پاۆلودار وبلىسىنىڭ بۇرىنعى اكىمى، كەزىندەگى قازاقستاننىڭ دەموكراتيالىق تاڭداۋى قوزعالىسىنىڭ نەگىزىن قالاۋشىلاردىڭ ءبىرى عالىمجان جاقيانوۆ ماسساچۋسەتس ۋنيۆەرسيتەتىنىڭ ماگيسترى اتاندى. جولداسىنىڭ ديپلومدى ويداعىداي قورعاپ شىققانىن جۇبايى قارلىعاش جاقيانوۆا ءوزىنىڭ جەكە فەيسبۋك پاراقشاسىندا حابارلاپ، ماگيستر كيىمىمەن تۇسكەن سۋرەتىن جاريالاعان. بۇل تۋرالى Nur.kz جازدى. الەمنىڭ ەڭ بەدەلدى ۋنيۆەرسيتەتتەرىنىڭ بىرىندە بيزنەستى باسقارۋدان ماگيستر اتانىپ شىققان عالىمجان جاقيانوۆ بىرنەشە جىلدان بەرى اقش-تا بالا-شاعاسىمەن بىرگە جەكە ءۇي جالداپ تۇرىپ جاتىر.

ايتا كەتەيىك، جاقيانوۆ قازاقستان تاريحىنداعى ەڭ جاس اكىم بولعان.
ول 2001 جىلى پاۆلودار وبلىسىن باسقارىپ تۇرعان كەزىندە مەملەكەتتىك قىزمەتكەرلەرمەن بىرگە “قازاقستاننىڭ دەموكراتيالىق تاڭداۋى” قوزعالىسىن قۇرىپ، قوزعالىستىڭ توراعاسى بولىپ سايلانادى. بىراق، 2002 جىلى قاماۋعا الىنىپ، قىزمەت بابىن اسىرا پايدالاندى دەگەن ايىپپەن 7 جىلعا سوتتالعان بولاتىن.

اباي-اقپارات