ماسەلە – اربادا ەمەس، «ەسەكتە»
بۇرناعى كۇنى ءبىلىم جانە عىلىم مينيسترلىگى ورتا ءبىلىم دەپارتامەنتىنىڭ ديرەكتورى نۇرعالي ارشابەكوۆ قازاقستان ماتەماتيكا ءپانىنىڭ 1,5 مىڭ مۇعالىمىنە مۇقتاج ەكەنىن ايتىپ قالدى. بۇل نەنى كورسەتەدى؟ مامان تاپشىلىعى ءبىلىم سالاسىنا قانداي قاتەر اكەلمەك؟ اكادەميك، پروفەسسور، بەلگىلى ماتەماتيك اسقار جۇمادىلداەۆقا قويعان العاشقى سۇراعىمىز وسىدان باستالىپ ەدى.
بۇرناعى كۇنى ءبىلىم جانە عىلىم مينيسترلىگى ورتا ءبىلىم دەپارتامەنتىنىڭ ديرەكتورى نۇرعالي ارشابەكوۆ قازاقستان ماتەماتيكا ءپانىنىڭ 1,5 مىڭ مۇعالىمىنە مۇقتاج ەكەنىن ايتىپ قالدى. بۇل نەنى كورسەتەدى؟ مامان تاپشىلىعى ءبىلىم سالاسىنا قانداي قاتەر اكەلمەك؟ اكادەميك، پروفەسسور، بەلگىلى ماتەماتيك اسقار جۇمادىلداەۆقا قويعان العاشقى سۇراعىمىز وسىدان باستالىپ ەدى.
اسقار جۇمادىلداەۆ: ءبىز تەك ماتەماتيكا ەمەس، ناقتى عىلىمدار سالاسىنداعى ماماندارعا دا مۇقتاجبىز. ديپلومى بارلار كوپ. بىراق بىلىمدىلەر از. «مەن» دەگەن ماتەماتيكتەردىڭ ءوزى ەكىگە بولىنەدى: ءبىرى – ەسەپ شىعارا الاتىندار، ەكىنشىسى – ەسەپ شىعارا المايتىندار. بۇل كۇلكىڭىزدى كەلتىرۋى مۇمكىن. شىن مانىندە سولاي. مينيسترلىكتەگىلەردىڭ «ماماندارعا مۇقتاجبىز» دەپ وتىرعانى، مەنىڭ ويىمشا، بىزدە ەسەپ شىعارا الاتىن ماتەماتيكتەر جوق دەگەن ءسوز.
جاس قازاق: بىلىمدىلەردىڭ ءبارى جات جۇرتقا «جۇتىلىپ» جاتىر ەمەس پە؟ «ميلى باستارىمىز» ءبىزدى ەمەس، باتىستى باقىتتى ەتۋدە. بىزدە جاعداي جوق پا؟ الدە ولاردا نيەت جوق پا؟
اسقار جۇمادىلداەۆ: جوق. جاعداي بار عوي. بىراق شەتەلدە ودان دا جاقسى.
جاس قازاق: ءسىز كەزىندە شەتەلدىڭ بەلدى-بەلدى وقۋ ورىندارىندا ءدارىس وقىدىڭىز. قازاقستانعا كەلگەنىڭىزدە، ءبىر بايقاعانىمىز، تەك جەكەمەنشىك وقۋ ورىندارىندا عانا ساباق بەردىڭىز. ەكونوميكالىق سەبەپ ءسىزدىڭ مۇحيت اسۋىڭىزعا، جەكەمەنشىك ۋنيۆەرسيتەتتەردە جۇمىس ىستەۋىڭىزگە اسەر ەتتى مە؟
اسقار جۇمادىلداەۆ: ءيا، ونىڭ ەكونوميكالىق سەبەپتەرى بولدى. ويتكەنى جەكەمەنشىك وقۋ ورىندارى جالاقىنى كوبىرەك تولەدى. ماعان جاعداي جاسادى. مەملەكەتتىك ۋنيۆەرسيتەتكە بارسام، ولار مەنەن ازاننان كەشكە دەيىن قاعاز سۇرايدى. «جوسپار تولتىر، ەسەپ بەر» دەپ. تولىپ جاتقان جينالىس. بەرەتىن اقشالارى دا از. ءسويتىپ، قولىمدى ءبىر سىلتەدىم دە، كەتىپ قالدىم.
