"قازاقپاراتتىڭ" حابارلاۋىنشا، بۇگىن پارلامەنت ءماجىلىسى «قازاقستان رەسپۋبليكاسى مەن رەسەي فەدەراتسياسى اراسىنداعى قازاقستان رەسپۋبليكاسى مەن رەسەي فەدەراتسياسىنىڭ اۋە شابۋىلىنا قارسى قورعانىسىنىڭ بىرىڭعاي وڭىرلىك جۇيەسىن قۇرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلدادى.

ياعني بۇدان كەيىن رەسەي مەن قازاقستاننىڭ اۋە قورعانىسى بىرىڭعاي جۇيەدە جۇمىس جاسايدى. ءبىر تاڭعالارلىعى، بۇعان دەيىن تمد مەملەكەتتەرىنىڭ دە اۋە شابۋىلىنا قارسى بىرىككەن جۇيەسى بولعان. سوندا قازاقستان مەن رەسەي تاعى قانداي بىرىڭعايلىققا قول جەتكىزدى ەكەن؟ 

قورعانىس ءمينيسترىنىڭ ورىنباسارى وقاس ساپاروۆتىڭ ايتۋىنشا، بىرىڭعاي جۇيە بەيبىت ۋاقىتتا اسكەرلەردىڭ جاۋىنگەرلىك كەزەكشىلىگىن اتقارۋ مەن بىرلەسكەن ءىس-قيمىلدارىن ۇيىمداستىرۋدى كوزدەيدى. ال سوعىس ۋاقىتىندا تاراپتار وزدەرىنىڭ ۇلتتىق زاڭنامالارىندا كوزدەلگەن تارتىپپەن ءوز اسكەرلەرى مەن قۇرالدارىن قولدانۋ تۋرالى شەشىم قابىلداۋ قۇقىعىن وزىنە قالدىرادى.

قازاقستان مەن رەسەي اۋە شابۋىلىنا قارسى قورعانىسىنىڭ بىرىڭعاي وڭىرلىك جۇيەسىنىڭ اسكەرىن تاراپتاردىڭ قورعانىس مينيسترلەرىنىڭ ۇسىنۋى بويىنشا قازاقستان رەسپۋبليكاسىنىڭ پرەزيدەنتى مەن رف پرەزيدەنتى لاۋازىمعا تاعايىندايتىن قولباسشى باسقاراتىن بولادى. ال قازاقستانداعى قولباسشىلىق الماتى قالاسىندا ورنالاسادى.

اباي-اقپارات