قر ۇلتتىق بانكى كەيىنگى كەزدە ءورشىپ كەتكەن دەۆالۆاتسيا تۋرالى الىپ-قاشپا اڭگىمەلەرگە قاتىستى مالىمدەمە جاسايدى دەپ حابارلايدى قازاقپارات بانك توراعاسىنىڭ كەڭەسشىسى ولجاس قۇدايبەرگەنوۆتتىڭ Facebook-تەگى پاراقشاسىندا جازعان مالىمەتىنە سۇيەنە وتىرىپ.

«ەرتەڭ ەشقانداي دەۆالۆاتسيا بولمايدى. ۇلتتىق بانك رەسمي مالىمدەمە جاسايدى، كەيىن كىنالىلەر جازالاناتىن بولادى»، - دەپ جازدى بانك توراعاسىنىڭ كەڭەسشىسى ولجاس قۇدايبەرگەنوۆ (سۋرەتتە) Facebook-تەگى پاراقشاسىندا (https://www.facebook.com/khudaibergen.kz?fref=ts .)

ەستەرىڭىزگە سالا كەتەيىك، الەۋمەتتىك جەلىلەردە تامىزدىڭ بىرىنەن باستاپ تەڭگە كەزەكتى رەت قۇنسىزدانىپ، دەۆالۆاتسيا بولادى دەگەن ءسوز تاراپ جاتىر. وسىنداي قاۋەسەت شىعىسىمەن ۆاليۋتا ايىرباستاۋ پۋنكتتەرىنە اعىلعان جۇرت قولدا بار تەڭگەسىن دەرەۋ دوللارعا ايىرباستاپ، اقشا نارىعىندا كادىمىگىدەي قاربالاس تۋدىرىپ ۇلگەرگەن بولاتىن.

تاعى دا ەسكە سالۋعا تۋرا كەلەدى، بۇقارا حالىقتىڭ بۇلايشا قاربالاسۋىندا ۇلكەن سەبەپ بار. سەبەبى: ۇلتتىق بانك وسى ۋاقىتقا دەيىن بىرنەشە رەت شۇعىل شەشىم قابىلداپ، دوللاردىڭ باعامىن ءوسىرىپ جىبەرگەن ەدى. سودان اۋزى كۇيگەن جۇرت دەۆالۆاتسيا مەن ينفلياتسيانىڭ الدىن الۋدىڭ وسىنداي شارالارىن قاراستىرۋمەن كەلەدى. مىسالى،  2014 جىلدىڭ 11 اقپانىندا قازاقستاننىڭ ۇلتتىق بانكى تەڭگە باعامىن ۇستاپ تۇرۋدان ادەتتەگىدەي اياقاستى جالتارىپ، اقش دوللارى 155 تەڭگەدەن 183-185 تەڭگەگە دەيىن ءوسىپ كەتكەن-ءدى. تەڭگەنىڭ وسىلايشا قۇنسىزدانۋى قارساڭىندا ۇلتتىق بانك توراعاسى قايرات كەلىمبەتوۆ ءتولۆاليۋتامىزدىڭ تۇراقتىلىعىنا حالىقتى ابدەن سەندىرىپ جۇرگەن ەدى. بۇل جولى كەلىمبەتوۆ ەمەس، كەلىمبەتوۆتىڭ كەڭەسشىسى ولجاس قۇدايبەرگەنوۆ: «ەشقانداي دەۆالۆاتسيا بولمايدى» دەپ وتىر. كورەمىز.

Abai.kz