جاس قازاق: قوعامدا «عىلىم وشاقتارى شالداردىڭ ساۋىن سيىرىنا اينالىپ كەتتى. قازاق عىلىمىنا «اقساقاليزم» دەرتى دەندەۋدە» دەگەن كوزقاراس بار. «اقساقالشىلدىق» قازاق عىلىمىنا قانشالىقتى قاۋىپتى؟
اسقار جۇمادىلداەۆ: عىلىم اكادەمياسىندا تۇلعالىق سيپاتى، تياناقتى كوزقاراسى جوق ءپرينتسيپسىز «اقساقالداردىڭ» بولعانى راس. سولار «ويباي، ءبىز – كەڭەس ۇكىمەتىنىڭ سارقىنشاعىمىز، عىلىمدى قاتىرامىز، اكادەميانى تاراتىڭىز» دەپ پرەزيدەنتكە حات جازدى. سول جەردىڭ نانىن جەپ، وزدەرى ىشكەن قۇدىقتارىنا وزدەرى تۇكىرگەن ولاردى ەندى قالاي اقتاپ الاسىز؟ وسىنداي ەكىجۇزدى شالداردىڭ كەسىرىنەن اكادەميا جابىلدى. عىلىم ەندى ءتاي-ءتاي باسقاندا، 50 جىل تۇرعان اكادەميانى الدى، دا جاۋىپ تاستادى. «ءاي، بىزدىكى وسى دۇرىس پا ءوزى؟» دەپ باس كوتەرگەن ءبىر تۇلعا بولمادى.
جاس قازاق: بىزدە عىلىمي اتاق العاندار كوپ، بىراق عالىم از.
اسقار جۇمادىلداەۆ: مانساپقور قازاقتاردىڭ كوبەيىپ كەتكەنى راس. ونى قالاي توقتاتامىز؟ مەن ونىڭ مەحانيزمدەرىن بىلمەيمىن. مىسالى، مەن دوكتورلىق قورعاعاندا، قازاقستان بويىنشا وسى سالادا ءتورت-اق دوكتور بولاتىن. قازىر ول 100-گە جەتتى مە، 200-گە جەتتى مە، مەن ونىڭ ناقتى سانىن بىلمەيمىن. ال قازىرگى عىلىمنىڭ دەڭگەيى كەڭەس وداعىنداعى دەڭگەيدەن اسقان جوق. وندا دا جۇمىس ىستەپ جۇرگەن ماماندار – كەڭەس كەزىندەگى عالىمدار. «بولاشاقپەن» اندا-مۇندا كەتىپ جاتىر عوي. بىراق كۇمانىم بار. ولاردىڭ بىرازىمەن سويلەستىم. قارنىم اشتى. شەتەلدىكتەر قازاقتارعا نە وقىتىپ جاتىر؟ تۇسىنبەيمىن.
جاس قازاق: سوندا قازاق عىلىمىنىڭ دوڭگەلەگىنىڭ اينالىسىن تەجەپ وتىرعان نە نارسە؟
اسقار جۇمادىلداەۆ: بۇل – ۇلكەن اڭگىمە. عىلىم شاما-شارقىنشا دامىپ جاتىر. بىراق ساباقتاستىق جوق، عالىمداردىڭ ءىزىن باسۋشىلار جوق. اڭگىمە سوندا. ساناۋلى عانا عالىمدار بار. قالعاندارى ءنول. ءبىلىم جانە عىلىم مينيسترلىگى «جىلدىڭ ۇزدىك مۇعالىمى» دەگەندى شىعاردى. ونىڭ ءبىلىمى قانداي، دارەجەسى قايسى؟ وعان كوڭىل ءبولىپ جاتقان ەشكىم جوق. جازعان-سىزعاندارىن، بىردەمەنى شيمايلاعاندارىن سانايدى دا، «ۇزدىك» قىلىپ شىعارادى دا قويادى.
