بارشاڭىزدى كونستيتۋتسيا كۇنى مەرەكەسىمەن شىن جۇرەكتەن قۇتتىقتايمىن! بۇل، ەڭ الدىمەن — ەلىمىز ءۇشىن پاتريوتتىق پەن نامىستىڭ مەرەكەسى!
      ەجەلدەن ەركىندىكپەن ءومىر ءسۇرىپ، ەڭسەلى ازات ەل بولۋدى كوكسەگەن بابالارىمىزدىڭ باستى ارمانى–تاۋەلسىزدىك بولسا، تاۋەلسىزدىكتىڭ ەڭ باستى بەلگىسى–قازاقستان رەسپۋبليكاسىنىڭ اتا زاڭى بولىپ تابىلادى.
اتا زاڭىمىزدىڭ تاريحى ارىدەن باستاۋ الاتىنى دا بارلىعىمىزعا ايان. ەسىم حاننىڭ ەسكى جولى، قاسىم حاننىڭ قاسقا جولى، ءاز-تاۋكەنىڭ «جەتى جارعىسىنان» باستاۋ العان ءبىزدىڭ كونستيتۋتسيامىز ەلىمىزدىڭ دامۋىنا وزىندىك ۇلەسىن قوستى. كونستيتۋتسيا نەگىزىندە جانە سوعان سۇيەنە وتىرىپ، ەلىمىزدە جۇرگىزىلگەن رەفورمالاردىڭ وڭ ناتيجەسى رەتىندە قوعامدا تىنىشتىق پەن بەيبىتشىلىك قالىپتاستى. قازاقستان قوعامدى جاڭارتۋدىڭ قاي سالاسىندا بولماسىن تەرەڭدىگى مەن كەڭدىگى جاعىنان بۇرىنعى كەڭەس رەسپۋبليكالارىنىڭ ىشىندە كوش باسىندا كەلەدى. كەڭ كولەمدى جەكەشەلەندى­رۋدى، زەينەتاقى رەفورماسىن، تۇرعىن ءۇي-كوممۋنالدىق شارۋاشىلىعىن رەفورمالاۋدى، حالىققا ءبىلىم بەرۋ مەن مەملەكەتتىك قىزمەتتى قايتا قۇرۋلاردى ايتقاننىڭ ءوزى دە جەتكىلىكتى.

     ءوزىم ونەر سالاسىندا جۇرگەندىكتەن، ەلباسىنىڭ جالپى مادەنيەتكە  قاتىستى ايتقان سوزدەرىنىڭ دەرلىك بارلىعى كوڭىلىمنەن شىعادى دەسەم ارتىق ايتقاندىق ەمەس. ماسەلەن، اتا زاڭىمىزدىڭ 37 بابىندا «قازاقستان رەسپۋبليكاسىنىڭ ازاماتتارى تاريحي جانە مادەني مۇرالاردىڭ ساقتالۋىنا قامقورلىق جاساۋعا، تاريح پەن مادەنيەت ەسكەرتكىشتەرىن قورعاۋعا مىندەتتى» دەپ جازىلعان. پرەزيدەنت جارلىعىمەن قابىلدانعان «مادەني مۇرا» باعدارلاماسى وسى باپتىڭ ورىندالۋىنا كوپ سەپتىگىن تيگىزىپ وتىر.

       ۇلتتىق تاريحي مۇرانى حالىقارالىق دەڭگەيدە ناسيحاتتاۋ ماقساتىندا ش.ايمانوۆ اتىنداعى «قازاقفيلم» كينوستۋدياسى دا  «مادەني مۇرا» باعدارلاما اياسىندا قوعام، ونەر جانە مادەنيەت قايراتكەرلەرى تسيكلى بويىنشا  جانە  تاريحي ورىندار مەن مۇرالار تۋرالى دەرەكتى فيلمدەر تۇسىرۋدە. وسى سەكىلدى قوعامىمىزدىڭ ءاربىر سالاسى، ءاربىر ازاماتى وتانىمىزدىڭ ءوسىپ-وركەندەۋىنە ءوز ۇلەسىن قوسار بولسا، اتا زاڭىمىزدىڭ  ىرگەسى بەرىك، عۇمىرى ماڭگى بولماق!

      قۇرمەتتى وتانداستار! بارشاڭىزدى تاعى دا  ءبىر وسى  جارقىن مەرەكەمەن قۇتتىقتاعىم كەلەدى. سىزدەرگە زور دەنساۋلىق، وتباسىندا باقىت، بەرەكە-بىرلىك، وتانىمىز ― قازاقستان رەسپۋبليكاسىنىڭ يگىلىگى جولىنداعى قىزمەتتەرىڭىزگە تابىستار تىلەيمىن.

بولات قالىمبەتوۆ، اكتەر، كينورەجيسسەر،

قازاقستان رەسپۋبليكاسىنىڭ ەڭبەك سىڭىرگەن ءارتىسى،

«قۇرمەت» وردەنىنىڭ يەگەرى

Abai.kz