ەرتەدە، سوناۋ قاراڭعى داۋىرلەردە، يسلام اقيقاتى تۋرالى ادامزات بالاسى ءالى بىلمەيتىن كەزدە ادامدار ناداندىقتىڭ سالدارىنان قۇداي دەپ پۇتقا تابىندى. اركىم ءوزى قالاعان قۇدايىن قولدان جاساپ الدى. اسىرەسە ماڭگى جاسىل اعاشتار ادامداردىڭ ەرەكشە قۇرمەتىن تۋعىزىپ، قۇدايدىڭ بەينەسى رەتىندە قابىلداندى. جوق، اڭگىمە تۇلپار مىنگەن تۇركىلەر - ءبىزدىڭ ارعى بابالارىمىز تۋرالى ەمەس. ولار كوك تاڭىرىگە ءتاۋ ەتەتىن. اعاشقا تابىناتىندار «ءوزى سارى، كوزى كوك، بىلشىلداعان ءسوزى كوپ» جاتجەرلىكتەر ەدى. سونىمەن، ولار اۋەلدە ورمانعا بارىپ ماڭگى جاسىل شىرشاعا تابىناتىن. وعان ءتۇرلى اشەكەيلەر ءىلىپ، ساندەپ قوياتىن. كەيىن كەلە شىرشانى ۇيىنە اكەلىپ، وشاق باسىنداعى ەڭ قۇرمەتتى ورىن - تورگە وتىرعىزاتىن بولدى. جىلدار جىلجىپ، زامان وتە كەلە بۇل جاپپاي داتۇرگە اينالىپ، ماجۇسيلەردىڭ ءومىر-سالتىنىڭ اجىراماس بولشەگى بولدى. كەڭەس داۋىرىندە قۇدايدى جوققا شىعارعان اتەيستەر اعاش قۇدايدى كەڭ ناسيحاتتاعانى سونشاما، «جاڭا جىل» دەگەن بۇركەمە اتپەن پۇتقا تابىنۋ كەڭ ەتەك الدى. كەڭەس حالقى، ۇلتىنا، تىلىنە، دىلىنە قاراماستان جىلىنا ءبىر رەت كەلەتىن «جاڭا جىلدى» اسىعا توساتىن. تاعاتسىزدارى جاڭا جىلدان ءبىر اي بۇرىن، سابىرلىلارى ءبىر اپتا بۇرىن ۇيلەرىنە شىرشا ەنگىزىپ، سانالى تۇردە پۇتقا تابىنىپ، اشەكەي ىلىنگەن اعاشتى اينالا بيلەپ، كوڭىل كوتەرەتىن بولدى. بۇل حالىقتىڭ ساناسىن ۋلاۋعا، سالتىنان قول ءۇزدىرىپ، دىنىنەن اجىراتۋعا تاپتىرماس ءتاسىل ەدى. «جاڭا جىل» ميسسياسىنىڭ ءوز مىندەتىن مۇلتىكسىز اتقارعانى سونشاما كۇنى بۇگىنگە دەيىن كوپتەگەن «ساناسىز قازاقتار» ونى سالتىمىز دەپ ءجۇر. جوق، بۇل ماجۇسيلەردىڭ، حريستيانداردىڭ سالتى دەگەن جاننىڭ باسى بالەگە قالاتىن بولدى. ەلباسىمىز باستاپ، اكىم قارالار قوستاپ جىل سايىن شىرشا شامىن جاعىپ، جاڭا جىلدىق مەرەكەنى (پۇتقا تابىنۋ سايقىمازاعىن) اشىق دەپ جاريالايدى. ءايدا، سوسىن باستالادى جىن-ويناق. يسلام تيىم سالاتىن بارلىق حارام ىستەر وسى جاڭا جىل قارساڭىندا ىسكە اسادى. شەلەك-شەلەك شاراپ ءىشىلىپ، ماستىقتىڭ جەلىگىمەن اۋىز ايتىپ جەتكىزگىسىز كۇنالار جۇزەگە اسادى. شايتان شاپالاعىن شاتتانا سوعىپ، كوك اسپاندى توزاق وتىمەن ايشىقتايدى.