ۋنيۆەرسيتەتتەردە كۇن سايىن تەكسەرۋ بولادى. ستۋدەنت 15 مينۋتقا كەشىگىپ قالسا، جينالىسقا سالادى، دەكاننىڭ الدىنا كىرگىزەدى، رەكتورعا تۇسىنىكتەمە جازدىرتادى. ال ەرتەڭ ءسىز 15 جىل بويى عىلىممەن اينالىسپاي، تۇك بىتىرمەي جۇرسەڭىز، ونى ەشكىم بايقامايدى.
وتكەن جولى ماتەماتيكتەردىڭ ءبىر بايقاۋىنا قاتىستىم. ءبىر ماتەماتيككە قازىلار «ءوزىن ۇستاۋى ناشار، جاقسى سويلەي المايدى» دەپ ورىن بەرمەي قويدى. مەن ايتتىم: «ە، كوكە، وعان ءسوزدىڭ نە قاجەتى بار. ول ماتەماتيك قوي». جۇلدەگەردى انىقتاۋ ءۇشىن بىرقانشا تالاپ تاعايىنداپتى. ونىڭ ىشىنە ءجۇرىس-تۇرىسى، كيىم كيىسى، سويلەۋ مانەرى ت.ب. قاتىستى سۇراقتاردى كىرگىزىپ قويعان. ەش جەرىندە «ەكىنى ەكىگە قوسساڭ، قانشا بولادى؟» دەگەن سۇراق جوق. بايقاپ قالدىم، ءبىرىنشى ورىن العان ادامنىڭ ەسەبى قاتە. سويتسەم، ول ەكىنى ەكىگە قوسا المايتىن بالا بولىپ شىقتى. بايقاۋدىڭ «شارتى» سونداي ەكەن.
قاعاز جۇزىندە ءبارى قاتىپ تۇر. مينيسترلىكتىڭ جوسپارىندا ءمىن جوق. بىراق ونى تەكسەرىپ جاتقان ەشكىم جوق. ءبىر مىسال ەسىمە ءتۇسىپ تۇر. ءبىر حان ۋازىرىنە: «اناۋ قاڭباقتان قايدا كەتىپ بارا جاتقانىن سۇراشى»، – دەگەن كورىنەدى. قاڭباقتىڭ جاۋابىن جەتكىزگەن ءۋازىر بىلاي دەپتى: «قاڭباقتىڭ قايدا باراتىنىن سۇراتقان حان اقىماق پا، سۇراپ كەلگەن سەن اقىماق پا؟ مەنىڭ ۇشارىمدى جەل، قونارىمدى ساي بىلەدى». سول ايتپاقشى، مەن دە تۇسىنبەيمىن: وسى جۇيەنى جاساپ وتىرعان جوعارىداعىلار اقىماق پا، الدە سول جۇيەمەن جۇمىس ىستەپ جاتقان ءبىز اقىماق پا؟ كىم اقىماق؟ مەن وسىنى تۇسىنبەيمىن. ءبارى وتىرىك، كوزبوياۋشىلىق.
جاس قازاق: ونىڭ ۇستىنە، ءبىلىمدى بيزنەسكە اينالدىرىپ جىبەرگەندەيمىز...
