شەنجەندەگى ۇشەۋدىڭ كەزدەسۋى: كىم، نە دەدى؟
ترامپ، پۋتين مەن ءشيدىڭ ۇشجاقتى كەزدەسۋى ءوتتى. ساراپشى جۇرت «جاڭا يالتا» كەزدەسۋى دەپ ايدارلاپ ات قويعان بۇل ۇزىن-ىرعاسى 1,5 ساعاتقا سوزىلعان.
ترامپ نە دەدى؟
ترامپ پۋتين مەن ءشيدى يادرولىق قارۋدىڭ تارالۋىنا قارسى كۇرەستە ىنتىماقتاسۋعا شاقىردى!
شەنجەندە وتكەن ۇشجاقتى كەزدەسۋدە ءسوز سويلەگەن اقش پرەزيدەنتى رەسەي مەن قىتاي باسشىلارىنا يادرولىق قارۋدىڭ تارالۋىنا جول بەرمەۋ ءۇشىن كۇش بىرىكتىرۋ تۋرالى ۇندەۋ جاسادى.
▪️ ترامپتىڭ ايتۋىنشا، يادرولىق قارۋ ءبىر پايدا بولعاننان كەيىن ودان باس تارتۋ وتە قيىن: «الەمنىڭ جۇمىس ىستەۋ قاعيداتى وسىنداي»، - دەدى ترامپ.
▪️ ول اقش، رەسەي جانە قىتاي باسقا ەلدەر تاراپىنان تونەتىن يادرولىق قاۋىپكە بىرگە قارسى تۇرۋى ءتيىس ەكەنىن ايتتى.
▪️ ترامپ ۋاشيڭتوننىڭ يرانعا قاتىستى ءدال وسى باعىتتا جۇمىس ىستەپ جاتقانىن ايتتى.
اق ءۇي ۇشجاقتى كەزدەسۋدىڭ كۇن تارتىبىندەگى باستى ماسەلە رەتىندە يادرولىق قارۋدى تاراتپاۋ تاقىرىبىن اتاعان بولاتىن: بۇعان دەيىن ترامپتىڭ شي جانە پۋتينمەن الەمدىك يادرولىق ارسەنالداردى قىسقارتۋ، سونداي-اق يران توڭىرەگىندەگى جاعدايدى تالقىلاۋعا نيەتتى ەكەنى حابارلانعان ەدى.
شي نە دەدى؟
قىتاي توراعاسى شي ۇشجاقتى كەزدەسۋدە يادرولىق قارۋعا تولىق تىيىم سالىپ، ونى جويۋ قاجەتتىگىن مالىمدەدى!
قحر توراعاسى مۇنداي قارۋدىڭ ادامزات باسىنا ءتونىپ تۇرعان «داموكل قىلىشى» ىسپەتتى ەكەنىن اتاپ ءوتتى.
ءشيدىڭ ايتقاندارى:
▪️ الەمدە تىنىشتىق ورناۋى ءۇشىن الپاۋىت دەرجاۆالاردىڭ ءوزارا تاتۋلىعى قاجەت;
▪️ ءىرى دەرجاۆالار اراسىنداعى سىندارلى ءوزارا ءىس-قيمىل — «تاڭداۋ ماسەلەسى ەمەس، مىندەتتى تالاپ»;
▪️ بەيجىڭ رەسەيمەن «جاڭا داۋىردەگى» جان-جاقتى ستراتەگيالىق ارىپتەستىك پەن ءوزارا ۇيلەسىمدىلىكتى دامىتىپ كەلەدى جانە اقش-پەن سىندارلى، ستراتەگيالىق تۇرعىدان تۇراقتى قارىم-قاتىناس ورناتۋعا ۇمتىلادى;
▪️الپاۋىت دەرجاۆالار تاتۋ ءومىر سۇرسە، الەمدە تىنىشتىق بولادى. ال جاۋلاسسا، الەم حاوسقا ۇرىنادى. سوندىقتان قىتاي، اقش جانە رەسەي جاھاندىق ماسەلەلەردى بىرلەسىپ شەشىپ، بەيبىتشىلىك پەن تۇراقتىلىقتى قورعاۋى ءتيىس دەدى.
پۋتين نە دەدى؟
پۋتين رەسەي، اقش جانە قىتايدىڭ جانجالداردى، سونىڭ ىشىندە ۋكراينا ماسەلەسىن رەتتەۋدە ورتاق مۇددەلەرى كوپ ەكەنىن ايتتى.
▪️ بۇۇ قاۋىپسىزدىك كەڭەسىنىڭ ءۇش تۇراقتى مۇشەسىنىڭ باسشىلارى قاتىسقان وسىنداي فورماتتاعى كەزدەسۋدى ۇيىمداستىرعانى ءۇشىن شي توراعاعا العىس ايتامىن. ءدال وسىنداي فورماتتاعى باسقوسۋدىڭ ماڭىزى وتە جوعارى;
▪️ ءبىزدىڭ ەلدەرىمىزدى ەكىنشى دۇنيەجۇزىلىك سوعىستاعى جەڭىمپازدار مارتەبەسى عانا ەمەس، بەيبىتشىلىك پەن قاۋىپسىزدىك ءۇشىن ورتاق جاۋاپكەرشىلىك تە بىرىكتىرەدى. العا قويىلعان مىندەت — حالىقارالىق قۇقىق جۇيەسىن، بۇۇ جارعىسى مەن ونىڭ قاعيداتتارىن ساقتاۋ جانە نىعايتۋ;
▪️ تالقىلانعان تاقىرىپتار قاتارىندا جاھاندىق جانە وڭىرلىك ەكونوميكالىق بايلانىستار، ازىق-تۇلىك جانە ەنەرگەتيكالىق قاۋىپسىزدىك بار;
▪️ وڭىرلىك جانجالداردى، سونىڭ ىشىندە ۋكراينا داعدارىسىن رەتتەۋدە ءۇش ەلدىڭ مۇددەلەرى كوپ جاعدايدا سايكەس كەلەدى. ءبىز بۇل تاقىرىپتى كەشە قىتايمەن تالقىلادىق، ال بۇگىن ترامپتىڭ باستاماسىمەن ەكىجاقتى كەزدەسۋدە دە وسى تاقىرىپقا كوپ كوڭىل بولدىك;
▪️ حالىقارالىق تەرروريزمگە جانە ترانسۇلتتىق ۇيىمداسقان قىلمىسقا قارسى كۇرەستە دە ورتاق مۇددەلەرىمىز بار دەدى.
«ءبىزدىڭ ءۇش مەملەكەتىمىز — ەكىنشى دۇنيەجۇزىلىك سوعىستاعى جەڭىمپاز ەلدەر، ءارى ءبىز حالىقارالىق بەيبىتشىلىك پەن قاۋىپسىزدىكتى ساقتاۋعا ورتاق جاۋاپتىمىز»، - دەيدى پۋتين.
Abai.kz