قر ءبىلىم جانە عىلىمي ءمينيسترى ا.ب. سارينجيپوۆ مىرزاعا!

اباي اتىنداعى قازۇپۋ-دىڭ رەكتورى س.ج. پراليەۆ مىرزاعا!

اشىق حات!

ءبىز دەموكراتيالىق مەملەكەتتە ءومىر ء سۇرىپ جاتساق تا قوعامدى جاۋلاعان بيۋروكراتيزم كۇندەلىكتى الدىمىزدان شىعىپ، شىندىققا جەتە الماي مەسەلىمىز قايتىپ ءجۇر. بۇل ماقالانى ءبىز ازاماتتىق قۇقىعىمىز اياققا تاپتالعان سوڭ جازىپ وتىرمىز.

2013 جىلى اباي اتىنداعى قازۇپۋ-ءنىڭ «ماگيستراتۋرا جانە PhD دوكتورانتۋراسىنا» تۇسۋگە ەمتيحان تاپسىرىپ، مەملەكەتتىك گرانت يەگەرى اتانىپ قۋانعان ەدىك. بۇل ۋنيۆەرسيتەت ءدال وسى ماگيستراتۋرا جانە PhD  دوكتورانتۋرا عىلىمي ينستيتۋتىمەن بەدەلدى.

وكىنىشكە وراي، ءبىز وقۋعا تۇسكەن 2013 جىلى ماگيستراتۋرا جانە PhD دوكتورانتۋرا ينستيتۋتىنداعى «ينفورماتيكا، ماتەماتيكا جانە ءبىلىمدى اقپاراتتاندىرۋ» كافەدراسىنىڭ ماگيسترانتتارىن سول جىلى عانا ماتەماتيكا، فيزيكا جانە ينفورماتيكا (باكالاۆرلار وقيتىن) ينستيتۋتىندا اشىلعان «ماتەماتيكا، فيزيكا جانە ينفورماتيكانى وقىتۋ ادىستەمەسى» كافەدراسىنا ءبىزدىڭ، ياعني ماگيسترانتتاردىڭ وزدەرىنىڭ ەشبىر كەلىسىمىنسىز ءبولىپ تاستاعان ەكەن.

جاڭا كەلگەن ماگيسترانتتار تۇك تۇسىنبەي ء(بولۋدىڭ ماقساتىن ءالى دە تۇسىنبەيمىز) جىل بويى ەكى ورتادا سابىلۋمەن بولدىق. 2013-2014 وقۋ جىلى اياقتالعاندا ءبىز ءبىراۋىزدان ءوزىمىزدىڭ ماگيستراتۋرا جانە PhD دوكتورانتۋرا ينستيتۋتىنداعى «ينفورماتيكا، ماتەماتيكا جانە ءبىلىمدى اقپاراتتاندىرۋ» كافەدراسىنا اۋىسامىزدى دەپ شەشتىك. وسى كافەدراداعى  ماگيسترانتتار جانە ەكىنشى «ماتەماتيكا، فيزيكا جانە ينفورماتيكانى وقىتۋ ادىستەمەسى» كافەدراسىنداعى 23 ماگيسترانت اتىنان ءبارىمىزدىڭ ءبىر كافەدرادا، ياعني  ماگيستراتۋرا جانە PhD دوكتورانتۋرا ينستيتۋتىنداعى «ينفورماتيكا، ماتەماتيكا جانە ءبىلىمدى اقپاراتتاندىرۋ» كافەدراسىنا وقىعىمىز كەلەتىنى جايلى ءوتىنىش جازىپ الىپ، توزدىرماعان ەسىگىمىز قالمادى. ماگيسترانتۋرا ينستيتۋتىنىڭ ديرەكتورى مەن ۋنيۆەرسيتەت رەكتورىنا دا تالاي بارىپ، كىرە الماي تاۋىمىز شاعىلدى.

قىسقاسى، باسشىلىققا كىرىپ، ماسەلەمىزدى شەشسەك دەگەن ماقساتىمىزعا جەتە الماعاندىقتان بۇقارالىق اقپارات قۇرالدارى ارقىلى ءوز رەكتورىمىزعا حات جازىپ وتىرمىز. رەكتور مىرزا وسى ءوتىنىشىمىزدى قاراپ، دۇرىس شەشىم شىعاراتىنىنا سەنەمىز.

ءبىز ءوزىمىز ءبىلىم العىمىز كەلگەن كافەدراعا اۋىسۋ ماقساتىمەن ۋنيۆەرسيتەت باسشىلىعا، اتاپ ايتقاندا، ءبىرىنشى پرورەكتور ەرماعامبەتوۆ مۇباراك ەرماعامبەتۇلىنا بىرنەشە رەت  بارساق تا جولىعۋعا ەش مۇمكىندىك بولمادى.

ماگيستراتۋرا جانە PhD دوكتورانتۋرا ينستيتۋتىنىڭ ديرەكتورىنا جانە كەڭسەگە ءبىر-ءبىر دانادان بەرگەن ءوتىنىشىمىز ەشبىر جاۋاپسىز قالدى. سەبەبى بەيمالىم.