اسقار جۇمادىلداەۆ: PhD دەگەن جۇيە – ناعىز سول ءسىز ايتىپ وتىرعان بيزنەستىڭ ءوزى عوي. مىسالى، ءسىز كانديداتتىق قورعاساڭىز، ون شاقتى ادام عىلىمي جۇمىسىڭىزدى تالقىلايدى. كوميسسيا دەگەن بولادى. ال PhD-دە ءسىز وزىڭىزگە جاقىن ەكى-ءۇش ادامنىڭ باسىن قوسىپ، عىلىمي اتاق الا سالاسىز. ويتكەنى پىكىر بەرۋشىلەر – ءسىزدىڭ تانىستارىڭىز. بۇل سۇمدىق قوي. بۇل بيزنەس ەمەي نەمەنە؟
جاس قازاق: پرەزيدەنت ءبىر كۇنى ءسىزدى شاقىرىپ الىپ: «ال اسقار، ۇنەمى سىناپ جۇرەتىن وسى سالانىڭ جۇمىسىن ەندى ءوزىڭ دوڭگەلەت» دەپ ءبىلىم جانە عىلىم ءمينيسترى قىلىپ قويسا، جۇمىستى نەدەن باستار ەدىڭىز؟
اسقار جۇمادىلداەۆ: الدىمەن قىزمەت ۇسىنسىن، سوسىن كورەمىز.
جاس قازاق: تۇلعالاردى ساياسي ماقساتتارعا پايدالانۋ – بۇرىننان كەلە جاتقان ءۇردىس. ءسىزدىڭ بەدەلىڭىزدى پايدالانعىسى كەلگەن ساياسي كۇشتەر بولدى ما؟
اسقار جۇمادىلداەۆ: ونداي ۇسىنىستار بولدى. بولا بەرەدى دە. ولاردىڭ قولشوقپارى بولعاندا، قازىر مەن ساياساتتا جۇرگەن بولار ەدىم.
جاس قازاق: بىراق ءسىز كەزىندە «اق جول» پارتياسىنىڭ مۇشەسى بولدىڭىز ەمەس پە؟
اسقار جۇمادىلداەۆ: ءيا، راس، مەن ول پارتياعا كەزىندە سانالى تۇردە كىردىم. قىزىق بولعاندا، سول كەزدە ماعان ەشكىم پارتيا بيلەتىن بەرگەن جوق. ەشقانداي دا ءوتىنىش تولتىرعان جوقپىن. التىنبەك سارسەنباەۆ ءوتىنىش بىلدىرگەن سوڭ، سانالى تۇردە كىردىم. ونىڭ ويلارىن قولدادىم. ول پاراساتتى جىگىت ەدى. وزدەرى ءبولىنىپ كەتكەن سوڭ، شىنىمدى ايتسام، ولاردى قولدامادىم. ويتكەنى اتتاي ازاماتتار ءوزارا قىرقىسىپ كەتتى.
جاس قازاق: قازىر قاي پارتياعا مۇشەسىز؟
اسقار جۇمادىلداەۆ: ەشقانداي پارتيادا جوقپىن. ەگەر مۇشە بولسام، ماعان بۇزىق سويلەۋگە تۋرا كەلەدى عوي. بىرەۋدى جامانداۋ كەرەك دەگەندەي...
جاس قازاق: پارتياعا كىرمەۋىڭىزدىڭ سىرى وسى بولدى عوي.
اسقار جۇمادىلداەۆ: ءيا. ونىڭ ۇستىنە، قازىرگى پارتيالاردىڭ باعدارلامالارىنان مەن ايىرماشىلىق كورمەيمىن. ءبارى بىردەي. جامان بول دەپ ەشكىم ايتپايدى. ەڭ مىقتى باعدارلاما – قۇران. ءبارى سونىڭ توڭىرەگىندە سويلەيدى.
