«قازگيدرومەتتىڭ» اتىراۋ وبلىستىق فيليالىنىڭ مالىمەتى بويىنشا: «پەشنوي كەنتىندەگى كاسپي تەڭىزىندەگى سۋ قاۋىپتى دەڭگەيگە جەتكەن جوق» دەپ حابارلايدى قازاقپارات «اق جايىق»  اقپاراتىنا سىلتەمە جاساپ.

بۇل ايماقتا سۋ دەڭگەيى 120 سم-گە كوتەرىلگەن كەزدە قاۋىپتى دەپ سانالادى. 15 ماۋسىمدا تەڭىزدەگى سۋ 26,97 - 26,96 مەترگە دەيىن كوتەرىلىپ، نورمادان 103 - 104 سم-گە استى. ال بولجام بويىنشا، 128 سم-گە جەتۋى كەرەك ەدى.

ەسكە سالا كەتەيىك، 13 ماۋسىمدا اتىراۋ وبلىسى بويىنشا توتەنشە جاعدايلار جونىندەگى دەپارتامەنتى گيدرومەتورتالىعىنىڭ مالىمەتتەرى بويىنشا: «اعىمداعى جىلدىڭ 15-16 ماۋسىم كۇندەرى پەشنوي پوسەلكەسىندە كاسپي تەڭىزىندە سۋ دەڭگەيىنىڭ شامادان تىس كوتەرىلۋى كۇتىلۋدە»، - دەگەن  شۇعىل ەسكەرتپە  حابارلاما تاراتتى. «قۇرعاق جەردى جاعالاۋدان 5-6 شاقىرىم تەرەڭدىكتە سۋ باسۋى مۇمكىن»، - دەلىنگەن ەدى حابارلامادا. حابارلاماعا ساي جاعالاۋ ەلدىمەكەندەردىڭ تۇرعىندارى شۇعىل ەۆاكۋاتسيالانۋعا دايىن بولۋى ءتيىس بولعان.

اباي-اقپارات