ۋكرايناداعى جاعدايعا بايلانىستى ەۋرووداق ەلدەرىنە قىرىمنان ەنەتىن يمپورت تاۋارلارعا تىيىم سالىندى. Tengrinews.kz-ءتىڭ حابارلاۋىنشا بۇل تۋرالى ليتۆانىڭ سىرتقى ىستەر ءمينيسترى ليناس لينكياۆيچيۋس ءمالىم ەتكەن. قىرىم تاۋارىن ەۋروپاعا يمپورتتاۋعا 25 ماۋسىمنان باستاپ تىيىم سالىنباق. دەگەنمەن «قىرىم رەسپۋبليكاسى» باسشىسىنىڭ كەڭەسشىسى رۋستام تەميرگاليەۆ بۇل ەۋروپالىق سانكتسيالاردىڭ وتاندىق وندىرۋشىلەرگە اسا اسەرى بولمايتىنىن ايتۋدا. "قىرىمنىڭ اراق-شاراپ جانە اۋىل شارۋاشىلىعى ونىمدەرىنە رەسەيدە سۇرانىس جوعارى. ال حيميالىق كاسىپورىنداردىڭ ونىمدەرىنە قىتاي مەن ءۇندىستاندا سۇرانىس بار" - دەيدى ول.

سونداي-اق، ەۋرووداق سانكتسيا سالىنعان تۇلعالاردىڭ ءتىزىمىن قايتا تولىقتىردى. قازىر سانكتسيالىق تىزىمگە رەسەيدىڭ جانە ۋكراينانىڭ 61 ازاماتى ەنىپ وتىر. بۇل ازاماتتارعا ەۋرووداق اۋماعىنا ەنۋگە تىيىم سالىندى. بۇعان قوسا ەۋروپالىقتار قىرىمنىڭ مۇناي جانە مۇناي ونىمدەرىن وڭدەۋشى ەكى كاسىپورىنىنا سانكتسيا ەنگىزدى. ولار "قارا تەڭىز مۇناي-گاز" كاسىپورىنى مەن "فەودوسي مۇناي ونىمدەرىن وڭدەۋشى" كاسىپورىنى.

ەسكە سالا كەتسەك،  بيىلعى 23 ساۋىردە ەۋرووداق ەركىن ساۋدا اينالىمىن قۇرۋ ماقساتىندا ۋكراينانىڭ اۋىل شارۋاشىلىعى ونىمدەرىنە بىرقاتار كەدەندىك باج سالىعىن الىپ تاستاعان بولاتىن. بۇل شەشىم 1 قاراشاعا دەيىن جالعاسىن تاپپاق.

اباي-اقپارات