قىتايدىڭ سولتۇستىك-باتىسىنداعى شىڭجاڭ-ۇيعىر اۆتونوميالىق ولكەسىنىڭ 6 قالاسى مەن وكرۋگتەرىنىڭ ءبىرىنشى ينستانتسياداعى سوتتارى بەيسەنبى كۇنى  لاڭكەستىككە قاتىسى بار دەپ 81 ادامعا ۇكىم شىعارعان. بۇل تۋرالى  قازاقپارات «سينحۋا» اگەنتتىگىنە سىلتەمە جاساپ حابارلادى.

ايىپتالۋشىلاردىڭ توعىزى ءولىم جازاسىنا كەسىلدى، تاعى ءۇش ادام مەرزىمى ۇزارتىلىپ، ەكى جىلدان كەيىن ءولىم جازاسىنا كەسىلمەك.

ايتا كەتەتىن بولساق وسىعان دەيىن قىتاي پوليتسياسى شىڭجاڭ-ۇيعىر اۆتونوميالىق ولكەسىندە مامىردىڭ 23-ىندە لاڭكەستىك قىزمەت پەن ءدىني ەكسترەميزمگە قاتىسى بار دەگەن 200-دەن استام كۇدىكتىنى ۇستاعان بولاتىن. بۇل توپتار حوتان، قاشعار مەن اقسۋدا انىقتالعان. جۇرگىزىلگەن ارنايى شارالار بارىسىندا پوليتسيا قىزمەتكەرلەرى 1,8 مىڭ تونناعا جۋىق جارىلعىش زاتتى تاركىلەدى. جەرگىلىكتى بيلىكتىڭ مالىمەتىنە ساي، شىڭجاڭداعى تەررورلىق توپتاردىڭ سانى 2010 جىلدان باستاپ ءبىراز كوبەيگەن كورىنەدى. بىلتىر ولاردىڭ سانى 200-گە جەتكەن. قحر بيلىگى مامىر ايىندا تەرروريزمگە قارسى كۇرەسكە شاقىرىپ، انتيتەررورلىق كۇشەيتىلگەن شارانى ءبىر جىل جۇرگىزەتىن بولعان ەدى.

اباي-اقپارات