندا جەتىنشى جىل قاتارىنان جۇزەگە اسىرىلىپ كەلەدى. جەتى ماۋسىمدا ول 7 مىڭنان استام بالا مەن ءجاسوسپىرىمنىڭ باسىن قوستى. بايقاۋعا قاتىسۋشىلار ساحنالىق تاجىريبە جيناقتاپ قانا قويماي، قازاقستان مەن رەسەيدىڭ تانىمال مادەنيەت جانە ونەر قايراتكەرلەرىنىڭ شەبەرلىك ساباقتارىنا قاتىسۋعا جانە حالىقارالىق دەڭگەيدە ونەر كورسەتۋگە مۇمكىندىك الادى.

Abai.kz