قازان ايىنىڭ سالقىنى باستالىسىمەن قازاقستاندىقتار ءۇشىن جىل سايىن قايتالاناتىن «جىلۋ ماۋسىمىنا دايىنبىز» دەگەن جاتتاندى ەسەپتەر مەن شەنەۋنىكتەردىڭ باياندامالارى تاعى دا سىن كوتەرمەدى دەسەك ارتىق ايتپايمىز.

ۇكىمەتتىڭ سوڭعى وتىرىسىندا پرەمەر-مينيستر ولجاس بەكتەنوۆتىڭ اباي وبلىسى اكىمىنىڭ ورىنباسارىن تارتىپتىك جاۋاپكەرشىلىككە تارتۋدى تاپسىرۋى — جىل سايىنعى اتقامىنەرلەر سالقىنداعى سالعىرتتىعىنىڭ كەزەكتى كورىنىسى بولىپ تابىلادى.

باستى ماسەلە: كۇن سۋىسا دا، قازاندىقتار ءىسسىز تۇر

رەسمي اقپاراتقا سايكەس، ەلدىڭ 11 وڭىرىندە جىلۋ بەرۋ ماۋسىمى ۋاقتىلى باستالدى. الايدا اباي وبلىسىنىڭ اكىمشىلىك ورتالىعى – سەمەي قالاسى بۇل كوشتەن جاۋىر اتتاي كوپ كەيىن قالىپ قويدى. وعان نەگىزگى سەبەپ رەتىندە ورتالىق جىلۋ پۋنكتتەرىندەگى جوندەۋ جۇمىستارىنىڭ كەشىگۋى جانە جابدىقتاردى جەتكىزۋدىڭ ۋاقىتىلى ورىندالماۋى باسا كورسەتىلىپ، العا تارتىلىپ  وتىر.

قالا تۇرعىندارى ءۇشىن بۇل جاعداي ەشبىر توسىن جاڭالىق ەمەس. جىلۋ جۇيەلەرىن جوندەۋ مەن دايىندىق جۇمىستارىن 1 قازانعا دەيىن تولىق اياقتاۋ تۋرالى ۇكىمەتتىڭ قاتاڭ تاپسىرماسى بولعانىنا قاراماستان، ءوڭىر باسشىلىعى اتالعان مەرزىمدە جەر سيپاپ مىندەتىن ورىنداي المادى. سونىڭ سالدارىنان قالاداعى جىلۋدى بەرۋ دايىندىعى تەك 5 قازاندا عانا قامتاماسىز ەتىلدى. ال بۇل ارالىقتا قاراپايىم حالىق پاتەرلەرىندە ءبۇرىسىپ، اكىمدىكتىڭ ەسىگىن توزدىردى.

جازا جەتكىلىكتى مە، الدە جۇيەلىك وزگەرىس كەرەك پە؟

پرەمەر-ءمينيستردىڭ «بارلىق ءوڭىر مەرزىمىندە ورىندادى، تەك سەمەي عانا كەشىكتى» دەپ قاتاڭ سىنعا الۋى وتە ورىندى. بىراق ماسەلە تەك ءبىر ورىنباساردىڭ جاۋاپكەرشىلىگىمەن شەشىلە مە؟

جىل سايىن بيۋدجەتتەن ميللياردتاعان قارجى ءبولىنىپ، جىلۋ جەلىلەرى مەن قازاندىقتار جوندەلەدى. بىراق مەرزىمىنەن كەشىگۋ، قۇرال-جابدىقتىڭ ۋاقىتىندا جەتپەۋى سياقتى سىلتاۋلار قايتالانا بەرەدى. بۇل – اتقارۋشى بيلىكتىڭ جوسپارلاۋ قابىلەتسىزدىگى مەن باقىلاۋدىڭ السىزدىگى ەكەندىگىن انىق تانىتادى.

جىلۋ ماۋسىمى – ساياسي ناۋقان ەمەس، حالىقتىڭ اماندىعى مەن دەنساۋلىعى. كەشىكتىرىلگەن ءاربىر كۇن – قارتتار مەن كىشكەنتاي بالالاردىڭ دەنساۋلىعىنا تونگەن قاتەر بولىپ سانالادى.

قۇرىلىس-جوندەۋ جۇمىستارىن ۋاقىتىندا اياقتاماعان مەردىگەر كومپانيالارعا قاتاڭ شارا قولدانىلمايىنشا، بۇل ولقىلىقتار قايتالانا بەرەدى.

ءسوز ءتۇيىنى: سەمەيدەگى جاعداي – وڭىرلىك بيلىكتىڭ شىندىقتان كوز جۇمىپ، ماسەلەنى تەك جوعارىدان نۇسقاۋ كەلگەندە عانا قوزعايتىنىنىڭ ايقىن دالەلى دەۋگە دە نەگىز بار. وبلىس اكىمىنىڭ ورىنباسارىنا بەرىلگەن تارتىپتىك جازا – ءادىل قادام، بىراق بۇل جەتكىلىكسىز. سەمەيلىكتەر ءۇشىن ەندىگى باستى ماسەلە — قىستىڭ كوزى قىراۋدا جىلۋ جۇيەلەرى سىر بەرمەي، ۇيلەرگە تۇراقتى تۇردە جىلۋ جەتكىزىلۋى بولىپ تابىلادى.

ۇكىمەت پەن وبلىس اكىمدىگى بۇل جاعدايدان ءتيىستى قورىتىندى شىعارىپ، جىلۋ بەرۋ ماۋسىمىنىڭ قالىپتى جۇمىس ىستەۋىن تاۋلىك بويى قاتاڭ باقىلاۋدا ۇستاۋى ءتيىس. حالىقتىڭ ءتوزىمى شەكتەۋلى، ال ينفراقۇرىلىمدىق ولقىلىقتاردى تەك ۋاقىتشا جازامەن جابۋ مۇمكىن ەمەس.

سەمەيدەگى جىلۋ جۇيەلەرىنىڭ كەشىگۋىنە نەگىزگى سەبەپ كىم نەمەسە نە بولىپ وتىر؟ دەگەن ماسەلە اتايلاپ الدان شىعادى.

Abai.kz