قۇداي-اۋ، مەنىڭ تۋعان حالقىم مۇنشاما قور بولاتىنداي نە جازىپ ەدى؟ ايدىڭ-كۇننىڭ امانىندا اللاعا سەرىك قوسىپ، جۇماققا بارار جولدى ءبىرجولاتا جاۋىپ تاستايتىنداي قازاققا يمان ءناسىپ ەتپەدى مە؟ يمانسىزداردىڭ جىن-ويناعى قاشان تيىم بولادى؟ جاڭا جىلدى تويلاماي قويساق، ۇيىمىزگە شىرشا قۇدايدى كىرگىزبەي قويساق شىرايىمىز كەتە مە؟ الدە، شىنىمەن جاڭا جىلدى جەلەۋ ەتىپ بيلىك باسقا دا ماڭىزدى مەرەكەلەردى ەلەپ ەسكەرمەۋگە ۇمىتىلىپ ءجۇر مە؟ شىنىمەن-اق تاۋەلسىزدىك مەرەكەسى مەن جەلتوقسان وقيعاسى «جاڭا جىل» جىن ويناعىنىڭ كولەڭكەسىندە قالىپ قادىرى كەتە بەرە مە؟ قازىر كەز كەلگەن پەكتەپ وقۋشىسىنان «الدا قانداي مەرەكە، اتاۋلى كۇن بار؟» دەپ سۇراڭىزشى، الدىمەن جاڭا جىلدى ايتادى. سوسىن قينالا-قينالا تاۋەلسىزدىك كۇنى مەن جەلتوقسان كوتەرىلىسىن ەسكە تۇسىرەدى. بۇل سۇمدىق ەمەي، نەمەنە؟!

ايتپاقشى، بولاشاعىڭىز بالاڭىزدى اياز اتا تۋرالى ءتاتتى ەرتەگىمەن الداعاندى قويىڭىز. ول ەرتەگى كەيىپكەرى ەمەس، ومىردە بولعان تاريحي تۇلعا. IV عاسىردا كىشى ازيادا اۋليە نيكولاس عاجايىپ اتتى ادام ءومىر ءسۇردى. كاتوليك ءدىنى ونى انشەيىن اۋليە نيكولاس نەمەسە كلاۋس دەيدى. ول ادام سەنگىسىز سيقىرلىقتار جاساي الاتىن. نيكولاي تۋرالى كوزى تىرىسىندە-اق اڭىز اڭگىمە كوپ ايتىلاتىن ەدى. كەلە-كەلە ول مەيىرىمدى، بالالاردىڭ قامقورى، قولى اشىق جومارت ءارى اق ساقالدى شالدىڭ بەينەسىندەگى اياز اتاعا اينالدى. قار-اكەي، شەن دان لاوجەن، سانتا-كلاۋس، پەر نوەل، ميكالاۋس، Father Cristmas, Weihnachtsmann, يوۋلۋپۋككي (فين تىلىندە - Joukipuki) - مىنە، مۇنىڭ بارلىعى ونىڭ ءارتۇرلى اتالاتىن ەسىمدەرى. بۇل بابامىز باتاسىنا قوسقان اۋليە قىدىر اتا ەمەس. ەندەشە ۇكىلەگەن ءۇمىتىڭىزدى، ەرتەڭىڭىزدى ەلەسپەن الداماڭىز.

سونىمەن، شايتاننىڭ شاتتاناتىن كەزى كەلىپ جەتتى. شايتانعا رۋحى مىقتى جان عانا قارسىلىق كورسەتە الادى. ەندەشە، «اعاش قۇدايدى» وتقا تاستاپ، ءوز ءدىنىمىزدى، سالتىمىزدى ۇلىقتايتىن كەزىڭىز وسى. وسىلايشا قوعامدى جايلاعان شايتاني ىستەرگە ارقايسىمىز قارسىلىق كورسەتسەك عانا ۇلىمىز يماندى، قىزىمىز يبالى بولار. كەسپىرسىز كلاۋس پەن كورگەنسىز قارشاقىزدى بوساعادان سىعالاتپاڭىز. ەسەسىنە، ەسى كەتكەن ەل دۇرلىگىپ جاڭا جىلدى توساتىن جەلتوقساندا ۇرپاعىڭىزعا تاۋەلسىزدىكتى نە ءۇشىن ءتاۋ ەتەتىنىمىزدى، جەلتوقسان كوتەرىلىسىن نەگە ۇلىقتايتىنىمىزدى ۇقتىرساڭىز ۇتپاساڭىز ۇتىلمايسىز. تاڭداۋ ەركى وزىڭىزدە - شايتانمەن بىرگە شاپالاق ۇرىپ شاتتاناسىز، نە ۇلاعاتتى ۇرپاق وسىرگەن ونەگەلى جانعا اينالاسىز.

بايجان دۋباي، «اباي-اقپارات».