جەر دەگەنىمىز... ونىڭ وزىندە دە قالا ماڭىنداعى نەمەسە قالا ىشىندەگى جەر دەگەنىمىز بۇگىنگى كۇنى «قىپ-قىزىل كوررۋپتسيا» جايلاعان جۇماقتىڭ جايلى مەكەنى سياقتى. قايسىبىر قالانىڭ نەمەسە وبلىستىڭ جەر سالاسىنا قاتىستى مەكەمەسىن الىپ قاراماڭىز، بارىندە دە جەرگە بايلانىستى قىزىلكەڭىردەك ايتىس ءجۇرىپ جاتادى. اشىعى وسى. امەريكا اشىپ وتىرعانىمىز جوق، الىپپە وقي الاتىن ازاماتتاردىڭ بارلىعى مۇنى جاقسى بىلسە كەرەك. القيسسا:

قاراعاندى وبلىسىندا قارا جەرگە بايلانىستى تاعى دا داۋ-داماي تۋىنداپ كەلەدى. «جەر داۋى مەن جەسىر داۋى» دەگەنىمىز الىمساقتان بار بولعان دەسەك تە، قالا اكىمدىگىنىڭ بۇل جولعى قىلىعى شىنىمەن دە سىبايلاس جەمقورلىقتىڭ «ەسىگىن قاعىپ» تۇرعانداي. «نەگە؟» دەسەڭىز، قۇرىلىس جۇمىستارىن جۇرگىزۋ ءۇشىن جەر ءبولۋدى سۇراعان كاسىپكەرلەرگە نۇرلان اۋباكىروۆ باستاعان قالالىق اكىمدىك «وتكاز» بەرىپ وتىر. اكىمدىكتىڭ «سىنىعىنا تابىلىپ وتىرعان سىلتاۋى» - «جەر ساتىلادى، ياعني اۋكتسيونعا قويىلادى...» دەگەن ءۋاج عانا. راس، بۇعان ەشكىمنىڭ قارسىلىعى جوق، ويتكەنى قولدانىستاعى زاڭدا تۋرا وسىلاي دەپ كورسەتىلگەن دە. بۇل - كوتەرىلىپ وتىرعان ماسەلەنىڭ ءبىر جاعى عانا دەسەك، وسىناۋ ماسەلەنىڭ ەكىنشى جاعى دا بار عوي. ەكىنشى جاعى مىناۋ سوندا: زاڭ بويىنشا ساتىلىمعا تۇسەتىن جەر الدىن-الا بەلگىلەنىپ، ول جەردىڭ ساتىلۋ ءتارتىبى، سونىمەن بىرگە  كاداسترلىق ءنومىرى مەن باعاسى ناقتىلانۋى قاجەت. ءسويتىپ مۇنىڭ بارلىعى جەرگىلىكتى ءماسليحاتتىڭ سۇزگىسىنەن ءوتىپ بارىپ... بەكىتىلۋگە ءتيىستى. ال قاراعاندى قالالىق اكىمدىگىندە مۇنىڭ ءبىر دە بىرەۋى زاڭدى قۇجات رەتىندە «تاسقا باسىلىپ، تاڭبالانباعان». ايماقتىق كاسىپكەرلەر پالاتاسى ديرەكتورىنىڭ ورىنباسارى گەننادي جمۋك مىرزانىڭ ايتۋىنا قاراعاندا، ءدال وسى پالاتا ۇسىنىسى بويىنشا اكىمدىك جانىنان قوعامدىق كەڭەس قۇرىلعان ەكەن. داۋ-دامايعا ۇلاسىپ كەتكەن جەر ماسەلەسى جاقىندا وسى قوعامدىق كەڭەستە ارنايى قارالماقشى. قازىرگى كەزدە قالا پروكۋراتۋراسى دا قۇلاعدار ەتىلگەن وسىناۋ ماسەلەنىڭ ءمانىسىن قوعامدىق كەڭەس شەشە الا ما، جوق پا – جەرگىلىكتى جەردەگى گۋ-گۋ ەتكەن بۇگىنگى گاپ تە وسىندا بولىپ تۇر.

مارات ماداليموۆ.

اباي.kz