قازاقستاندا ءتورتىنشى ءموز ءۇشىن الاڭدى تاڭداۋ 2026 جىلدىڭ سوڭىنا دەيىن اياقتالادى...

قازاقستاندا ءتورتىنشى مۇناي وڭدەۋ زاۋىتىن ء(موز) سالۋ ءۇشىن ورىندى تۇپكىلىكتى بەلگىلەۋ 2026 جىلدىڭ سوڭىنا دەيىن جوسپارلانىپ وتىر، دەپ حابارلايدى ەنەرگەتيكا مينيسترلىگىنىڭ ءباسپاسوز قىزمەتى.

«ءبىز جاڭا ءموز جوباسىن جۇزەگە اسىرۋدى جەدەلدەتۋ تۋرالى شەشىم قابىلدادىق. وسى جىلدىڭ سوڭىنا دەيىن الەۋەتتى ءتورت وبلىستى باعالاۋ اياقتالىپ، ودان كەيىن قۇرىلىس جۇرگىزىلەتىن وڭتايلى ءوڭىر رەسمي تۇردە انىقتالادى. جاڭا زاۋىت زاماناۋي مۇناي-حيميا كلاستەرىنىڭ وزەگىنە اينالادى»، — دەپ حابارلادى ەنەرگەتيكا مينيسترلىگى مۇنايدى تاسىمالداۋ جانە وڭدەۋ دەپارتامەنتىنىڭ ديرەكتورى داۋلەت ارىقباەۆ.

ۆەدومستۆونىڭ ناقتىلاۋىنشا، قازاقستان جۇمىس ىستەپ تۇرعان زاۋىتتاردى كەڭەيتۋ جانە جاڭا ءىرى توننالى مۇناي وڭدەۋ ءارى مۇناي-حيميا كەشەنىن سالۋ ارقىلى مۇناي وڭدەۋدىڭ جيىنتىق قۋاتىن جىلىنا 39 ملن تونناعا دەيىن جەتكىزۋدى جوسپارلاپ وتىر.

«جاڭا كەشەننىڭ قۋاتىن جىلىنا 10 ملن تونناعا دەيىن ارتتىرۋ كوزدەلگەن. ەنەرگەتيكا مينيسترلىگى جوبانى ىسكە اسىرۋدى جەدەلدەتۋگە نيەتتى جانە نىساندى 2033 جىلعا دەيىن پايدالانۋعا بەرۋدى مەجەلەپ وتىر. قازىرگى ۋاقىتتا ۇلىتاۋ، اتىراۋ، ماڭعىستاۋ جانە تۇركىستان وبلىستارىنداعى الەۋەتتى ءتورت الاڭ بويىنشا الدىن الا تەو (تەحنيكالىق-ەكونوميكالىق نەگىزدەمە) ازىرلەۋ جانە سالىستىرمالى تالداۋ جاساۋ اياقتالىپ كەلەدى»، — دەپ ءتۇسىندىردى مينيسترلىك وكىلدەرى.

سونىمەن قاتار، ۆەدومستۆو دەرەگىنشە، قازاقستان جۇمىس ىستەپ تۇرعان مۇناي وڭدەۋ كاسىپورىندارىنىڭ قۋاتىن قازىرگى 18 ملن توننادان جىلىنا 29,2 ملن تونناعا دەيىن كەڭەيتۋدە.

«شىمكەنت ءموز قۋاتىن 2030 جىلعا قاراي جىلىنا 6-دان 12 ملن توننا مۇنايعا دەيىن ارتتىرۋ جوسپارلانعان. جوبانىڭ تەو-سىن ازىرلەۋدى CNPC شىعىس قىتاي جوبالاۋ ينستيتۋتى جۇرگىزىپ جاتىر. پاۆلودار مۇناي-حيميا زاۋىتىن 2031 جىلعا قاراي جىلىنا 5,5-تەن 9 ملن تونناعا دەيىن كەڭەيتۋ كوزدەلگەن. اتىراۋ ءموز 2028 جىلعا قاراي مۇناي وڭدەۋ كولەمىن كەزەڭ-كەزەڭىمەن 5,5-تەن 6,7 ملن تونناعا دەيىن ۇلعايتادى. كاسىپورىندا، سونداي-اق، جوندەۋارالىق ءۇش جىلدىق تسيكلگە كوشۋ دە جوسپارلانۋدا»، — دەلىنگەن حابارلامادا.

وڭدەۋ قۋاتىنىڭ ارتۋىنا بايلانىستى قازاقستان وتاندىق زاۋىتتاردى قاجەتتى شيكىزات كولەمىمەن قامتاماسىز ەتۋ ءۇشىن مۇناي تاسىمالداۋ ينفراقۇرىلىمىن دا كەڭەيتىپ جاتقانى اتاپ وتىلەدى.

Abai.kz