جاس قازاق: اكادەميكتەن جاقسى ساياساتكەر شىعۋى مۇمكىن عوي. نەگە ساياساتپەن اينالىسپايسىز؟
اسقار جۇمادىلداەۆ: ونىڭ ماعان نە قاجەتى بار؟ وسى كۇنگە دەيىن ازدى-كوپتى عىلىممەن اينالىستىم، ءبىراز دارەجەگە جەتتىم، ەندى وسىنى ساياساتقا ارالاستىرسام نە بولادى؟ ساياساتكەرلەر مەنسىز دە جەتىپ جاتىر. ال عالىمدار از. مەن كەتىپ قالسام، عىلىم وكپەلەپ قالماي ما؟ اباي ايتادى عوي: «ولسەم، ورنىم قارا جەر سىز بولماي ما؟ وتكىر ءتىل ءبىر ۇيالشاق قىز بولماي ما؟» دەپ. عىلىم دەگەن ۇيالشاق قىز عوي.
ساياسات دەگەن نە ول؟ ساياسات دەگەن – سايىن كوشەسىندەگى «بىردەڭە»...
جاس قازاق: ءسىزدى قازىرگى بيلىكتىڭ ساياساتى قىزىقتىرمايتىن سياقتى.
اسقار جۇمادىلداەۆ: مەن بىلمەيمىن. شىنىمدى ايتسام، ول تۋرالى كوپ ويلامايمىن. ماعان ءبارىبىر. ماعان، بىرىنشىدەن، تىنىشتىق بەرسە، ەكىنشىدەن، جۇمىسىمدى الىپ قويماسا بولدى. قالعانىنىڭ ءبارىن ءوزىم جاساي بەرەمىن. ەشكىم كومەكتەسپەي-اق تا قويسىن. بىرەۋلەر مەن تۋرالى ەندى ءبىر ءسوز ايتا باستاعاندا: «ەي، كوكە، مەنى ماقتاماي-اق قويا سال. ونداي كومەگىڭنىڭ كەرەگى جوق. ءبىر-اق ءوتىنىشىم بار: ماعان كەدەرگى جاساماشى. باسقا نارسەڭنىڭ كەرەگى جوق»، – دەيمىن.
جاس قازاق: ناعىز عالىمداردان باستىق شىقپايدى دەپ جاتادى. سول راس پا؟
اسقار جۇمادىلداەۆ: مەنىڭ ءبىر مۇناي كومپانياسىندا باستىق بولىپ جۇمىس ىستەيتىن ماتەماتيك دوسىم بار. سول ايتادى: «مەنىڭ جۇمىسىمنىڭ 70-80 پايىزىن حاتشىم ىستەيدى. مەن تەك وزىمنەن ۇلكەن باستىقتار كەلسە، جاقسىلاپ كۇتىپ جىبەرەمىن. بولدى. باسقا ەشتەڭە ىستەمەيمىن». ول وتىرىك ايتپايدى. وتىرىك سويلەسە، مەن ونى بىردەن سەزىپ قوياتىنىمدى بىلەدى. باستىق بولۋ – ەڭ وڭاي شارۋا. ول ءبىلىمدى تالاپ ەتپەيدى. دوكتور بولۋدىڭ قاجەتى جوق. باستىقتاردىڭ «باسسىز» بولاتىنى سوندىقتان.
جاس قازاق: ءبىر سۇحباتىڭىزدا مۇحتار شاحانوۆتىڭ «كومپيۋتەرباستى جارتى ادامدار» دەگەن تەرمينىمەن كەلىسپەيتىنىڭىزدى ايتىپسىز. «جارتى ادامداردى» جاقتايتىنىڭىزدىڭ سىرى نەدە؟
اسقار جۇمادىلداەۆ: قازاقتىڭ تەحنيكاسى نەگە جوق؟ ويتكەنى بىزدە «كومپيۋتەرباستى» ادامدار جوق. كەيبىر ادامدار كومپيۋتەردى تەمىر دەپ سانايدى. قۇرال دەپ قارايدى. ول – قۇرال ەمەس، ونەر. قازاققا جەتپەي جاتقان كىمدەر؟ بيلل گەيتس، تەد تەرنەر، گەنريح فوردتار... مىسالى، سول گەنريح فوردىڭىز تاريح تۋرالى بىلاي دەيدى: «تاريح دەگەن – بوس ءسوز. تاريحتى ءبىز جاسايتىن بولامىز. سوندا تاريحى تەرەڭ ەلدەر ءبىزدىڭ الدىمىزدا باس يەتىن بولادى». بىزگە «ويباي، قازاقتاردى مويىنداڭدار» دەپ ەشكىمگە جالىنۋدىڭ قاجەتى جوق. وزگەنى مويىنداتۋ ءۇشىن ەڭ ءبىرىنشى تەحنيكانى دامىتۋىمىز كەرەك. ەگەر ءسىزدىڭ باسىڭىز ىستەپ تۇرسا، جۇرت ءسىزدى جاقتايدى، مويىندايدى. ونەرىڭدى، ءتىلىڭدى دە مويىندايدى. ال باسىڭىزدا تاۋىقتىڭ ميىنداي مي بولماسا، ءتىلىڭىز، ادەبيەتىڭىز، مادەنيەتىڭىزدىڭ ءبارى وزگەلەر ءۇشىن – ەكزوتيكا.
