دۇيسەنبى, 16 قاراشا 2026
قوعام 132 0 پىكىر 16 قاراشا, 2026 ساعات 13:20

تەڭ قۇقىلى قوعام: وركەنيەتتى ەلدىڭ باستى بەلگىسى...

سۋرەت: جي ارقىلى جاسالدى / el.kz.

مەملەكەت باسشىسى قاسىم-جومارت توقاەۆتىڭ قازاقستان حالقىنا ارناعان بيىلعى جولداۋىندا الەۋمەتتىك ادىلەتتىلىك، ازاماتتاردىڭ ءال-اۋقاتىن ارتتىرۋ، ساپالى ءبىلىم مەن قولجەتىمدى مەديتسينالىق قىزمەت كورسەتۋ، قوعامداعى بارلىق ادامدار ءۇشىن تەڭ مۇمكىندىكتەردى قامتاماسىز ەتۋ ماسەلەلەرىنە ەرەكشە نازار اۋدارىلىپ ءوتتى.

وزگە دە تولىپ جاتقان ماڭىزدى ماسەلەلەر قاتارىندا ەرەكشە ءبىلىم بەرۋدى قاجەت ەتەتىن بالالار مەن مۇمكىندىگى شەكتەۋلى ازاماتتاردى قولداۋ نازار اۋدارارلىق جاعداي. پرەزيدەنت كوتەرگەن مىندەتتەردىڭ نەگىزگى ماقساتى – ءاربىر ازامات ءوزىن قوعامنىڭ تولىققاندى مۇشەسى رەتىندە سەزىنەتىن، ەشكىم شەت قالمايتىن ادىلەتتى مەملەكەت قالىپتاستىرۋ بولسا كەرەك.

بۇل جەردە قوعامنىڭ وركەنيەتتىلىگى مەن ادامگەرشىلىك دەڭگەيى ونىڭ ءاربىر ازاماتىنا جاساعان قامقورلىعىمەن، كورسەتكەن قۇرمەتىمەن ولشەنەتىنى ايتا كەتكەن ورىندى. ياعني، ءار ادام – قوعامنىڭ تەڭ قۇقىلى مۇشەسى. ونىڭ دەنساۋلىق جاعدايىنا، فيزيكالىق مۇمكىندىكتەرىنە نەمەسە الەۋمەتتىك ەرەكشەلىكتەرىنە قاراماستان، ءبىلىم الۋعا، ەڭبەك ەتۋگە، ءوز قابىلەتىن دامىتۋعا جانە قوعامدىق ومىرگە بەلسەندى ارالاسۋعا تولىق قۇقىعى بار. سوندىقتان ينكليۋزيۆتى قوعام قالىپتاستىرۋ – بۇگىنگى كۇننىڭ ماڭىزدى مىندەتتەرىنىڭ ءبىرى.

الدىمەن ينكليۋزيا دەگەن تۇسىنىك نەنى بىلدىرەتىنىن ايتا كەتسەك. ول – قوعامداعى بارلىق ادامدارعا تەڭ مۇمكىندىك جاساۋ، ولاردىڭ ەرەكشەلىكتەرىن قۇرمەتتەۋ جانە قوعامدىق ومىرگە تولىققاندى قاتىسۋىنا جاعداي تۋعىزۋمەن تۇسىندىرىلەدى. بۇل ۇعىم تەك مۇمكىندىگى شەكتەۋلى ادامدارعا عانا ەمەس، ءار ادامنىڭ جەكە قابىلەتى مەن قاجەتتىلىگىن ەسكەرۋدى قامتيدى.

ايتا كەتەر بولساق،  ەلىمىزدە ينكليۋزيۆتى ءبىلىم بەرۋدى دامىتۋعا ەرەكشە كوڭىل ءبولىنىپ كەلەدى. ەرەكشە ءبىلىم بەرۋ قاجەتتىلىكتەرى بار بالالاردىڭ جالپى ءبىلىم بەرەتىن مەكتەپتەردە قاتارلاستارىمەن بىرگە ءبىلىم الۋىنا جاعداي جاسالىنعان.  ءار بالانىڭ بويىندا اشىلماعان قابىلەت، ەرەكشە تالانت بار ەكەنى اقيقات. ءبىرى سۋرەت سالۋعا بەيىم بولسا، ەكىنشىسى مۋزىكاعا، ەندى ءبىرى عىلىمعا، سپورتقا نەمەسە شىعارماشىلىققا قىزىعۋشىلىق تانىتادى. ەڭ باستىسى – سول قابىلەتتى دەر كەزىندە بايقاپ، دامىتۋعا مۇمكىندىك بەرۋ.

بۇگىندەرى  ارنايى مۇعالىمدەر، لوگوپەدتەر، پسيحولوگتەر مەن پەداگوگ-اسسيستەنتتەردىڭ كومەگى، بەيىمدەلگەن وقۋ باعدارلامالارى جانە قولايلى ورتا بالالاردىڭ ءبىلىم الۋىنا مۇمكىندىك جاساۋدا. دەگەنمەن، ينكليۋزيۆتى ءبىلىم بەرۋ تەك ارنايى مامانداردىڭ جۇمىسى ەمەس ەكەنىن دە ءتۇسىنۋىمىز كەرەك. بۇل – مۇعالىمنىڭ، اتا-انانىڭ، وقۋشىنىڭ جانە بۇكىل قوعامنىڭ ورتاق جاۋاپكەرشىلىگى.

