قازاقستاندىق بوكسشى قانات يسلام 18-ءشى جەكپە-جەگىن دە جەڭىسپەن اياقتادى. بۇل تۋرالى eluniversal.com سايتىنا سىلتەمە جاساپ، Bnews.kz حابارلادى.

كولۋمبيالىق فيدەل مونتەرروسانى تىزەرلەتۋ ءۇشىن قاناتقا 5 راۋند جەتكىلىكتى بولدى. ءبىرىنشى راۋندتا فيدەل بەلسەندى بوكستاسقانىمەن، ەكىنشى كەزەڭنەن باستاپ قانات باسىمدىقتى ءوز قولىنا الدى. اسىرەسە، سول قولمەن ۇرعان سوققىلارى قارسىلاسىن ەسەڭگىرەتىپ تاستادى. ءتورتىنشى راۋندتان باستاپ قاناتتىڭ سوققىلارىنان فيدەلدىڭ تىزەسى دىرىلدەي باستادى. بەسىنشى كەزەڭنىڭ 2 مينۋت 50 سەكۋندىندا مونتەرروسا ەدەنگە ەتپەتتەپ جاتىپ الىپ، تۇرماي قويدى. تورەشى كەزدەسۋدى توقتاتۋعا ءماجبۇر بولدى. كاسىپقوي بوكسقا وتكەلى 44 جەكپە-جەك وتكىزگەن فيدەل مونتەرروسا وسىمەن 10-شى رەت جەڭىلىپ وتىر. بۇعان دەيىن ول 34 كەزدەسۋدىڭ 26-سىندا نوكاۋتپەن جەڭگەن ەدى. ال قازاقستاندىق بوكسشى بۇگىنگە دەيىن 18 كەزدەسۋ وتكىزىپ بارلىعىندا جەڭىسكە جەتتى، ونىڭ 15-ءىن نوكاۋتپەن اياقتادى. جەكپە-جەكتەن كەيىن قانات يسلام وزىنە قولداۋ كورسەتكەن كولۋمبيا جۇرتشىلىعىنا العىسىن ءبىلدىردى.

اباي-اقپارات