4 تامىز 2014 جىلى قازاقستاندا ەكسپو-2017 حالىقارالىق مامانداندىرىلعان كورمەسىنىڭ نىشانىنا داۋىس بەرۋ كەزەڭى باستالدى. داۋىس بەرىپ، تاڭداۋ ناتيجەلەرىمەن تانىسۋ ءۇشىن اقپاراتتاردى تامىزدىڭ 4-ءى مەن 18-ءى ارالىعىندا https://www.expo2017mascot.kz سايتىنان انىقتاۋعا بولادى.

ەكسپو-2017 كورمەسىنىڭ ۇزدىك ماسكوت ديزاينى بويىنشا حالىقارالىق بايقاۋدىڭ ىرىكتەۋ كەزەڭى 2014 جىلدىڭ 20-مامىرى مەن ماۋسىمنىڭ 20-سى ارالىعىندا ءوتتى. جارىسقا بارلىعى 80-نەن استام جوبا تۇسكەن. وزدەرىنىڭ ديزاين-جوبالارىن برازيليا، مەكسيكا، ۆەنەسۋەلا، پورتۋگاليا، اقش، گەرمانيا، شۆەيتساريا، ۇلىبريتانيا، يسپانيا، بوسنيا جانە گەرتسەگوۆينا، بەلگيا، ليتۆا، رۋمىنيا، پولشا، ۋكراينا، يزرايل، ءۇندىستان، يندونەزيا، رەسەي، قازاقستان جانە باسقا دا ەلدەردىڭ ديزاينەرلەرى جولداعان.

بايقاۋعا تۇسكەن جوبالاردىڭ باستى تالابى «بولاشاق ەنەرگياسى» كورمە تاقىرىبىنا ساي كەلۋى ءتيىس. سونىمەن قاتار، قابىلداۋشى ەل – قازاقستان رەسپۋبليكاسىنىڭ مادەنيەتىنىڭ ەرەكشەلىكتەرىن ايعاقتاۋى شارت.

ءبىرىنشى كەزەڭ قورىتىندىسى بويىنشا بايقاۋ كوميسسياسى كورمە تاليسمانى قۇقىنا تالاساتىن 7 قاتىسۋشىنىڭ جۇمىسىن ىرىكتەپ الدى. ولاردىڭ قاتارىنا قازاقستان مەن ۋكراينادان ءار ءتۇرلى جارناما اگەنتتىكتەرى مەن جەكە ديزاينەرلەر جولداعان تاليسماندار كىردى.

بايقاۋ شارتتارىنا ساي، جەڭىمپازدار 2014 جىلعى تامىز ايىنىڭ 4-ءى مەن 18-ءى ارالىعىندا وتەتىن حالىقتىق داۋىس بەرۋ ارقىلى انىقتالادى. كوپ داۋىس جيناعان ءۇش جوبانىڭ ىشىنەن بىرەۋى جەڭىمپاز بولىپ تانىلادى. بايقاۋ ناتيجەسى 19 قىركۇيەكتە جاريالانادى. جەڭىمپاز اتانعان اۆتور لايىقتى ماراپاتپەن قاتار، كورمەنىڭ ماسكوت برەندبۋگىن جاساۋ تۋرالى كەلىسىمشارتقا قول قويادى.

داۋىس بەرۋگە قاتىسۋ ءۇشىن Facebook, Vkontakte, تۆيتتەر نەمەسە موي مير الەۋمەتتىك جەلىلەرىندە تىركەلۋ قاجەت، نەمەسە ەلەكتروندى پوشتا ارقىلى ارنايى كود الىپ قانا داۋىس بەرۋگە بولادى. تىركەلگەن پايدالانۋشى جەتى ديزايننىڭ بىرەۋىنە عانا داۋىسىن بەرە الادى.

جوبالارمەن تانىسىپ، ۇناتقان ديزاينعا داۋىس بەرۋدى كەلەسى سىلتەمە بويىنشا بىلۋگە بولادى: https://www.expo2017mascot.kz.

«قاتىسۋشىلاردىڭ بارلىعىنا العىسىمىزدى بىلدىرەمىز. ءبىز ۇسىنىلعان جوبالاردىڭ كرەاتيۆتىگىنە جانە قامتىلعان گەوگرافيالىق اۋماعىنا تاڭ قالدىق. بۇگىن ەل نازارىنا ۇزدىكتەرىن ۇسىنامىز. ماسكوت بارشا الەمگە تانىمال بولاتىن كورمەنىڭ بەينەسىنە اينالىپ، وزدەرىڭىز تاڭداعان تۇمار قازاقستانعا ساتتىلىك اكەلەدى، دەپ سەنەمىن» – دەدى «استانا ەكسپو-2017» ۇق» اق ماركەتينگ جانە جۇرتشىلىقپەن بايلانىس جونىندەگى دەپارتامەنت ديرەكتورى اسەل قوجاقوۆا.

Abai.kz