جاس قازاق: قازاق ءتىلى – تەحنيكانىڭ ءتىلى بولا الماي جاتقانىنىڭ سەبەبىن ءسىز نەمەن تۇسىندىرەر ەدىڭىز؟
اسقار جۇمادىلداەۆ: قازاقتىڭ ءبىر كەمشىلىگى – زاماننىڭ وزگەرىپ جاتقانىن بايقاماۋىندا. قازاق تەحنوكراتتىق ەلگە اينالۋ كەرەك. تەحنيكا دەگەندە، ماسەلە ونى ساتىپ الۋدا ەمەس. ماسەلە – تەحنيكانى ءوزىمىز شىعارىپ، ءوزىمىز پايدالانۋدا. ونداي دارەجەگە جەتپەيدى ەكەنبىز، باسقاسى بوس ءسوز. نەگە؟ ءتىل – قۇرال. تەحنيكا دا – قۇرال. «قت»، «دت» ت.ب «كەرەمەت» تەرميندەردى شىعارامىز دا، ال «كاربيۋراتور»، «دۆيگاتەل» دەگەن سوزدەرگە نەگە قازاق ادەمى تەرمين ويلاپ تاپپايدى؟ سەبەبى ءبىز – اربانىڭ الدىنا ەسەكتى ەمەس، ەسەكتىڭ الدىنا اربانى قويىپ وتىرعان قازاقپىز. ەكونوميكادا، ساياساتتا، تەحنيكادا، تەحنولوگيادا قازاق ءتىلى جوق. نەگە؟ ويتكەنى تەحنوكراتتىڭ ءوزى جوق. ماسەلە نەدە؟ مەنىڭ ويىمشا، پروبلەما – «ەسەكتە». دەمەك، پروبلەمانىڭ ەسەگى – تەحنولوگيا، ال ارباسى – ءتىل. تەحنولوگيا اربانى، ياعني ءتىلدى تارتادى. بىزدىكى سەكىلدى كەرى ءجۇرۋ ەمەس.
جاس قازاق: اكادەميك اسقار جۇمادىلداەۆتىڭ كىتاپ وقىمايتىنىنا تاڭىمىز بار...
اسقار جۇمادىلداەۆ: مەن سىزگە، گازەتىڭىزدىڭ وقىرماندارىنا نەگە وتىرىك ايتۋىم كەرەك؟ مەن ابايدان باسقاسىن وقىمايمىن. «وقى، وقى جانە وقى» دەگەن – جاقسى ءسوز. بىراق ماعان جاقىنى – «وقى، وقى جانە كەرەكتى كىتاپتى وقى». بۇل ءسوز مەن ءۇشىن ءبىرىنشى سوزدەن جاقسىراق. ءسىز ءوزىڭىزدىڭ ماماندىعىڭىزعا قاتىستى كىتاپتى وقۋىڭىز كەرەك. مەديك بولساڭىز، اۋرۋحانا باسشىسى سىزدەن «ءابدىجامىل نۇرپەيىسوۆتى وقىدىڭ با؟» دەپ سۇراي ما؟ ءسىز ءۇشىن ول ماڭىزدى ەمەس.
