APA اقپارات اگەنتتىگىنە سىلتەمە جاساي وتىرىپ Agence France-Presse  راحات اليەۆتىڭ ۇستالاعانى تۋرالى حابارلاۋدا.

ەستەرىڭىزگە سالا كەتەيىك، راحات اليەۆكە «نۇربانك» توپ-مەنەدجەرلەرىنىڭ ولىمىنە قاتىستى سىرتتاي ايىپتار تاعىلعان-دى. جولداس تەمىراليەۆتىڭ، ايبار حاسەنوۆتىڭ جانە مەملەكەت، قوعام قايراتكەرى، ساياساتكەر التىنبەك سارسەنباەۆ پەن ونىڭ وققاعارى مەن جۇرگىزۋشىسىنىڭ ءولىمى دە اليەۆتىڭ قولىمەن جاسلاعانى انىقتالىپ، ونىڭ بۇرىنعى ىستەگەن قىلمىستارى جاڭا ايعاقتارمەن اشكەرلەنە تۇسكەن بولاتىن. وسى جانە وزگە دە جايتتارعا بايلانىستى راحات اليەۆتى ەكستراديتسيالاۋ ماسەلەسى قوزعالعان.

اليەۆتىڭ  ادۆوكاتى ءوزىنىڭ قورعاۋىنداعى ادام بيلىك وكىلدەرىنە  ەركىمەن بەرىلىپ، اۆستريا قۇقىق قورعاۋ ورگاندارىمەن ىنتىماقتاسا جۇمىس ىستەۋگە نيەتتى ەكەنىن ايتىپ وتىر. 

 قازاقستان سوتى راحات  اليەۆتى جالپى العاندا 40 جىلعا باس بوستاندىعىنان ايىرۋ جازاسىن كەسكەن.

بۇعان دەيىن اۆستريا اليەۆتى قازاقستانعا بەرۋدەن ەكى رەت باس تارتقان  ەدى. 2011 جىلدىڭ شىلدەسىندە قۇقىق قورعاۋ ورگاندارى مالتاعا كەتىپ ۇلگەرگەن بۇرىنعى ەلشىگە قاتىستى وزىندىك تەرگەۋ باستاعان. اۆستريانىڭ اليەۆتى قازاقستانعا قايتارماي وتىرعانىنا بايلانىستى پرەزيدەنت نازارباەۆ:

- اۆستريا قازاقستانمەن كونوميكالىق قارىم-قاتىناستار ورناتقان  ارىپتەس ەل بولىپ تابىلادى. ەندى اۆستريا بيلىگىنىڭ ادىلدىك ءۇشىن قىلمىسكەرلەردى بەرمەۋگە دالەلدەرى جوق. راحات اليەۆ ۇرەي ۇستىندە. ول ارينە،  وزىنە تاعىلعان كۇدىكتى الىپ تاستاعىسى كەلەدى. سونىڭ بارىنە قاراماستان، ءبىز ءىستى اياعىنا دەيىن جەتكىزۋىمىز كەرەك، - دەگەن-ءدى.

راحات اليەۆتىڭ تۇتقىندالعانى تۋرالى اقپارعا قاراعاندا ءىس اياعىنا جەتىپ قالعان سياقتى.

Abai.kz