سۋرەتتە: اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى سەرىك پراليەۆ

ال، رەكتوردىڭ كەڭسەسىنە اپارساق، پرورەكتور مەن ماگيستراتۋرا جانە PhD دوكتورانتۋرا ينستيتۋتىنىڭ ديرەكتورىنىڭ قولى قويىلماعان دەپ قابىلدامادى.

ءبىر سوزبەن ايتقاندا ءوتىنىشىمىزدى تىكەلەي رەكتورعا جىبەرۋگە كوپتەگەن كەدەرگىلەر بولدى. ءوز ماقساتىمىزعا جەتۋ ءۇشىن ءوتىنىشتى رەكتوردىڭ پوچتاسىنا دا جىبەردىك، رەكتورىمىزدىڭ اتىنا جازعان حاتىمىزدى ول كىسىنىڭ قولىنا جەتكىزە الماي اۋرە-سارساڭعا ءتۇسىپ، ابدەن مەزى بولعان ماتەماتيكا جانە ينفورماتيكا ماماندىقتارىنىڭ ماگيسترانتتارىنىڭ جان ايقايىن اشىق حات ارقىلى بايان ەتكىمىز كەلەدى.

تومەندە اۋەلگى ءوتىنىشىمىزدى دالەل رەتىندە ۇسىنىپ وتىرمىز:

اباي اتىنداعى قازۇپۋ رەكتورى س.ج.پىراليەۆ مىرزاعا وسى ءبىر ءوتىنىشىمىزدى جەتكىزۋ ءۇشىن رەكتوراتقا قانشا رەت سابىلىپ بارىپ، سارىلىپ توسىپ تىكەلەي جولىعۋعا ەش مۇمكىندىك بولمادى. جوو-نىڭ ءبىلىم الۋشىسى رەتىندە ءوز رەكتورىمىزدىڭ قابىلداۋىندا بولىپ، جاعدايىمىزدى تۇسىندىرە الماساق، قالايشا ءبىز ءوزىمىزدى بۇل ۋنيۆەرسيتەتتىڭ وكىلىمىز دەپ ايتا الامىز؟! ء اربىر ءبىلىم الۋشى ءوز قۇقىعى ساقتالۋىن قالايدى. ەگەر قۇقىق تاپتالعان جاعدايدا باسشىلىق قول ۇشىن سوزىپ، كومەكتەسۋى كەرەك. جوو-نىڭ نەگىزگى جۇمىسى ستۋدەنتىڭ قامىن ويلاۋ ەمەس پە! سول ستۋدەنتتەرگە جاعداي جاساۋدىڭ ورنىنا، ولاردىڭ قۇقىعى تاپتالىپ جاتسا، ماسقارا تىرلىك ەمەس پا؟!

مىناۋ ءبىزدىڭ رەكتوردىڭ جەكە پوچتاسىنا جولداعان ءوتىنىشىمىز (پوچتا كۆيتانتسياسى كوشىرمەسى).

قۇرمەتتى مينيستر مىرزا!

قۇرمەتتى رەكتور مىرزا!

سىزدەردەن ءوتىنىشىمىزدى جاۋاپسىز قالدىرماۋلارىڭىزدى سۇرايمىز.

ءبىز بارعىمىز كەلمەي وتىرعىن الگى كافەدرا، ياعني، ابىلقاسىموۆا الما ەسەمبەكقىزىنىڭ باسشىلىعىمەن اشىلعان «ماتەماتيكا، فيزيكا جانە ينفورماتيكانى وقىتۋ ادىستەمەسى» كافەدراسىندا ماگيترانتتارعا ءتيىستى دارەجەدە ءبىلىم بەرەتىن ماماندار جوق. وسى كافەدراعا بيىلعى ماگيسترانتتاردى دا جىبەرەدى دەپ ەستىدىك. ءبىز عانا ەمەس، بىزدەن كەيىنگى ستۋدەنتتەر دە ءبىز سەكىلدى سابىلىپ، «نە اندا ەمەس، نە مىندا ەمەستىڭ» كۇيىن كەشپەسە دەپ ويلايمىز.

قورىتا كەلگەندە،  ءبىز بارلىعىمىز بولىنبەي اباي اتىنداعى قازۇپۋ-دىڭ ماگيستراتۋرا جانە PHD دوكتارانتۋرا ينستيتۋتى «ينفورماتيكا، ماتەماتيكا جانە ءبىلىمدى اقپاراتتاندىرۋ» كافەدراسىندا وقىعىمىز كەلەدى.

«ينفورماتيكا، ماتەماتيكا جانە ءبىلىمدى اقپاراتتاندىرۋ» كافەدراسىنىڭ ماتەماتيكا جانە ينفورماتيكا ماماندىقتارىنىڭ 2 كۋرس ماگيسترانتتارى

Abai.kz