وتكەن ايدا عانا “Facebook” الەۋمەتتىك جەلىسىندە قىزۋ تالقىلانعان قايتىس بولعان ادامنىڭ ورگاندارىن دونورلىققا جاراتۋ ماسەلەسى ەندى زاڭمەن بەكىتىلەتىن كورىنەدى.  باتىس ەلدەرىندە الدە قاشان جالپىلاسىپ كەتكەن بۇل ءۇردىس قايتىس بولعان ادامنىڭ دەنە مۇشەلەرىن مۇقتاج جاندارعا ءوز ەرىكتەرىمەن بەرۋى ارقىلى جۇزەگە اسىرىلادى. ازىرگە ەشبىر مۇسىلمان ەلدەرى زاڭ اياسىندا قۋاتتاماعان وسى ماسەلە  ءماجىلىستىڭ قر "حالىق دەنساۋلىعى جانە دەنساۋلىق ساقتاۋ جۇيەسى تۋرالى" كودەكسكە ەنگىزىلگەن تۇزەتۋلەردى ماقۇلداۋىندا قارالعان. بۇل تۋرالى tengrinews.kz مينيستر ساليدات قايىربەكوۆانىڭ سوزىنە سىلتەمە جاساپ اقپارات تاراتتى. "شەشۋشى ەرىكتى كەلىسىمدەر ءتارتىبىن انىقتاۋ جونىندە قر ۇكىمەتىنىڭ قۇزىرەتىن بەلگىلەيتىن نورما ەنگىزىلدى. سىزدەر بىلەسىزدەر، بىزدە دونورلىق ماسەلەسى بار. قازىرگى كودەكس دونورلىقتى حالىقارالىق تاجىريبەدە بار ۇعىمدا دامىتۋعا مۇمكىندىك بەرمەيدى. سوندىقتان قايتىس بولعاننان كەيىن ۇلپالارى مەن ورگاندارىن ترانسپلانتاتسيا ماقساتىنا قۇربان ەتۋگە كوزى تىرىسىندە ەرىكتى كەلىسىم بەرۋ ۇعىمى ەنگىزىلىپ وتىر", - دەيدى ول.

اباي-اقپارات