مۇلىكتى زاڭداستىرۋدىڭ مۇمكىندىكتەرى
مۇلىكتى زاڭداستىرۋ تۋرالى ەلىمىزدە قولعا الىنعان ناۋقان ازاماتتارعا قانداي مۇمكىندىكتەر بەرەدى؟ اتالعان شارا ەكونوميكاعا قانداي پايدا اكەلمەك؟ نازارلارىڭىزعا زاڭداستىرۋ تۋرالى زاڭنامالارعا سۇيەنە وتىرىپ، جازىلعان جاۋاپتاردى ۇسىنامىز.
«قازاقستان رەسپۋبليكاسى ازاماتتارىنا، ورالماندارعا جانە قازاقستان رەسپۋبليكاسىندا تۇرۋعا ىقتيارحاتى بار تۇلعالارعا ولاردىڭ مۇلىكتى جاريا ەتۋىنە بايلانىستى راقىمشىلىق جاساۋ تۋرالى» زاڭى مۇلىكتى، سونىڭ ىشىندە بۇرىن زاڭدى ەكونوميكالىق اينالىمنان شىعارىلعان اقشانى زاڭداستىرۋ بويىنشا مەملەكەتتىڭ ءبىر رەتتىك اكتسيا وتكىزۋىنە بايلانىستى، سونىمەن قاتار، قر ازاماتتارىنىڭ، ورالمانداردىڭ جانە قر اۋماعىندا تۇرۋعا ىقتيارحاتى بار تۇلعالاردىڭ تابىستارى مەن مۇلىكتەردىڭ دەكلاراتسيالانۋعا بايلانىستى قوعامدىق قاتىناستاردى رەتتەيدى.
ەكونوميكالىق زەرتتەۋلەر ينستيتۋتى ساراپشىلارىنىڭ باعالاۋىنا سايكەس، الدا وتكىزىلەتىن زاڭداستىرۋ كەزىندە 2 تريلليون تەڭگەنىڭ مۇلكى زاڭداستىرىلادى دەپ بولجانۋدا.
جاريا ەتۋدىڭ ارقاسىندا قولىمىزدا بار مۇلىكتى زاڭداستىرۋعا جانە زاڭدى اينالىمعا ەنگىزۋگە مۇمكىندىك الامىز.
بۇل الدا وتەتىن جالپىعا ورتاق دەكلاراتسيالانۋدىڭ ەنگىزىلۋىنە بايلانىستى، ازاماتقا ءوز مۇلكىن قازىر زاڭداستىرۋعا مۇمكىندىك بەرىپ وتىر. كەيىن ول مۇلكىن ەركىن كورسەتە الادى.
سونىمەن، الدا وتەتىن زاڭداستىرۋ بەلگىلەنگەن مەجەگە جەتەدى جانە زاڭداستىرىلعان كاپيتال تۇرىندە ەكونوميكاعا قوسىمشا رەسۋرستار تارتادى.
ەلىمىزدە مۇلىككە راقىمشىلىق جاساۋ تۋرالى باستاما قولعا الىنعالى ازاماتتار تاراپىنان ءتۇرلى سۇراقتار كەلىپ تۇسۋدە. وقىرمان تىلەگىنە وراي، مۇلىكتى تىركەۋ ماسەلەسى جەڭىلدەتىلگەن بە دەگەن سۇراققا جاۋاپ ىزدەگەن ەدىك.
«قازاقستان رەسپۋبليكاسى ازاماتتارىنا، ورالماندارعا جانە قازاقستان رەسپۋبليكاسىندا تۇرۋعا ىقتيارحاتى بار تۇلعالارعا ولاردىڭ مۇلىكتى جاريا ەتۋىنە بايلانىستى راقىمشىلىق جاساۋ تۋرالى» زاڭىنا سايكەس قازاقستان رەسپۋبليكاسى اۋماعىندا ورنالاسقان، قۇرىلىس نورمالارى مەن ەرەجەلەرىنە، سونداي-اق مەنشىك قۇقىعىن جاريا ەتۋشى سۋبەكتكە تيەسىلى جەر تەلىمىنىڭ ماقساتتى پايدالانۋىنا سايكەس كەلەتىن عيماراتتار جاريا ەتىلۋى ءتيىس. ايتا وتەيىك، قر اۋماعىندا ورنالاسقان عيماراتتار زاڭداستىرۋ كەزىندە الىم الىناتىن مۇلىكتەر تىزبەسىنە كىرمەيدى. زاڭنىڭ 7-ءشى بابىندا مۇلىكتى زاڭداستىرۋ سۋبەكتتىڭ كوميسسياعا قۇجاتتارىن بەرۋ ارقىلى جۇرگىزىلەتىنى ايتىلادى. وسىعان وراي، بارلىق قاجەتتى قۇجاتتاردى جيانستىرىپ، قۇجاتتاردىڭ قوسىمشاسىمەن بىرگە ءوتىنىم بەرۋ جەتكىلىكتى. وسىدان كەيىن كوميسسيا شەشىم شىعارۋى ءتيىس. ەسىڭىزدە بولسىن، بۇل ءۇشىن بىرنەشە ورگانعا بارىپ، تابان توزدىرۋدىڭ قاجەتى جوق، ءبىر جەرگە قۇجات وتكىزۋ جەتكىلىكتى.