جاس قازاق: قازاقتى ابايدان ارتىق سىناعان ەشكىم جوق شىعار. ابايدىڭ كىتابىنان باسقاسىن وقىمايمىن دەيسىز. قازاققا ازداپ سىن ايتىپ ءجۇرسىز. بۇعان اباي اتامىزدىڭ كىتابى اسەر ەتپەدى مە؟
اسقار جۇمادىلداەۆ: ءبىز ءبارىمىز ابايدىڭ ءىزباسارى بولۋعا ءتيىسپىز.
جاس قازاق: قازاققا جەتىسپەيتىنى نە نارسە؟
اسقار جۇمادىلداەۆ: قازاق بوس، تەرىس سوزگە ءۇيىر. قولدان پروبلەما جاسايدى دا، سونىمەن الەك بولىپ جۇرەدى. قازاققا، اسىرەسە، زيالى قاۋىمعا ءىس جەتىسپەيدى. بىزگە تەحنوكراتتار جەتىسپەيدى. قازىرشە تەك تۇتىنۋشى عانامىز. كومپيۋتەردى مەڭگەردىك دەيمىز. Word-دا ءارىپ تەرگەننەن باسقا ەشتەڭە بىلمەيمىز. ونىڭ ميىن، جۇرەگىن سەزبەيمىز.
جاس قازاق: ءسىزدىڭ ۇعىمىڭىزدا قۇندىلىق دەگەن نە؟
اسقار جۇمادىلداەۆ: قۇندىلىقتار كوپ قوي، باۋىرىم. ەڭ ءبىرىنشى قۇندىلىق – ادالدىق، ەڭبەك ەتۋ، جاۋاپكەرشىلىك. وسىدان ەكى جىل بۇرىن انگليادا قىزىق جاعداي بولدى. ەلدىڭ ءدىنباسى «ءوز ەركىممەن وتستاۆكاعا كەتەمىن» دەپ مالىمدەدى. نەگە؟ سوندا ول ايتتى: «مەن قۇدايدىڭ الدىندا ۇلكەن ۇياتقا قالدىم. ۇلكەن كۇنا جاسادىم. ەندى جۇمىس ىستەۋگە مورالدىق قۇقىعىم جوق. ويتكەنى مەنىڭ كەزىمدە دىنگە سەنۋشىلەردىڭ سانى «مانچەستەر يۋنايتەد» فۋتبول كومانداسىن قولدايتىن ادامداردىڭ سانىنان كەمىپ كەتتى». جاۋاپكەرشىلىك دەگەن، مىنە، وسىنداي بولۋى كەرەك.
جاس قازاق: ءسىز نەگە قۋاناسىز؟
اسقار جۇمادىلداەۆ: جاستارعا ساباق بەرەمىن. ءبىر بايقاعانىم – قازىرگى جاستار كەيبىر اعالارى سياقتى توتىقۇستاي ءبىر ءسوزدى قايتالاي بەرمەيدى. ءوز باسىمەن ويلاعىسى كەلەدى. «بۇل نەگە ولاي؟» دەپ ءار نارسەگە وزىنشە ۇڭىلەدى. مەنى قۋانتاتىنى – وسى.
جاس قازاق: عىلىم مەن ءدىن ەگىز دەپ جاتادى؟ دىنگە دەگەن كوزقاراسىڭىز قانداي؟
اسقار جۇمادىلداەۆ: مۇسىلمانشىلىقتىڭ تالاپتارىن ورىنداۋعا تىرىسامىن. ساداقامدى بەرىپ تۇرامىن. كەيدە ستۋدەنتتەرگە ءوز قالتامنان قارجىلاي كومەك تە كورسەتەمىن.
اۆتور: سۇحباتتاسقان اعابەك قوناربايۇلى
22.01.2010 12:25