ەرەكشە قابىلەتتەردى قولداۋ – بولاشاققا سالىنعان ينۆەستيتسيا

ءاربىر ادامنىڭ بويىندا بەلگىلى ءبىر قابىلەت پەن تالانت بولاتىنىن ايتتىق. كەيدە سول قابىلەتتىڭ اشىلۋىنا قوعامداعى تۇسىنىسپەۋشىلىك، قولايسىز ورتا نەمەسە قاجەتتى قولداۋدىڭ بولماۋى كەدەرگى كەلتىرۋى مۇمكىن. سوندىقتان مۇنداي  ادامدارعا قولداۋ كورسەتۋ – تەك الەۋمەتتىك كومەك كورسەتۋ ەمەس، ولاردىڭ مۇمكىندىكتەرىن اشۋعا جول اشۋ.

اتالعان ازاماتتاردىڭ اراسىندا ونەردە، سپورتتا، عىلىمدا، بىلىمدە جانە كاسىپكەرلىك سالاسىندا ۇلكەن جەتىستىكتەرگە جەتىپ جۇرگەن جاندار كوپ ەكەنىن كۇندەلىكتى ومىردە كرىپ ءجۇرمىز. ولاردىڭ ءومىر جولى تاباندىلىقتىڭ، قايسارلىقتىڭ جانە جىگەردىڭ ۇلگىسى بولا الادى. وسىنداي ازاماتتارعا جاعداي جاساۋ ارقىلى مەملەكەت قوعامنىڭ ادامي كاپيتالىن دامىتادى.

ول ءۇشىن قولجەتىمدى عيماراتتار، ارنايى جابدىقتالعان جۇمىس ورىندارى، ساپالى مەديتسينالىق جانە وڭالتۋ قىزمەتتەرى، كاسىبي ءبىلىم الۋ مۇمكىندىكتەرى قاراستىرىلۋى اسا ماڭىزدى. سونىمەن قاتار مۇمكىندىگى شەكتەۋلى ازاماتتاردىڭ ەڭبەك نارىعىندا ءوز ورنىن تابۋىنا، كاسىپ اشۋىنا جانە قوعامدىق جۇمىستارعا قاتىسۋىنا قولداۋ كورسەتىلۋى قاجەت.

مۇمكىندىگى شەكتەۋلى ادامدارعا قۇرمەتپەن قاراۋ – تەك ءسوز جۇزىندەگى ىزگى نيەت ەمەس، كۇندەلىكتى ومىردەگى ناقتى ءىس-ارەكەتتەن كورىنۋى ءتيىس. كەيدە ادامداردىڭ اياۋشىلىق تانىتۋى نەمەسە ولاردى قوعامنان بولەك قاراستىرۋى دا ادامنىڭ كوڭىلىنە قاياۋ ءتۇسىرۋى مۇمكىن. سوندىقتان ەڭ دۇرىس ۇستانىم – ولاردى اياۋشىلىق نىسانى رەتىندە ەمەس، ءوز ارمانى، ماقساتى، تالانتى مەن مۇمكىندىگى بار تەڭ قۇقىلى ازامات رەتىندە قابىلداۋ.

پرەزيدەنت جولداۋىندا كوتەرىلگەن الەۋمەتتىك ادىلەتتىلىك پەن تەڭ مۇمكىندىك قاعيدالارى ءاربىر ازاماتتىڭ ءومىر ساپاسىن جاقسارتۋعا باعىتتالعان. بۇل مىندەتتەردى ورىنداۋ مەملەكەت پەن قوعامنىڭ بىرلەسكەن ارەكەتىن تالاپ ەتەدى. ءار مەكەمە، ءار ءبىلىم بەرۋ ۇيىمى، ءار وتباسى ءوز دەڭگەيىندە ينكليۋزيۆتى ورتا قالىپتاستىرۋعا ۇلەس قوسا الادى.

قورىتىندىلاي كەلە، ەرەكشە قابىلەتتەرى مەن قاجەتتىلىكتەرى بار ادامداردى قولداۋ – مەملەكەتتىڭ عانا ەمەس، بۇكىل قوعامنىڭ ادامگەرشىلىك بورىشى ەكەنىن ەسكەرگەن ءجون. ءار ادامعا قۇرمەت كورسەتۋ، ونىڭ قابىلەتىن باعالاۋ جانە دامۋىنا مۇمكىندىك بەرۋ ارقىلى ءبىز مەيىرىمدى، ادىلەتتى ءارى وركەنيەتتى قوعام قالىپتاستىرامىز. ويتكەنى ناعىز دامىعان مەملەكەت – ەشبىر ازاماتىن نازاردان تىس قالدىرمايتىن، ءار ادامنىڭ قۇندىلىعىن مويىندايتىن مەملەكەت. مىنە، وسى سەبەپتى  مەملەكەت باسشىسىنىڭ بيىلعى جولداۋىنىڭ ماعىزدىلىعى ارتا تۇسەدى.

سىرىم ءابىل، زاڭگەر

Abai.kz

0 پىكىر